Oseas 11 - Q'eqchi Bible

Li Qaawa' naxra li xq'etq'et aj tenamit

¹ “Naq toj saaj chaq laj Israel, q'axal kinra, ut toj Ejiipt kinb'oq chaq li walal.

² A'ut naq q'axal kinra, jwal kixnajtob'resi chik rib' wik'in: lintenamit neke'mayejak chiruheb' laj Bahal ut neke'xk'at xpom chiruheb' li jalanil yos.

³ Laa'in kinch'ilo chi ruq' laj Efraín ut kink'ut li b'eek chiru; ab'an ink'a' ke'xtaw ru naq laa'in nin'ilok reheb'.

⁴ Rik'in rahok ut q'unil ch'oolejil kink'ameb' chaq wik'in, chanchanin li naxmutzu li xk'uula'al. Kink'utzub' wib' re xk'eeb'al xwaheb',

⁵ ab'anan ink'a' ke'raj sutq'iik wik'in. Jo'kan naq tento te'sutq'iiq wi' chik Ejiipt, ut eb' laj Asiria te'awab'ejinq sa' xb'eeneb'.

⁶ Sa' li xtenamiteb' taawanq li yalok: te'sache'q eb' li kawub'resinb'il ochoch ut taajuk'iiq chixjunil xb'aan li maa'usilal neke'xk'uub'.

⁷ Lintenamit jwal kaw xch'ooleb' chintz'eqtaanankil; us ta neke'xpatz' xk'ab'a' laj Bahal, ab'an maajun natenq'ank reheb'.

⁸ “Chanru naq tatinkanab', a Efraín? Chanru naq tatintz'eqtaana, a Israel? Ma tatinsach tab'i' jo' xinb'aanu re li tenamit Admá malaj tinb'aanu ta aawe jo' xinb'aanu reheb' laj Seboín xb'aan li xmaa'usilaleb'? Q'axal nayot'e'k li waanm ut namayok linch'ool chawix.

⁹ Ink'a' tatinrahob'tesi xb'aan xxamlel linjosq'il ut ink'a' chik tinsach ruheb' laj Efraín, xb'aan naq laa'in li Yos ut maawa'in winq. Laa'in li Sant sa' eeyanq, ut ink'a' tinchalq chesachb'al”.

¹⁰ A' chik li Qaawa' te'xtaaqe, ut A'an tixjap re jo' naxb'aanu li kaqkoj. Tixjap re, ut chixjunileb' li alalb'ej te'chalq sa' xjayal rokeb'l saq'e chi siksootqeb' xb'aan xxiweb'.

¹¹ “Jo'eb' li kok' xul naq te'chalq chaq Ejiipt, jo'eb' li mukuy naq te'elq chaq Asiria. Ut laa'in teb'ink'e chi hilank sa' li rochocheb'”, chan li Qaawa' Yos.

Chalen chaq sa' xtiklajik aj tik'ti'eb' laj Israel

¹² “Eb' laj Efraín junes tik'ti' neke'xye we, eb' laj Israel junes b'alaq'il na'leb' neke'xk'ut chiwu. A'ut eb' laj Judá toj nikine'xtaaqe, toj kaweb' xch'ool chi paab'ank.