Oseas 7 - Q'eqchi Bible

¹ “Naq nawaj raj xk'irtasinkil lintenamit ut xkolb'aleb' li walal ink'ajol aj Israel, nak'utunk li xmaakeb' laj Efraín ut li xmaa'usilaleb' laj Samaria. Xb'aan naq chixjunileb' neke'b'alaq'ik; neke'okje'k sa'eb' li ochoch chi elq'ak ut junch'oleb' chik li poyanam yookeb' chi elq'ak sa' b'e.

² Ink'a' neke'xk'oxla naq jultik we li xmaakeb'. Ut anaqwan tz'aptz'ookeb' sa' li maak, junelik wank chiwu li xmaa'usilaleb'.

³ Rik'in li maa'usilal ut li b'alaq'ik neke'xb'aanu neke'xsahob'resi xch'ooleb' li awab'ej ut li ninqeb' xwankil.

⁴ Chixjunileb' a'an junes aj muxuleb' sumlaak; chanchaneb' li tiqwal xam, li ink'a' chik na'ajmank ru naq taak'ehe'q xkomon xxamlel toj reetal taasipooq li kaxlanwa.

⁵ Sa' xninq'e li awab'ej, neke'yajerk li xninqaleb' ru winq xb'aan li num uk'ak; neke'reetz'u eb' li poyanam, ut li awab'ej naxb'aanu jo' neke'xb'aanu eb' a'an.

⁶ Naq yookeb' chi xkawresinkil li maa'usilal, li xch'ooleb' jo' tawi' xxamlel li nachiqe'k wi' li kaxlanwa: chixjunil li q'oqyink ch'anch'ookeb', ab'an naq nasaqewk, k'ajo' naq neke'xamnak!

⁷ Chixjunileb' nachalk xjosq'ileb' jo' li tiqwal xam, ut neke'xkamsi li xjolomileb'. Kamenaqeb' chik chixjunileb' li x'awab'ejeb', ab'anan maajun naxyaab'a link'ab'a'.

Eb' laj Israel neke'xsik' li xtenq'ankileb' yalaq b'ar

⁸ “Eb' laj Efraín xe'xjunaji rib' rik'ineb' laj ab'l tenamit, chanchaneb' li wa junpak'al ajwi' xchaq'ak.

⁹ Jalaneb' xtenamit yookeb' chi tawasink reheb' chi ink'a' neke'xk'e reetal a'an. K'ajo' naq xe'saqo'k li rismaleb' xjolom chi ink'a' neke'xnaw!

¹⁰ Li xq'etq'etileb' laj Israel yo chi numtaak sa' xb'eeneb', ab'an ink'a' neke'raj sutq'iik rik'in li Qaawa'. Us ta q'axal ra xe'xk'ul, ab'anan ink'a' neke'xsik' li Qaawa' li xYoseb'.

¹¹ Laj Efraín jo' jun li mukuy maak'a' xna'leb', ink'a' naxnaw k'oxlak: naxpatz' xtenq'ankil re Ejiipt ut naxik rik'ineb' laj Asiria.

¹² A' yaal li b'ar te'xikje'q, laa'in tinhel linra'leb'aal sa' xb'eeneb', teb'inchap jo'eb' li xik'anel xul ut tinrahob'tesiheb' xb'aan li maa'usilal xe'xb'aanu.

Ra chaalel sa' xb'eeneb' laj Israel

¹³ “Ra chaalel sa' xb'eeneb' li xe'kanab'ank we. Tz'eqtaananb'ilaqeb' xb'aan naq xe'xjipi rib' chiwu. Laa'in teb'inkol raj, a'ut eb' a'an tik'ti' chik neke'xye chiwix.

¹⁴ Moko anchaleb' ta xch'ool naq neke'tz'aamank chiwu naq yookeb' chi tz'uyink chiru li xch'aateb'. Yal re xtz'aamankil li triiw ut li b'iin naq neke'xlet'exi li xtib'eleb'. Chi jo'kan xe'xq'etq'eti rib' chiwu.

¹⁵ Naq xink'e xkawilaleb' li roq ruq'eb', a' chik li rahilal xe'xk'uub' xb'aanunkil we.

¹⁶ Xkoho xch'ooleb' chirixeb' li yal k'oxlanb'il yos, chanchaneb' li yokosil xna' simaj li maak'a' aj e. K'ajo' naq neke'xye laj k'amol xb'eheb': jo'kan naq te'kamsiiq chi q'esnal ch'iich' ut se'leb'aal te'kanaaq wi' xb'aaneb' laj Ejiipt.