Oseas 12 - Q'eqchi Bible

¹ Eb' laj Efraín maak'a' xyaalal li neke'xb'aanu; rajlal kutan neke'xsik' xtenq'ankileb' sa' jalanil tenamit. Nanumtaak li xtik'ti'eb' ut li elq'ak neke'xb'aanu, neke'xk'e rib' sa' aatin rik'ineb' laj Asiria ut neke'k'amok aseeyt aran Ejiipt”, chan li Yos.

² Li Qaawa' yo chi jitok chirixeb' laj Judá, ut tixk'eheb' chi xtojb'al rix li xmaakeb' laj Jakob, tixk'e xq'ajkamunkileb' jo' chanru li xyehom ut xb'aanuhomeb'.

³ Naq toj maji' nayo'laak, laj Jakob kixmaq' li xb'een alalb'ejil chiru li ras; ut naq winq chik, kiyalok rik'in li Qaawa' Yos.

⁴ Kiyalok rik'in jun li ánjel ut kixq'ax ru, kiyaab'ak ut kirelaji li rusilankil. Moqon chik koxtaw li Yos aran Betel ut ki'aatinak rik'in.

⁵ Li Qaawa' a'an li Nimajwal Yos; a'an Qaawa' naxk'ab'a'in.

⁶ Jo'kan naq laa'ex aj Israel sutq'inqex rik'in leeYos: chexrahoq ut chexwanq sa' tiikilal, ut k'ojk'ooq leech'ool rik'in leeYos chi junelik.

⁷ Xyehom li Qaawa': “Eb' laj Kanahán neke'roksi li b'isleb' ink'a' tz'aqal, ut nawulak chiruheb' li b'alaq'ik.

⁸ Ut eb' laj Efraín neke'xye: «Yaal naq xoob'ihomo'k, naab'al li b'ihomal xqatamresi. Ab'anan maajun taayehoq qe naq xqataw qab'ihomal rik'in b'alaq'ik!».

⁹ Laa'in li Qaawa' leeYos chalen chaq sa' leerelik Ejiipt: toj texink'e wi' chik chi wank sa'eb' li muheb'aal yiib'anb'il rik'in t'ikr, jo' junxil naq kexintaw chaq sa' li chaqich'och'.

¹⁰ Laa'in kin'aatinak rik'ineb' li propeet, k'iila sut kiwaatinaheb' sa' moy u, ut sa' jaljookil ru aatin kexwaatina chi xtz'uumal reheb' a'an.

¹¹ Eb' laj Galahad wankeb' xmaak; jo'kan naq teb'insach. Aran Kilkal neke'mayejak wakax; jo'kan naq li x'artaleb' chanchanaqeb' li pek li neke'kanaak chi tub'tu sa' li awimq”.

¹² Laj Jakob ki'elelik sa' xteepal Aram ut kaw kik'anjelak aran cho'q aj ilol ketomq re naq taak'ehe'q rixaqil.

¹³ Rik'in xtenq'aal jun li propeet li Qaawa' kirisiheb' chaq laj Israel aran Ejiipt ut kixk'aak'aleheb' rik'in xk'anjel jun propeet.

¹⁴ Eb' laj Efraín ke'yoob'ank xjosq'il li Yos; jo'kan naq te'k'ehe'q chi xtojb'al rix li kamsink ke'xb'aanu. Li Qaawa' taareeqaju li maa'usilal ke'xb'aanu.