Oseas 4 - Q'eqchi Bible

Chixjunileb' wankeb' xmaak

¹ Ab'ihomaq li raatin li Qaawa', ex aj Israel. Ok re sa' raqb'a aatin rik'ineb' li wankeb' sa' li tenamit a'in, xb'aan naq maak'a' chik arin li tiikil ch'oolej ut li rahok, maajun chik nanawok ru li Qaawa'.

² Neke'yehok jurament ut ink'a' neke'xb'aanu li k'aru neke'xye; k'ajo' li tik'ti'ik, li kamsink poyanam ut li elq'ak, numtajenaq li muxuk sumlaak ut li raaxiik', ut junelik aj chik wank li kamsij ib'.

³ Jo'kan naq ra xch'ooleb' chixjunil li tenamit ut maak'a'eb' chik xmetz'ew li wankeb' chisa'; jun kamikeb' li k'iche'il xul, eb' li neke'rupupik chiru choxa jo' ajwi' eb' li kar sa' palaw.

Eb' laj tij ajwi' wankeb' xmaak

⁴ Li Qaawa' naxye chi jo'ka'in: “Maajun chijitoq ut maa'ani chich'iilanq! At aj tij, ka'ajwi' aawik'in yo inch'a'ajkilal.

⁵ Tatt'ane'q sa' li maak chi kutan, ut chiru q'oqyink taamaakob'q chik li propeet aawochb'een; ut laa'in tinsach ru laana'.

⁶ Yo chi kamk lintenamit xb'aan naq ink'a' neke'xnaw wu. Ut laa'at, aj tij, xatz'eqtaana xnawb'al wu, jo'kan naq tatwisi sa' laak'anjel. Xb'aan naq xatz'eqtaana li xchaq'rab' laaYos, laa'in ajwi' teb'intz'eq chirix inch'ool eb' laawalal aak'ajol.

⁷ “Naq k'ajo' xk'ihaleb' laj tij, k'ajo' chik xe'maakob'k; ut laa'in twisi xloq'aleb' ut tink'ut xxutaaneb'.

⁸ Neke'xch'oolani rib' rik'in xmaakeb' lintenamit; jo'kan naq neke'rataw naq q'axal chik te'maakob'q li poyanam!

⁹ Ab'an juntaq'eet te'xk'ul laj tij rik'ineb' li tenamit: tink'eheb' chi xtojb'al li xmaakeb' ut teb'inq'ajkamu jo' chanru li xyehom ut xb'aanuhomeb'.

¹⁰ Te'tzekanq, ab'an ink'a' te'k'ojlaaq xch'ool; te'ko'b'eetaq, ab'an ink'a' te'alanq. Xb'aan naq xe'xkanab' k'anjelak chiru li Qaawa' ut a' chik li ko'b'eetak xe'xb'aanu.

Eb' laj Israel xe'xmux li xpaab'aaleb'

¹¹ “Li ko'b'eetak ut li b'iin neke'sachok na'leb'.

¹² Lintenamit neke'patz'ok rik'in jun tolol chi che' ut li xxuq'eb' neke'sumenk reheb'. Xb'aan xmuxb'al li xpaab'aaleb' yo chi sachk lintenamit ut xe'xnajtob'resi rib' rik'in li Qaawa' li xYoseb'.

¹³ Neke'xik chi mayejak sa' xjolomeb' li tzuul ut sa' xb'eeneb' li b'ool neke'k'atok k'ajpom; jo'kan ajwi' neke'xb'aanu rub'eleb' li xninqal che', xb'aan naq sa neke'hilank rub'el li xmuheb' a'an. Eb' leerab'in neke'yumb'eetak ut eb' leeralib' neke'xmux li xsumlajikeb'.

¹⁴ Ab'an laa'in ink'a' tinrahob'tesiheb' leerab'in xb'aan li yumb'eetak chi moko leeralib' xb'aan xmuxb'al li xsumlajikeb', xb'aan naq laa'ex ajwi' nekexxik chi maakob'k rik'ineb' laj yumb'eet, ut nekexmayejak eerochb'eeneb' li ixq li neke'yumb'eetak sa'eb' leetijob'aal; ut lintenamit li maak'a' xna'leb'eb' yookeb' chi sachk.

¹⁵ “At Israel, wi laa'at nakamux laapaab'aal, ab'an ink'a' taxaq taamaakob'q laj Judá. Mexxik aran Kilkal chi moko chex'ok Bet-Abén; meeye eejurament sa' xk'ab'a' li Qaawa'.

¹⁶ Laj Israel xq'etq'eti rib' chiru li Qaawa' jo' junaq wakax kaan ru: chan tawi' ru naq taach'oolaniiq xb'aan li Qaawa' jo' junaq ch'ina karneer sa' li chaab'il pach'aya'?

¹⁷ Laj Efraín xkoho xch'ool chirixeb' li yal k'oxlanb'il yos: kanab'omaq chi xb'aanunkil!

¹⁸ Xb'aan li kalaak chixjunileb' neke'raj xmuxb'al rib' ut ink'a' chik neke'xkol rix li xloq'aleb': a' chik li Tz'i'b'eetal nawulak chiruheb'.

¹⁹ K'amb'ilaqeb' yalaq b'ar xb'aan li iq' naq te'oso'q, ut q'axal te'xutaanaq xb'aan naq xe'xmux li xpaab'aaleb'.