Oseas 13 - Q'eqchi Bible

Taasache'q chi junwaakaj li x'awab'ejihom laj Israel

¹ Naq neke'aatinak eb' laj Efraín junxil, chixjunileb' neke'xiwak. K'eeb'il xwankileb' sa' xyanqeb' laj Israel. Ab'an ke'maakob'k naq ke'xloq'oni laj Bahal; jo'kan naq ke'kamk.

² Ut toj yookeb' ajwi' chi maakob'k anaqwan! Neke'xha'lesi li plaat re xyiib'ankileb' li jalanil yos; neke'xyiib' li xjalam uheb' jo' chanru neke'raj: chixjunil a'an yal xk'uub'ahom junaq aj tenol ch'iich' ut neke'xye naq yos, neke'mayejak chiru ut neke'xtz'ub' li xjalam u jun li wakax!

³ Jo'kan naq te'oso'q jo' li eq'laakil choql, jo' li xchu'ke li nasachk chi junpaat; jo'kaqeb' li k'im li nasaapuuk xb'aan li iq' ut jo'kaqeb' li sib' na'elk sa' li b'entaan.

⁴ Xyehom li Qaawa': “Laa'in li Qaawa' laaYos, chalen chaq sa' laawelik Ejiipt. Maak'a' junaq chik yos chiwu laa'in, chi moko wank junaq chik aj kolonel.

⁵ Laa'in kinch'oolanink chaq aawe sa' li chaqich'och', b'arwi' maak'a' nayo'laak.

⁶ “Ab'an naq ke'wa'ak ut ke'nujak, kiq'etq'eto'k chik li xch'ooleb' ut kine'xtz'eqtaana.

⁷ Jo'kan naq chanchanaqin li kaqkoj cho'q reheb'; twoyb'eniheb' sa' b'e jo' naxb'aanu li hix.

⁸ Tinkut wib' sa' xb'eeneb' jo' naxb'aanu li tz'uqtz'un naq neke'maq'ek li ral chiru; tint'upiheb' li xch'ool, aran ajwi' tinputz'iheb' jo' naxb'aanu li kaqkoj; ut eb' li k'iche'il xul te'choyoq reheb'.

⁹ “At Israel, ani taatenq'anq aawe sa' laasachik?

¹⁰ B'ar wank laa'awab'ej anaqwan re naq tatxkol sa' chixjunileb' laatenamit? B'ar wankeb' laj k'amol aab'e li kaye wi': «K'e in'awab'ej ut aj k'amoleb' inb'e»?

¹¹ Sa' linjosq'il kink'e laa'awab'ej, ut xb'aan linjosq'il kiwisi wi' chik chawu.

¹² “Li xmaa'usilal laj Efraín tz'iib'anb'il sa' linch'ool ut k'uulanb'il chi us chixjunileb' li xmaak.

¹³ Xwulak xkutankil naq taa'alaaq, ab'anan laj Efraín a'an jun li al kaw xjolom li ink'a' naraj yo'laak sa' xyaalal.

¹⁴ Ma tinkol tab'i' chiru li muqleb'aal kamenaq? Ma twisi tab'i' sa' ruq' li kamk? At kamk, b'ar wank laawankil? B'ar wank laatiq'leb', at muqleb'aal kamenaq? Ink'a' twil xtoq'ob'aal ru laj Efraín.

¹⁵ Us ta laj Efraín taa'atz'umaq jo' li pim, taachalq li tiqwal iq' sa' xjayal releb'l saq'e; taawakliiq chaq sa' li chaqich'och' ut tixchaqihob'resi chixjunileb' li yu'amha' jo'wi' eb' li releb'aal li ha'. Ut taamaq'e'q chixjunil li xb'ihomal jo' ajwi' jo'nimal jwal chaab'il li wank re.

¹⁶ Eb' laj Samaria te'xtoj rix li xmaakeb' xb'aan naq ke'xq'etq'eti rib' chiru li Qaawa' li xYoseb'. Te'kamsije'q chi q'esnal ch'iich', eb' li ralal xk'ajol te'pik'aje'q chiru ch'och' ut eb' li ixq wankeb' sa' yu'am te'jachmanq chi ch'iich'”.