Números 9 - Q'eqchi Bible

Li xninq'ehinkil li Paswa

¹ Li Qaawa' kiraatina laj Moisés sa' li chaqich'och' re Sinaí, sa' li xb'een po re li xkab' chihab' relikeb' chaq laj Israel aran Ejiipt, ut kixye re:

² “Eb' laj Israel te'xninq'ehi li Paswa tz'aqal sa' xkutankil.

³ Te'xninq'ehi sa' li kaalaju xb'e li po a'in, sa' xyanq wiib' saqenk, tz'aqal sa' xq'ehil. Te'xninq'ehi jo' chanru naxye li chaq'rab' ut li waatin”, chan.

⁴ Toja' naq laj Moisés kixye reheb' laj Israel naq te'xninq'ehi li Paswa.

⁵ Ut eb' a'an ke'xninq'ehi li Paswa sa' li chaqich'och' re Sinaí, sa' li kaalaju xb'e li xb'een po, sa' xyanq wiib' saqenk. Eb' laj Israel ke'xb'aanu tz'aqal jo' kiyehe'k re laj Moisés xb'aan li Qaawa'.

⁶ Ab'anan wankeb' winq ke'xmux rib' xb'aan xch'e'b'al junaq kamenaq; jo'kan naq ink'a' ke'ruhank chi xninq'ehinkil li Paswa sa' li kutan a'an. Toja' naq koxe'xk'ut rib' chiru laj Moisés ut laj Aharón sa' ajwi' li kutan a'an

⁷ ut ke'xye reheb': “Xqamux qib' xb'aan xch'e'b'al junaq kamenaq. K'a'ut naq ramro chiqu li mayejak chiru li Qaawa' tz'aqal sa' xkutankil, qochb'eeneb' li qakomon?”, chankeb'.

⁸ Kichaq'ok laj Moisés: “Iib'eniiq wan; xik we chi rab'inkil k'aru tixye li Qaawa' cherix laa'ex”, chan.

⁹ Ut li Qaawa' kiraatina laj Moisés chi jo'ka'in:

¹⁰ “Ye reheb' laj Israel: Wi junaq eere laa'ex malaj junaq leeralal eek'ajol xmuxum rib' xb'aan xch'e'b'al junaq kamenaq, malaj wan chaq sa' xtaqlankil sa' jalan tenamit, a'an ajwi' tixninq'ehi li Paswa sa' xk'ab'a' li Qaawa'.

¹¹ Tixninq'ehi tz'aqal sa' li kaalaju xb'e li xkab' po, sa' xyanq wiib' saqenk. Teetzeka li Paswa rik'in li wa ink'a' yuub'il ut rik'in k'ahil ichaj.

¹² Maak'a' teekanab' re li kutan jun chik, chi moko teetooq junaq xb'aqel li xul. Teeninq'ehi jo' chanru xchaq'rab'il xninq'ehinkil li Paswa.

¹³ Ab'anan wi junaq ink'a' xmuxum rib' ut maab'ar xkoho, ut tixkanab' xninq'ehinkil li Paswa, li winq a'an taa'isiiq sa' xyanqeb' laj Israel. A'an junelik wanq xmaak sa' xb'een, xb'aan naq ink'a' xmayejak chiru li Qaawa' tz'aqal sa' xkutankil.

¹⁴ “Ut wi sa' eeyanq laa'ex wank junaq aj jalan tenamit, a'an ajwi' tento tixninq'ehi li Paswa sa' xk'ab'a' li Qaawa'. Jun paayaq ajwi' li mayejak sa' eeyanq, jo' cho'q re li jalan xtenamit jo' ajwi' cho'q laj ral ch'och'”.

Li Loq'laj Choql

¹⁵ Sa' li kutan naq kixaqab'aak li Loq'laj Na'ajej, kichalk jun li choql sa' xb'een xna'aj li Loq'laj Kaax ut kikanaak aran. Chalen ewu toj eq'la li choql wank sa' xb'een li Loq'laj Na'ajej kama' xam.

¹⁶ Ut kik'ulmank chi jo'kan chi junelik: chi kutan li choql nawank sa' xb'een, ut chiru q'oqyink nak'utunk chanchan xam.

¹⁷ Naq li choql na'elk sa' xb'een li Loq'laj Na'ajej, eb' laj Israel neke'risi li xmuheb'aaleb'; ut sa' li na'ajej b'arwi' nakanaak li choql, aran neke'xyiib' wi' chik li xmuheb'aaleb'.

¹⁸ Li Qaawa' nayehok naq eb' laj Israel te'xik ut A'an ajwi' nayehok naq te'hilanq. Neke'hilank chixjunil li kutan naq li choql toj wank sa' xb'een li Loq'laj Na'ajej.

¹⁹ Jo'kan ajwi' wi li choql nakanaak sa' xb'een li Loq'laj Na'ajej chiru k'iila kutan, eb' laj Israel neke'xroxloq'i li xtaqlahom li Qaawa' ut ink'a' neke'elk.

²⁰ Ab'anan wi li choql ink'a' k'iila kutan nawank sa' xb'een li Loq'laj Na'ajej, li Qaawa' nayehok naq te'hilanq ut A'an ajwi' nayehok naq te'elq.

²¹ Wi li choql nawank sa' xb'een li Loq'laj Na'ajej yal jun q'oqyink, neke'elk aran eq'la ut neke'xik. Wi nawank jun kutan ut jun q'oqyink ut chirix a'an nawakliik eq'la, neke'elk sa' li xna'ajeb'.

²² Ab'anan wi nakanaak sa' xb'een li Loq'laj Na'ajej wiib'aq kutan malaj jun po malaj jun chihab', eb' laj Israel neke'kanaak sa' li xmuheb'aaleb' ut ink'a' neke'elk; ab'an naq na'elk li choql, eb' laj Israel neke'elk.

²³ Li Qaawa' nayehok jo'q'e eb' laj Israel te'elq sa' li xna'ajeb', ut A'an ajwi' nayehok naq te'hilanq. Ut eb' a'in neke'roxloq'i li xtaqlahom li Qaawa', jo' chanru yeeb'il xb'aan li Qaawa' re laj Moisés.