Proverbios 12 - Q'eqchi Bible

¹ Li naxk'ul ru li tije'k, a'an wank xna'leb'. Li xik' nareek'a q'use'k, a'an maak'a' xna'leb'.

² Li Qaawa' narusila ru li chaab'il xch'ool ut naraqok aatin sa' xb'een li ink'a' us xna'leb'.

³ Maa'ani naxk'ojob' xch'ool sa' xb'een li maa'usilal; li tiik xch'ool maajaruj taa'eek'asiiq sa' xna'aj.

⁴ Li ixq chaab'il xna'leb', a'an xloq'al li xsum'aatin; a'ut li ink'a' us xna'leb' naxpo' xch'ool chi junwaakaj.

⁵ Li tiikeb' xch'ool a' li tiikilal neke'xk'oxla; a'ut li ink'a' useb' xna'leb' junes li b'alaq'ik naxik wi' xch'ooleb'.

⁶ Li raatin li ink'a' us xna'leb' nakamsink; li raatin li tiik xch'ool nak'ehok kolb'a ib'.

⁷ Naq eb' li ink'a' useb' xna'leb' neke't'ane'k, aran neke'oso'k chi junajwa; a'ut li xjunkab'al li tiikeb' xch'ool k'ojk'o sa' xna'aj chi junelik.

⁸ Li ani seeb' xch'ool nak'ehe'k xloq'al; a'ut li maak'a' xna'leb', a'an yal re tz'eqtaanaak.

⁹ Jwal us naq tz'eqtaananb'ilaqat ut wanq aawa, chiru naq k'eeb'ilaq aaloq'al chi maak'a'aq aatzekemq.

¹⁰ Li tiik xch'ool naxnaw xch'oolaninkileb' li xketomq, ut li ink'a' us xna'leb' ink'a' naxnaw uxtaanank.

¹¹ Li naxk'e xch'ool chi k'anjelak sa' li xch'och' twanq chi yo'oon li xtzekemq; a'ut li maak'a' xna'leb' naxsik' li maak'a' na'ok wi'.

¹² Xrahinkil ru li ink'a' us, a'an chanchan jun ra'al cho'q reheb' li ink'a' useb' xna'leb'; a'ut eb' li chaab'ileb' xch'ool chanchaneb' li che' cham naxik wi' li xxe'eb'.

¹³ Li ink'a' us xna'leb' nat'ane'k sa' li xtik'ti', a'ut li tiik xch'ool nakole'k chiru li rahilal.

¹⁴ Li junjunq tixk'ul xq'ajkamunkil a' yaal chanru li xyehom ut xb'aanuhom.

¹⁵ Li maak'a' xna'leb' naxk'oxla naq chaab'il naxb'aanu; a'ut li wank xna'leb' naxpaab' li xq'usb'al.

¹⁶ Li maak'a' xna'leb' najosq'o'k chi junpaat; li wank xna'leb' ink'a' naxk'e sa' xch'ool li hob'e'k.

¹⁷ Li tz'aqal testiiw naxye li yaal, ut laj b'alaq' naxkuutu li tik'ti'.

¹⁸ Wan li aatin ra nanaqk wi' jo' naxset li q'esnal ch'iich'; ab'an li raatin li wank xna'leb', a'an chanchan li chaab'il b'an.

¹⁹ Li ani naxye li yaal, wanq chi junelik; a'ut laj tik'ti' ink'a' najt taawanq.

²⁰ Rahilal neke'xk'uub' laj tik'ti'; a'ut eb' li neke'xra li tuqtuukilal te'xtaw sahil ch'oolej.

²¹ Maajun rahilal tixk'ul li tiik xch'ool; a'ut li ink'a' us xna'leb' chixjunil li ch'a'ajkilal taachalq sa' xb'een.

²² Li Qaawa' xik' narileb' laj tik'ti', ab'an nasaho'k xch'ool rik'ineb' li neke'wank sa' tiikilal.

²³ Li seeb' xch'ool ink'a' naxnimob'resi rib' rik'in li xnawom; a'ut li jip naxk'ut li xmemil yalaq b'ar.

²⁴ Li naxk'e xch'ool chi k'anjelak, taawanq xwankil; a'ut laj q'em k'ajo' naq te'numtaaq sa' xb'een.

²⁵ Li rahil ch'oolej naxluktesi xch'ool li winq; a'ut li chaab'il aatin naxsahob'resi.

²⁶ Li tiik xch'ool naxk'ut xb'e li ras riitz'in; a'ut li ink'a' us xna'leb' naxsachb'esi.

²⁷ Laj q'em ink'a' naxtaw xtzak chi yohok; a'ut li seeb' ruq' chi k'anjelak, taawanq xb'ihomal.

²⁸ Li ani nawank sa' tiikilal, taawanq xyu'am; a'ut li nab'aanunk li ink'a' us, tixtaw li kamk.