Oseas 8 - Q'eqchi Bible

Xe'awk sa' li iq' ut a' chik li kaqsut-iq' te'xtaw

¹ “Yaab'asi li pur! Chanchan junaq t'iw naq li rahilal tixkut rib' sa' xb'een li xtenamit li Qaawa'. Xb'aan naq xe'xtz'eqtaana linsumwank ut xe'xq'etq'eti rib' chiru linchaq'rab'.

² Chi japjookeb' re xe'chalk wik'in chi xyeeb'al: «Naqanaw naq laa'at li xYos laj Israel», chankeb'.

³ A'ut eb' laj Israel xe'xtz'eqtaana li usilal chaab'ilal; jo'kan naq eb' li xik' neke'ilok reheb' te'xkut rib' sa' xb'eeneb'.

⁴ “Xe'xxaqab' x'awab'ejeb' chi ink'a' xe'xye we; xe'xsik' ruheb' laj jolominel chi ink'a' ninnaw laa'in. Xe'xpak' xyoseb' rik'in li oor ut li xplaateb' yal re xsachb'aleb' rib' xjuneseb'.

⁵ Laa'in nintz'eqtaana li wakax nakaloq'oni, a Samaria. Q'axal yo injosq'il sa' xb'een: jo'q'e put te'xch'ajob'resi rib'eb' laj Israel?

⁶ Li wakax xeyiib' laa'ex aj Samaria, moko Yos ta; a'an yal xyiib'ahom laj tenol ch'iich', ut taaputz'iiq chi junwaakaj.

⁷ Chanchan naq xex'awk sa' li iq', ut a' chik li kaqsut-iq' teetaw. Li k'aru xeraw, ink'a' taa'uuchinq; ut wi taa'uuchinq, jalaneb' chik te'yaloq xsahil.

⁸ “Xsache'k xwankil laj Israel, chanchan naq xnuq'e'k lintenamit. Ut anaqwan wank sa' xyanqeb' laj ab'l tenamit, kama' junaq sek' li maak'a' chik xk'anjel.

⁹ Laj Efraín xkoho Asiria chi xpatz'b'al xtenq'ankil, jo' junaq b'uur li naxb'eeni rib' sa' junesal na'ajej; ut xtoj rik'in xsimaatan re naq wanq ani taarahoq re!

¹⁰ Ab'an us ta tixloq'eb' laj rahol re sa'atqeb' li k'iila tenamit, laa'in tincha'cha'iheb' anaqwan, ut chiru jun k'amok ink'a' chik te'xkuy rub'el xwankileb' li awab'ej ut eb' laj jolominel.

¹¹ “Laj Efraín xtamresiheb' li x'artal ka'ajwi' re xb'aanunkil li maak.

¹² Us ta laa'in tintz'iib'a naab'alaq linchaq'rab' cho'q re a'an, ab'anan maak'a' taaraj wi'.

¹³ Nawulak chiruheb' li mayejak: mayejaqeb' ut xtzekaaqeb' li tib' mayejanb'il! Ab'an laa'in li Qaawa' ink'a' sa inch'ool rik'ineb': jultik we li maa'usilal xe'xb'aanu, ut tinrahob'tesiheb' xb'aaneb' li maak xe'xb'aanu rik'in xtaqlankileb' wi' chik Ejiipt.

¹⁴ Eb' laj Israel xe'xyiib' naab'al li xninqal ru ochoch, ut xsachk sa' xch'ooleb' laj Yoob'tesihom reheb'. Eb' laj Judá xe'xsuttz'aki naab'aleb' li tenamit; a'ut laa'in tink'eheb' xxamlel, ut te'k'ate'q chixjunileb' li xchaq'alil ru ochoch”.