Proverbios 10 - Q'eqchi Bible

II. EB' LI XYEHOM LAJ SALOMÓN (10,1—22,16)

¹ Xyehom laj Salomón: Li alalb'ej li wank xna'leb' naxsahob'res xch'ool li xna' xyuwa'; li kaw xjolom naxrahob'tesi xch'ooleb'.

² Li nab'ihomo'k sa' b'alaq'il maak'a' na'ok wi'; ab'an li tiik xch'ool naxkol li xyu'am.

³ Li Qaawa' ink'a' naxk'e chi kuyuk tz'okaak li tiik xch'ool; ab'an ink'a' naxk'e re li ink'a' us xna'leb' li k'aru narataw.

⁴ Li q'emal naneb'a'o'b'resink; li k'anjelak chi kaw nab'ihomob'resink.

⁵ Li q'olok sa' xq'ehil, a'an seeb'al ch'oolej; li wark sa' xq'ehil li q'olok, a'an xutaanal.

⁶ Osob'tesinb'il xb'aan li Yos li ani chaab'il xch'ool; a'ut li ink'a' us xna'leb' junes maa'usilal muqmu chi xtz'uumal re.

⁷ Junelik osob'tesinb'il li xk'ab'a' li winq chaab'il; a'ut li ink'a' us xna'leb' sa' junpaat taasache'q li xk'ab'a'.

⁸ Li chaab'il xna'leb' narab'i ut naxpaab' li xchaq'rab'inkil; li junes mem aj aatin naxye, taa'oso'q.

⁹ Li tiik ru xyu'am, maak'a' naxxiwa; a'ut li ink'a' nawank sa' tiikilal sa' jun kutan taak'utunq li xlab'al xch'ool.

¹⁰ Li nab'alaq'ink, naab'al li rahilal naxyoob'; li junes mem aj aatin naxye, taa'oso'q.

¹¹ Li aatin naxye li tiik xch'ool, nak'ehok yu'am; a'ut li ink'a' us xna'leb' junes maa'usilal muqmu chi xtz'uumal re.

¹² Li xik'il uuchink nayoob'ank raaxiik'; a'ut li rahok naxkuy chixjunil li maak.

¹³ Wi chaab'il laana'leb', a'an nak'utunk naq nakat-aatinak; ab'an wi maak'a' aana'leb', taak'ehe'q aalob'.

¹⁴ Li chaab'il xna'leb' naxk'uula li xnawom; ut naq na'aatinak li kaw xjolom, raaxiik' naxyoob'.

¹⁵ Li b'ihom naru tixkol rib' rik'in li xb'ihomal; a'ut li neb'a' maak'a' tixkol wi' rib'.

¹⁶ Li xq'ajkamunkil li tiik xch'ool, a'an li yu'am; ut li ink'a' us xna'leb', a' li maak naxxok.

¹⁷ Li naxpaab' li xtijb'al, chaab'il b'e naxik wi'; a'ut li ink'a' naxpaab', taasachq.

¹⁸ Laj tik'ti' naxmuq li xik'il uuchink; ut li ani nawulak chiru molok tik'ti', a'an maak'a' xna'leb'.

¹⁹ Li k'ajo' naxye, naab'al sut namaakob'k; li naxkuy rib' chi aatinak, a'an chaab'il xna'leb'.

²⁰ Tz'aqal plaat li k'aru naxye li tiik xch'ool; a'ut maak'a' na'ok wi' li xk'a'uxl li ink'a' us xch'ool.

²¹ Li raatin li tiik xch'ool naxtenq'a naab'aleb' chi poyanam; a'ut li kaw xjolom nakamk xb'aan xmaak'a'il xna'leb'.

²² Li rosob'tesihom li Qaawa' nab'ihomob'resink ut ink'a' naxk'am chaq rahil ch'oolej.

²³ Li jip nasaho'k xch'ool chi b'aanunk maa'usilal; li chaab'il xna'leb' nasaho'k xch'ool rik'in li xna'leb'.

²⁴ Li ink'a' us xch'ool naxk'ul li naxxiwa ru; a'ut li chaab'il xch'ool naxtaw li naxrahi ru.

²⁵ Li ink'a' us xna'leb' na'oso'k xb'aan li k'iila rahilal; ut li tiik xch'ool wanq chi junelik.

²⁶ Laj q'em, a'an chanchan li sib': k'ajo' naq naxrahob'tesi xch'ool laj eechal re.

²⁷ Li naroxloq'i li Qaawa' k'iila chihab' taayo'yooq; a'ut li ink'a' us xna'leb' taak'ose'q li xyu'am.

²⁸ Li royb'enihomeb' li tiikeb' xch'ool, a'an li sahil wank; a'ut li ink'a' useb' xna'leb' maak'a' neke'royb'eni.

²⁹ Li Qaawa' naxkoleb' li neke'xb'aanu li us, ut naxsach ruheb' li ink'a' useb' xna'leb'.

³⁰ Li tiik xch'ool junelik us na'elk; a'ut li yib'ru xna'leb' jun k'amok ajwi' li xyu'am sa' ruuchich'och'.

³¹ Li tiikeb' xch'ool junes chaab'il na'leb' neke'xye; a'ut li ink'a' useb' xna'leb' neke'ch'anab'aak chi aatinak.

³² Sa rab'inkil chi aatinak li tiik xch'ool; a'ut li ink'a' us xna'leb' junes yib' aj aatin naxye.