Oseas 14 - Q'eqchi BibleAk' yu'am cho'q re laj Israel 1 At aj Israel, sutq'in wi' chik rik'in li Qaawa' laaYos, xb'aan naq laamaak xt'anok aawe. 2 Sutq'inqex rik'in li Qaawa' ut yehomaq re: “At Qaawa', kuy chixjunil li qamaak ut k'ulub'a li us xqab'aanu. Cho'q ruuchil li kok' wakax tootijoq ut toob'ichanq chawu. 3 Eb' laj Asiria ink'a' naru nokoohe'xkol, chi moko too'eleliq chirixeb' li kawaay; ink'a' chik tqaye «At qaYos» re li xqak'uub' rik'in quq', xb'aan naq ka'ajwi' aawik'in, at Qaawa', naxtaw ruxtaanankil ru li neb'a'yox”. 4 Ut li Qaawa' tixye: “Twisi chixjunil li xq'etq'etil laj Israel, ut q'axal tinra chi anchal inch'ool; xb'aan naq maak'a' chik injosq'il sa' xb'een. 5 Jo'kaqin li k'ajob' cho'q re laj Israel, ut a'an taa'atz'umaq jo' li saqihix. Tixchap xxe' chi us sa' ch'och', jo'eb' li che' re Líbano. 6 Taak'ihanq ut tixtaw xloq'al jo' li xchaq'alil ru xtoonal li oliiw; k'ajo'aq li xsununkil jo' xsununkil li tzuul Líbano. 7 Eb' laj Israel te'hilanq wi' chik rub'el linmuheelahom; te'xk'anjela ru li triiw, te'atz'umaq jo' li xtoonal li uub' ut jwal nawnooqeb' ru jo' li b'iin na'elk Líbano. 8 Ut laj Efraín tixye: «K'a' te'waj wi' laa'in eb' li yal k'oxlanb'il yos?». Laa'in nin'ilok ut ninkolok aawe; laa'in chanchanin jun toon chi saqichaj jwal raxrax ru. Laa'in nink'ehok aawe chi uuchink”. 9 Eb' li wankeb' xna'leb' ut li seeb'eb' xch'ool che'xnawaq xyaalal a'in: Tiik xb'e li Qaawa', ut a'an neke'xtaaqe li tiikeb' xch'ool; a'ut eb' laj maak neke'tichk'ok aran. |
Q'eqchi DC Bible © Bible Society in Guatemala, 2005.
Bible Society in Guatemala