Números 3 - Q'eqchi Bible

Li xk'anjeleb' laj Leví

¹ A'aneb' a'in li ralal xk'ajol laj Aharón ut laj Moisés, sa'eb' li kutan naq li Qaawa' kiraatina laj Moisés sa' li tzuul Sinaí.

² A'aneb' a'in li xk'ab'a'eb' li ralal xk'ajol laj Aharón: laj Nadab, li xb'een al; laj Abihú, laj Elehasar ut laj Itamar.

³ A'an a'in li xk'ab'a'eb' li ralal xk'ajol laj Aharón li sik'b'ileb' ru ut xaqab'anb'ileb' chi k'anjelak cho'q aj tij.

⁴ Laj Nadab ut laj Abihú ke'kamk chiru li Qaawa' naq ke'xmayeja li xam li ink'a' xk'ulub' li Qaawa', sa' li chaqich'och'. Eb' a'an maak'a' ralaleb'; jo'kan naq laj Elehasar ut laj Itamar ke'kanaak cho'q aj tij chiru li xyu'am laj Aharón, li xyuwa'eb'.

⁵ Li Qaawa' kiraatina laj Moisés ut kixye re:

⁶ “Taqla xb'oqb'aleb' li xteepal laj Leví, re naq te'xtenq'a laj Aharón.

⁷ Te'xtenq'a laj Aharón ut te'xb'aanu li tento sa' xb'een chixjunil li komonil chiru li Loq'laj Muheb'aal, rik'in k'anjelak sa' li Loq'laj Na'ajej.

⁸ Eb' a'an te'iloq re li k'a'aq re ru nak'anjelak sa' li Loq'laj Muheb'aal ut te'xb'aanu ajwi' li tento sa' xb'eeneb' laj Israel sa' li Loq'laj Muheb'aal.

⁹ Taaq'axtesiheb' laj Leví re laj Aharón jo' ajwi' reheb' li ralal xk'ajol cho'q xmaataneb': siib'ilaqeb' sa' xk'ab'a'eb' chixjunil laj Israel.

¹⁰ Laj Aharón ut eb' li ralal xk'ajol taaxaqab'eb' chi k'anjelak cho'q aj tij. Wi junaq li maawa' aj tij taanach'oq aran, taakamsiiq”, chan li Qaawa'.

¹¹ Li Qaawa' kixye ajwi' re laj Moisés:

¹² “K'e reetal naq xinsik' ruheb' laj Leví sa' xyanqeb' laj Israel, ruuchileb' chixjunileb' li xb'een ralaleb' laj Israel. Wehaqeb' laj Leví,

¹³ xb'aan naq weheb' chixjunil li xb'een alalb'ej. Sa' li kutan naq kinrahob'tesi chixjunileb' li xb'een ralaleb' laj Ejiipt, kinraheb' cho'q we chixjunileb' li xb'een ralaleb' laj Israel, jo'eb' li winq, jo'kan ajwi' eb' li xb'een ral li ketomq. Weheb' laa'in. Laa'in li Qaawa'”.

¹⁴ Li Qaawa' kiraatina laj Moisés sa' li chaqich'och' re Sinaí ut kixye re:

¹⁵ “Ajlaheb' li ralal xk'ajol laj Leví chi junqkab'alil ut chi teep; taawajlaheb' chixjunileb' li teelom chalen aj junq po”, chan.

¹⁶ Ut laj Moisés kirajlaheb' laj Leví, jo' kiyehe'k re xb'aan li Qaawa'.

¹⁷ Li xk'ab'a'eb' li ralal laj Leví a'aneb' a'in: laj Kersón, laj Kehat ut laj Merarí.

¹⁸ Li xk'ab'a'eb' li ralal laj Kersón sa' li xjunkab'al a'aneb' a'in: laj Libní, ut laj Semehí.

¹⁹ Eb' li ralal laj Kehat sa' li xjunkab'al a'aneb' a'in li xk'ab'a'eb': laj Amrán, laj Isar, laj Hebrón ut laj Usiel.

²⁰ Li xk'ab'a'eb' li ralal laj Merarí sa' li xjunkab'al a'aneb' a'in: laj Majlí ut laj Musí. A'aneb' a'in li xch'uuteb' laj Leví chi junqkab'alil.

²¹ Laj Kersón a'an chaq li xxe'toonil yuwa'eb' laj Libní ut eb' laj Semehí. A'aneb' a'in li xch'uuteb' laj Kersón.

²² Li rajlankil chixjunileb' li teelom chalen aj junq po, a'an wuqub' mil rik'in o'k'aal xkab' o'q'ob' (7,500).

²³ Li xch'uuteb' laj Kersón neke'xyiib' li xmuheb'aaleb' chirix li Loq'laj Muheb'aal, sa' xjayal rokeb'l saq'e.

²⁴ Li xjolomil li xjunkab'al laj Kersón a'an laj Eliasaf, ralal laj Lael.

²⁵ Eb' li ralal xk'ajol laj Kersón a'aneb' li te'iloq re li Loq'laj Muheb'aal, li xmuheel ut li t'ilkem li natz'apok re li okeb'aal sa' li Loq'laj Na'ajej,

²⁶ jo' ajwi' li t'ikr wank chiru li neb'aal ut li t'ikr wank sa' rokeb'aal li neb'aal chi xsutam li Loq'laj Na'ajej ut li artal, jo'wi' chixjunil li xk'aamal nak'anjelak.

²⁷ Laj Kehat a'an chaq li xxe'toonil yuwa'eb' laj Amrán, laj Isar, laj Hebrón ut laj Usiel: a'aneb' a'in li xch'uuteb' laj Kehat.

²⁸ Li rajlankil chixjunileb' li teelom chalen aj junq po, a'an waqxaqib' mil rik'in o'lajuk'aal (8,300). A'aneb' a'in li neke'ilok re li Loq'laj Na'ajej.

²⁹ Li xch'uuteb' laj Kehat neke'xyiib' li xmuheb'aaleb' sa' xjayal xsak'leb' iq', chi xk'atq li Loq'laj Na'ajej.

³⁰ Li xjolomil li xch'uuteb' laj Kehat, a'an laj Elisafán, ralal laj Usiel.

³¹ A'aneb' a'in li neke'ilok re li Loq'laj Kaax, li meex, li xna'aj kanteel, eb' li artal, li k'a'aq re ru li nak'anjelak re loq'onink, li loq'laj t'ikr ut chixjunil li xk'anjelankil a'an.

³² Li najolomink reheb' laj Leví, a'an laj Elehasar, ralal laj Aharón laj tij. A'an li na'ilok reheb' chixjunil laj k'anjel sa' li Loq'laj Na'ajej.

³³ Laj Merarí a'an chaq li xxe'toonil yuwa'eb' laj Majlí ut eb' laj Musí: a'aneb' a'in li xch'uuteb' laj Merarí.

³⁴ Li rajlankil chixjunileb' li teelom chalen aj junq po, a'an waqib' mil rik'in lajeek'aal (6,200).

³⁵ Li xjolomil li xch'uuteb' laj Merarí a'an laj Suriel, ralal laj Abijahil. Neke'xyiib' li xmuheb'aaleb' chi xk'atq li Loq'laj Na'ajej, sa' xjayal releb'l iq'.

³⁶ Eb' li ralal xk'ajol laj Merarí a'aneb' li neke'ilok re li xtz'alamche'il li Loq'laj Na'ajej, eb' li tz'amb'a, eb' li oqech, li neke'k'ochlaak wi' ut chixjunil li k'a'aq re ru nak'anjelak re li Loq'laj Na'ajej,

³⁷ jo' ajwi' eb' li oqech nasutmank wi' li neb'aal, eb' li neke'k'ochlaak wi', eb' li neke'chapmank wi' sa' ch'och' ut eb' li xk'aamal.

³⁸ Sa' xjayal releb'l saq'e neke'xyiib' li xmuheb'aaleb' laj Moisés ut laj Aharón rochb'eeneb' li ralal. A'aneb' a'in li neke'ilok re li Loq'laj Na'ajej sa' xk'ab'a'eb' laj Israel. Wi junaq na'ok aran chi maawa' aj tij, taakamsiiq.

³⁹ Li xk'ihaleb' chixjunileb' laj Leví, chalen aj junq po, naq ke'ajlaak xb'aan laj Moisés jo' kiyehe'k re xb'aan li Qaawa', a'an wiib' xka'k'aal mil tz'aqal (22,000).

⁴⁰ Li Qaawa' kixye re laj Moisés: “Ajlaheb' chixjunileb' li xb'een ralaleb' laj Israel, chalen aj junq po, ut taatz'iib'a xk'ab'a'eb'.

⁴¹ Chirix chik a'an, taaq'axtesiheb' cho'q we li Qaawa' eb' laj Leví, cho'q ruuchileb' chixjunil li xb'een ralaleb' laj Israel. Jo'kan ajwi' taaq'axtesi cho'q we li xketomq eb' laj Leví, cho'q ruuchileb' li xb'een ralaleb' laj Israel. Jo'kan ajwi' taaq'axtesi cho'q we li xketomq eb' laj Leví cho'q ruuchileb' li xb'een ral chixjunileb' li xketomq eb' laj Israel”, chan.

⁴² Laj Moisés kirajlaheb' chixjunileb' li xb'een ralaleb' laj Israel, jo' chanru kiyehe'k re xb'aan li Qaawa'.

⁴³ Ut kik'eemank reetal naq li xk'ihaleb' chixjunileb' li xb'een alalb'ej chalen aj junq po, a'an wiib' xka'k'aal mil rik'in oxlaju xkaalajuk'aal (22,273).

⁴⁴ Toja' naq li Qaawa' kixye re laj Moisés:

⁴⁵ “Q'axtesiheb' we eb' laj Leví cho'q ruuchileb' chixjunil li xb'een ralaleb' laj Israel. Jo'kan ajwi' q'axtesi we li xketomq eb' laj Leví cho'q ruuchileb' li xketomq eb' laj Israel, xb'aan naq wehaqeb' laj Leví. Laa'in li Qaawa'.

⁴⁶ Ab'anan eb' li xb'een ralaleb' laj Israel jwal naab'aleb' chiruheb' laj Leví. Jo'kan naq, cho'q reeqaj li oxlaju xkaalajuk'aal (273) li neke'xq'ax xk'ihaleb' laj Leví,

⁴⁷ taaxok o'otq chi tumin sa' xk'ab'a' li junjunq aj Israel, sa' li Loq'laj Na'ajej, jo' chanru li xtz'aq chi plaatil.

⁴⁸ Taak'e li plaat re laj Aharón ut reheb' li ralal, sa' xk'ab'a' naq numtajenaqeb' wi' chik xk'ihaleb' laj Leví”, chan li Qaawa'.

⁴⁹ Tojo' naq laj Moisés kixxok li tumin xtojeb' li xk'ihaleb' laj Israel chiruheb' laj Leví.

⁵⁰ Kixxok oob' xb'eleek'aal xka o'q'ob' (1,365) chi plaat sa' xk'ab'a' li xb'een ralaleb' laj Israel, jo' chanru li b'isleb' wank sa' li Loq'laj Na'ajej.

⁵¹ Ut laj Moisés kixq'axtesi li tumin re laj Aharón ut reheb' li ralal, jo' chanru kiyehe'k re xb'aan li Qaawa'.