Números 24 - Q'eqchi Bible

¹ Laj Balaham kixk'e reetal naq li Qaawa' nawulak chiru rosob'tesinkileb' laj Israel. Jo'kan naq ink'a' chik koho chi q'ehink jo' kixb'aanu ka' sut; tik ki'ilok b'an chik sa' xjayal li chaqich'och'.

² Ut sa' xtaqsinkil li rilob'aal, laj Balaham kirileb' li xmuheb'aaleb' laj Israel ch'utch'uukeb' chi teep. Toja' naq li xmusiq' li Qaawa' ki'ok rik'in

³ ut kixb'icha eb' li uutz'u'ujinb'il ru aatin a'in: “A'an a'in raatin laj Balaham, ralal laj Pehor, raatin li winq li na'ilok chi cham jo' propeet.

⁴ Raatin li ani narab'i li naxye li Qaawa', ut naril li xk'utb'esihom li Nimajwal; raatin li ani nak'uluk choxahil na'leb', ut sa' moy u nateemank xsa'eb' li ru.

⁵ Q'axal ch'ina'useb' laamuheb'aal, a Jakob, jwal xchaq'al ruheb' laana'aj, a Israel!

⁶ Chanchaneb' xnimal ru taq'a, jo' tawi' xna'ajeb' li awimq chire li nima', jo'eb' li kala' awb'ileb' xb'aan li Qaawa', chanchaneb' li yaw chire ha'.

⁷ Wanq tz'aqal li xha'eb'; tz'aqalaq re te'ruk' ut te'xt'aqresi li rawimqeb'. Li awab'ej re Israel taa'awab'ejinq sa' xb'een laj Agag, ut nimaq xwankil li x'awab'ejihom.

⁸ Li Yos ki'isink chaq reheb' sa' li na'ajej Ejiipt, jo' jun josq' aj b'ooyx li wank sa' k'iche'. Tixtiweb' li xik' neke'ilok re ut tixtoqi li xb'aqeleb'.

⁹ Nahilank ut nawark, jo' li kaqkoj. Ani taawaklesinq re? Osob'tesinb'ilaq li taa'osob'tesinq aawe! Majewanb'ilaq li taamajewanq aawe!”.

¹⁰ Naq kirab'i a'in, k'ajo' naq kijosq'o'k laj Balak rik'in laj Balaham; kixt'otzt'otzi chi kaw ut kixye re: “Xatinb'oq chaq re xmajewankileb' li xik' neke'ilok we, ab'an laa'at xawosob'tesiheb' oxib' sut.

¹¹ Tikaq ayu sa' laatenamit! Xinye aawe naq tatinq'ajkamu raj chi chaab'il, ab'an li Qaawa' xmaq' chawu a'an”, chan.

¹² Kichaq'ok laj Balaham ut kixye re laj Balak: “Ma ink'a' tab'i' xinye reheb' laataql li xe'wulak wik'in:

¹³ «Us ta laj Balak tixq'axtesi we li rochoch nujenaq chi plaat ut oor, ink'a' truuq tinq'etq'eti wib' chiru li xtaqlahom li Qaawa'. Maak'a' tinb'aanu injunes, us ta chaab'il, us ta ink'a'. Li k'aru tixye we li Qaawa' a'an li tinye», chankin chaq reheb'.

Li xka raatin laj Balaham

¹⁴ “Us b'i', xik we anaqwan sa' lintenamit. Kim ut tinye aawe li k'aru te'xb'aanu aawe li tenamit a'in chiruheb' li kutan chaalel”, chan laj Balaham.

¹⁵ Toja' naq laj Balaham kixb'icha eb' li uutz'u'ujinb'il aatin a'in ut kixye: “A'an a'in li raatin laj Balaham, ralal laj Pehor; a'in li raatin li winq li na'ilok chi cham jo' propeet.

¹⁶ Raatin li ani narab'i li naxye li Qaawa', ut naxnaw li xnimal xk'a'uxl li Nimajwal. Raatin li ani naril li xk'utb'esihom li Nim Xwankil, nak'uluk choxahil na'leb', ut sa' moy u nateemank xsa'eb' li ru.

¹⁷ Wank k'aru nawil, us ta maji' ch'olch'o chi us anaqwan; nink'e reetal chi maji' nanach'ok chi us: jun chahim xwakliik chaq rik'in laj Jakob, xaqxo xwankil jun li awab'ej sa' xyanqeb' laj Israel. A'an tixsach ruheb' laj Mohab ut tixputz'i xjolomeb' li ralal xk'ajol laj Set.

¹⁸ Taareechaniheb' laj Edom ut eb' laj Seír. K'ajo' naq taanimanq xwankil laj Israel.

¹⁹ Laj Jakob tixq'ax ruheb' li xik' neke'ilok re, tixsach ruheb' li neke'elelik sa' li tenamit Ar”.

²⁰ Chirix chik a'an laj Balaham kiril laj Amalek ut ki'aatinak jo' propeet; kixye: “Laj Amalek, a'an li xb'een tenamit; ab'anan taa'oso'q chi junajwa”, chan.

²¹ Kirileb' laj Ken ut ki'aatinak wi' chik jo' propeet; kixye chi jo'ka'in: “Kaw k'ojk'o laamuheb'aal, a Kaín; xatkab'lak sa' li saqoonak.

²² Ab'anan li ochoch a'an re laj Pehor. Jo' najtil chik wanqat rub'el xwankil laj Asur?”, chan.

²³ Chirix chik a'an ki'aatinak wi' chik jo' propeet ut kixye: “Ani tawi' taakanaaq chi yo'yo naq li Qaawa' tixb'aanu chixjunil a'in?

²⁴ Te'chalje'q poych'iich' toj Kitim, ut te'xrahob'tesi eb' laj Asur ut eb' laj Eber, ab'anan eb' a'an ajwi' te'oso'q chi junajwa”, chan.

²⁵ Chirix chik a'an kiwakliik laj Balaham ut kisutq'iik sa' li xtenamit. Jo'kan ajwi' laj Balak kisutq'iik wi' chik sa' li xb'e.