Oseas 2 - Q'eqchi Bible

¹ Yehomaq reheb' leeras eeriitz'in: “Intenamitex”, ut yehomaq reheb' leeranab': “Uxtaananb'ilex”.

Li rixaqil laj Oseas a'an reetalil li xtenamit li Yos

² Li Qaawa' kixye chi jo'ka'in: “Q'usumaq leena', jitomaq, xb'aan naq moko insum'aatin ta chik, ut moko laa'in ta chik li xb'eelom. Xkanab'aq li yumb'eetak ut mixsik'eb' chik li xsum.

³ Wi ink'a' tixkanab' xb'aanunkil, laa'in tinkanab' sa' xutaan ut chi t'ust'u, jo' naq kiyo'laak; jo' li chaqich'och' tkanaaq ut chi pojtz' ch'och', re naq taakamq xb'aan xmajelal li ha'.

⁴ Ink'a' tintoq'ob'a ruheb' li ralal xk'ajol xb'aan naq ralaleb' li yumb'eetak.

⁵ Li xna'eb' kixmux li xyu'am; li ixq li ki'alank reheb' kixsach xloq'al naq kixye: «Tinxik rik'ineb' li neke'rahink we, a'eb' li neke'k'ehok inwa ut wuk'a', jo'wi' linliin ut lintuuxnoq', lin'aseeyt ut linb'iin», chan.

⁶ “Jo'kan naq laa'in tintz'ap li xb'e rik'in k'ix, tinram chi tz'ak li xb'e re naq maab'ar chik taanume'q.

⁷ Tixtaaqeheb' li xsum, ab'an ink'a' toxtaweb'; tixsik'eb', ab'an maab'ar tixtaweb'. Toja' naq tixye: «Tinsutq'iiq wi' chik rik'in linb'eelom, xb'aan naq sa ajwi' xinwank rik'in chiru anaqwan», cha'aq.

⁸ “Ab'an a'an ink'a' naxnaw naq laa'in ajwi' nink'ehok re li xtriiw, li xb'iin ut li xchaab'il aseeyt; laa'in xink'ehok re naab'al li xplaat ut li x'oor li xyiib'ahom wi' laj Bahal.

⁹ Jo'kan naq sa' xq'ehil li q'olok tinxok wi' chik lintriiw ut linb'iin, ut tinmaq' chiru lintuuxnoq' ut linliin li xink'e chi raq'un.

¹⁰ Ut anaqwan tinkanab' sa' xutaan chiruheb' li neke'rahink re, ut maajun chik taakoloq re sa' wuq'.

¹¹ Tinsach chixjunil li nasaho'k wi' xch'ool, a' li utz'uk, li xninq'ehinkil li xtiklajik li po, li hilob'aal kutan jo'wi' chixjunileb' li ninq'e.

¹² Tink'e chi sache'k chixjunileb' li rawimq li naxye wi': «A'aneb' a'in linq'ajkamunkil li xk'ehomeb' we li neke'rahink we». Tink'eheb' chi pimo'k ut tinkanab' cho'q xwaheb' li k'iche'il xul.

¹³ Tolinrahob'tesi li ixq a'an xb'aan naq xk'atok k'ajpom chiruheb' laj Bahal, xtiqib' rib' chi chaab'il rik'in matq'ab' ut q'ol ut xkoho chirixeb' li neke'rahink re, chi ink'a' chik nikinxk'oxla laa'in li Qaawa' -chan li Yos-.

¹⁴ “Jo'kan naq tinq'unb'esi li xch'ool: tink'am sa' li chaqich'och' ut tinye re naq q'axal ninra.

¹⁵ Aran tink'e chaq wi' chik li x'uub'; li xtaq'ahil Akor tkanaaq cho'q nimla sahilal, ut tinraatina wi' chik jo' chaq sa' li xsaajilal, jo' naq ki'elk chaq Ejiipt.

¹⁶ Sa' li kutan a'an tixye we: «At inb'eelom», cha'aq; ut ink'a' chik: «At inBahal».

¹⁷ Twisi sa' xch'ool li xk'ab'a'eb' laj Bahal ut maajoq'e chik tixpatz'eb' -chan li Yos-.

¹⁸ “Sa' li kutan a'an, sa' xk'ab'a' lintenamit, tink'ojob' jun sumwank rik'ineb' li josq' aj xul, rik'ineb' li neke'xik'ank ut eb' li k'anti'. Twisi sa' li na'ajej a'in li xna' simaj, li q'esnal ch'iich' ut li yalok re naq twanq sa' tuqtuukilal lintenamit.

¹⁹ Laa'in tatink'am wik'in chi junajwa; ut laa'ataq li wixaqil sa' tiikilal ut jo' aak'ulub', xb'aan naq nawil xtoq'ob'aal aawu ut jwal nakatinra.

²⁰ Tatink'am wik'in rik'in chaab'ilal ut aran taanaw naq laa'in li Qaawa' laaYos.

²¹ “Laa'in li Qaawa' ninye a'in: Sa' li kutan a'an tinsum'aatina li choxa ut a'an tixsum'aatina li ruuchich'och';

²² chiru li ch'och' taa'elq chaq li triiw, li b'iin ut li chaab'il aseeyt, ut chi jo'kan k'ajo' naq taa'uuchinq li xtaq'ahil Jisrehel.

²³ Tinkanab' laj Israel sa' li xna'aj, twuxtaana ru li «Ink'a' uxtaananb'il ru»; ut li «Maawa' intenamit» tinye re: «Laa'at lintenamit», ut a'an tixye we: «At inYos»”, cha'aq.