Proverbios 11 - Q'eqchi Bible

¹ Li Qaawa' naxtz'eqtaana li b'alaq'il peex, ut naxk'ul xch'ool li nab'isok chi tz'aqal.

² Li q'etq'etil nak'ehok sa' xutaan; li ani naxkub'si rib', a'an wank xna'leb'.

³ Li chaab'il xch'ool nab'eresiik xb'aan li xtiikilal; eb' laj b'alaq' te'oso'q sa' li xb'alaq'ileb'.

⁴ Li b'ihomal maak'a' na'ok wi' sa' xkutankil li raqok aatin; ka'ajwi' li tiikilal nakolok chiru li kamk.

⁵ Li tiikilal naxtuqub' ru xb'e li tiik xch'ool; a'ut li ink'a' us xna'leb' taa'oso'q sa' li xmaa'usilal.

⁶ Li tiikilal naxkoleb' li chaab'ileb' xch'ool; a'ut eb' laj b'alaq' neke'aaleek xb'aan li k'aru neke'rataw.

⁷ Naq nakamk li naxb'aanu maa'usilal, na'oso'k li ratawom jo'wi' li k'aru naxk'oxla xb'aanunkil.

⁸ Li tiik xch'ool nakole'k chiru li rahilal, ut a' chik li ink'a' us xna'leb' nak'uluk re li ch'a'ajkilal.

⁹ Li ink'a' us xna'leb' naxk'e sa' rahilal eb' li ras riitz'in rik'in li raatineb'; ab'anan li xseeb'al xch'ooleb' li tiikeb' ru xyu'am nakolok reheb'.

¹⁰ Naq li tiik xch'ool us na'elk, k'ajo' naq neke'saho'k xch'ool li tenamit; ut naq nakamk li ink'a' us xna'leb', neke'xajok chixjunileb'.

¹¹ Naq li Yos narosob'tesiheb' li tiikeb' xch'ool, nawakliik chixjunil li tenamit; a'ut li ink'a' useb' xna'leb' neke'xjuk' li tenamit rik'in li raatineb'.

¹² Li maak'a' xna'leb' na'aatinak chirix li ramiiw; a'ut li chaab'il xk'a'uxl nakanaak chi ch'anch'o.

¹³ Li namolok aatin naxseeraq'i chixjunil, a'ut li winq paab'ajel ru naxk'uula sa' xch'ool.

¹⁴ Wi eb' li wankeb' sa' xwankil maak'a'eb' xna'leb', nasachk li tenamit; ab'an wi naab'aleb' laj k'ehol na'leb', taakole'q li tenamit.

¹⁵ Ra tixk'ul li nak'asok chirix li ink'a' naxnaw ru. Maab'aanu a'an, ut sa tatwanq.

¹⁶ Li ixq chaab'il xna'leb' nak'eemank xloq'al, ut li winq seeb' xk'a'uxl nab'ihomo'k.

¹⁷ Li natoq'ob'ank u narusila rib' xjunes; a'ut li narahob'tesink, xjunes naxsach rib'.

¹⁸ Li yib'ru xna'leb' moko ch'olch'o ta li xq'ajkamunkil; a'ut li naxb'aanu li tiikilal, a'an ch'olch'o li xtojb'al.

¹⁹ Li nab'aanunk re li tiikilal naxtaw li yu'am; li naxsik' li maa'usilal naxtaw li kamk.

²⁰ Li Qaawa' xik' narileb' li yib'ru xna'leb'eb', ab'an nasaho'k xch'ool rik'ineb' li chaab'ileb' xyu'am.

²¹ Ch'olch'o naq li ink'a' us xna'leb' tixtoj rix li xmaak; ab'an li tiikeb' xch'ool te'kole'q.

²² Li ixq ch'ina'us ut maak'a' xna'leb' chanchan wi' li matq'ab' oor chi ru'uj junaq aaq.

²³ Li tiikeb' xch'ool junes li us neke'raj xb'aanunkil; a'ut li royb'enihom li ink'a' useb' xna'leb' naxk'am chaq josq'il ut rahilal.

²⁴ Wankeb' neke'sihink, ut b'ihomo'k chik neke'xb'aanu; wankeb' ajwi' aj pix neke'k'uulank, ut neb'a'il nokoxe'oso'q wi'.

²⁵ Li natenq'ank chi anchal xch'ool, nab'ihomo'k; li ani nasihink, k'uluk ajwi' naxb'aanu.

²⁶ Li namuquk ixim namajewaak xb'aaneb' li tenamit; a'ut li nak'ayink, na'osob'tesiik.

²⁷ Li naxsik' li us, nak'eemank xloq'al; li nasik'ok maa'usilal, a'an ajwi' toxtaw.

²⁸ Li k'ojk'o xch'ool rik'in li xb'ihomal, taa'oso'q jo' li chaqiq'een; ut li tiikeb' xch'ool chanchanaqeb' li raxraxil ru k'iche'.

²⁹ Li ink'a' naxch'oolani li rochoch, maak'a' chik taakanaaq re; li maak'a' xna'leb', junelik taawanq rub'el xwankil li wank xna'leb'.

³⁰ Li tiikilal nak'ehok yu'am; wi wank aana'leb', jalaneb' chik te'taaqenq aawe.

³¹ Wi li tiik xch'ool naxk'ul li xq'ajkamunkil arin sa' ruuchich'och', ma toja' ta chik laj maak ut li ink'a' us xna'leb'.