Números 2 - Q'eqchi Bible

Li xmuheb'aaleb' laj Israel

¹ Li Qaawa' kiraatinaheb' laj Moisés ut laj Aharón ut kixye reheb':

² “Eb' laj Israel te'xyiib' li xmuheb'aaleb' chi teep, rub'el reetalil li junjunq, rub'el reetalil li xteepaleb' li xyuwa'eb', chi xsutam li Loq'laj Muheb'aal ut najt b'ayaq rik'in.

³ “Eb' li te'xyiib' xmuheb'aaleb' sa' xjayal releb'l saq'e, a'an li xteepal laj Judá, chi ch'uut, rub'el li reetalileb'. Li xjolomileb' a'an laj Najsón, ralal laj Aminadab.

⁴ Li rajlankileb' li jun ch'uut a'in, a'an kaalaju xkaak'aal mil rik'in lajeek'aal xkab' o'q'ob' (74,600).

⁵ Chi xk'atqeb' a'an, te'xyiib' li xmuheb'aaleb' li xteepal laj Isakar. Li xjolomil xteepal laj Isakar a'an laj Natanael, ralal laj Swar.

⁶ Li rajlankileb' li jun ch'uut a'in, a'an kaalaju roxk'aal mil rik'in jun o'q'ob' (54,400).

⁷ Li xjolomil eb' li ralal xk'ajol laj Sabulón, a'an laj Eliab, ralal laj Jelón.

⁸ Li rajlankileb' li jun ch'uut a'in, a'an wuqlaju roxk'aal mil rik'in jun o'q'ob' (57,400).

⁹ Li rajlankileb' chixjunil li wankeb' sa' xmuheb'aaleb' laj Judá, chi ch'uut, a'an waqib' xlajeek'aal mil rik'in jun o'q'ob' (186,400). A'aneb' li te'xik chi uub'ej naq te'xjal li xna'ajeb'.

¹⁰ “Eb' li te'xyiib' xmuheb'aaleb' sa' xjayal rokeb'l iq', a'an li xteepal laj Rubén, chi ch'uut, rub'el li reetalileb'. Li xjolomileb' a'in, a'an laj Elisur, ralal laj Sedewr.

¹¹ Li rajlankileb' li jun ch'uut a'in, a'an waqib' roxk'aal mil rik'in o'k'aal xkab' o'q'ob' (46,500).

¹² Chi xk'atqeb' a'an, te'xyiib' li xmuheb'aaleb' li xteepal laj Simehón. Li xjolomileb' li ralal xk'ajol laj Simehón a'an laj Salumiel, ralal laj Surisaday.

¹³ Li rajlankileb' li jun ch'uut a'in, a'an b'eleelaju roxk'aal mil rik'in o'lajuk'aal (59,300).

¹⁴ Li xjolomil eb' li ralal xk'ajol laj Gad a'an laj Eliasaf, ralal laj Rewel.

¹⁵ Li rajlankileb' li jun ch'uut a'in, a'an oob' roxk'aal mil rik'in lajeeb' roxlajuk'aal xkab' o'q'ob' (45,650).

¹⁶ Li rajlankileb' chixjunileb' li wankeb' sa' xmuheb'aaleb' laj Rubén, chi ch'uut, a'an junlaju xwaqxaqk'aal mil rik'in lajeeb' roxk'aal xkab' o'q'ob' (151,450). A'aneb' li te'xik sa' xkab' ch'uutal naq te'xjal li xna'ajeb'.

¹⁷ “Toja' naq taak'ame'q li Loq'laj Muheb'aal rochb'een li xmuheb'aaleb' laj Leví, xb'aan naq eb' a'in wankeb' sa' xyiheb' li ralal xk'ajol laj Israel. Jo' chanru naq ke'xk'ojob' li xmuheb'aaleb', jo'kan ajwi' naq te'xik, li junq teep wanqeb' rub'el li reetalileb'.

¹⁸ “Sa' xjayal rokeb'l li saq'e te'xyiib' xmuheb'aaleb' li ralal xk'ajol laj Efraín, chi ch'uut, rub'el li reetalileb'. Li xjolomileb' a'in, a'an laj Elisamá, ralal laj Amiud.

¹⁹ Li rajlankileb' li jun ch'uut a'in, a'an ka'k'aal mil rik'in o'k'aal xkab' o'q'ob' (40,500).

²⁰ Chi xk'atqeb' a'an, te'xyiib' li xmuheb'aaleb' li xteepal laj Manasés. Li xjolomil eb' li ralal xk'ajol laj Manasés, a'an laj Gamaliel, ralal laj Pedasur.

²¹ Li rajlankileb' li jun ch'uut a'in, a'an kab'laju xka'k'aal rik'in lajeek'aal (32,200).

²² Li xjolomileb' li ralal xk'ajol laj Benjamín, a'an laj Abidán, ralal laj Kidehoní.

²³ Li rajlankileb' li jun ch'uut a'in, a'an o'laju xka'k'aal mil rik'in jun o'q'ob' (35,400).

²⁴ Li rajlankileb' chixjunileb' li wankeb' sa' xmuheb'aaleb' laj Efraín, chi ch'uut, a'an waqxaqib' xwaqk'aal mil rik'in o'k'aal (108,100). A'aneb' li te'xik sa' rox ch'uutal naq te'xjal li xna'ajeb'.

²⁵ “Sa' xjayal releb'l iq', te'xyiib' xmuheb'aaleb' li ralal xk'ajol laj Dan, chi ch'uut, rub'el li reetalileb'. Li xjolomil li teep a'in, a'an laj Ajieser, ralal laj Amisaday.

²⁶ Li rajlankileb' li jun ch'uut a'in, a'an wiib' xkaak'aal mil rik'in o'lajuk'aal xkab' o'q'ob' (62,700).

²⁷ Chi xk'atqeb' a'an, te'xyiib' xmuheb'aaleb' li xteepal laj Aser. Li xjolomileb' li ralal xk'ajol laj Aser, a'an laj Pakiel, ralal laj Okrán.

²⁸ Li rajlankileb' li jun ch'uut a'in, a'an jun roxk'aal mil rik'in o'k'aal xkab' o'q'ob' (41,500).

²⁹ Li xjolomileb' li ralal xk'ajol laj Neftalí, a'an laj Ajirá, ralal laj Enán.

³⁰ Li rajlankileb' li jun ch'uut a'in, a'an oxlaju roxk'aal mil rik'in jun o'q'ob' (53,400).

³¹ Li rajlankileb' chixjunil li wankeb' sa' xmuheb'aaleb' laj Dan, chi ch'uut, a'an wuqlaju xwaqxaqk'aal mil rik'in lajeek'aal xkab' o'q'ob' (157,600). A'aneb' li te'xik chi ixb'ej, rub'el li reetalileb', naq te'xjal li xna'ajeb'”, chan li Qaawa'.

³² A'an a'in xk'ihaleb' laj Israel li ke'ajlaak, chi teep ut chi xjunqkab'alileb' li xyuwa'eb'. Li xk'ihal chixjunileb' li winq ke'ajlamank re yalok, a'an oxib' xjunlajuk'aal mil rik'in lajeeb' xwaqxaqk'aal xkab' o'q'ob' (603,550).

³³ A'ut eb' laj Leví ink'a' ke'k'ehe'k sa' ajl sa' xyanqeb' laj Israel, jo' xyehom li Qaawa' re laj Moisés.

³⁴ Eb' laj Israel ke'xb'aanu chixjunil jo' tz'aqal kixye li Qaawa' re laj Moisés: li junjunq kixyiib' li xmuheb'aal rub'el li reetalil li xteepal ut, naq ki'elk, koho rochb'een li xch'uutal ut li xjunkab'al.