Números 17 - Q'eqchi Bible

¹ Li Qaawa' kiraatina laj Moisés ut kixye re:

² “Aatinaheb' laj Israel ut ye reheb' naq chi xjunqalileb' li xjolomileb' li junq teep te'xk'am chaq junjunq xxuq'eb' sa' xk'ab'a'eb' li xjunqkab'al: te'xk'e aawe kab'laju chi xuq'. Taatz'iib'a xk'ab'a'eb' li junjunq chiru li xuq'.

³ Chiru li xxuq' laj Leví, taatz'iib'a li xk'ab'a' laj Aharón xb'aan naq a'an li xjolomil li xteepaleb' laj Leví.

⁴ Taakanab'eb' sa' li Loq'laj Muheb'aal, chiru li Loq'laj Kaax, b'arwi' junelik nin'aatinak aawik'in.

⁵ Li winq taatuxmeq li xxuq', a'an li sik'b'il ru inb'aan. Chi jo'kan eb' laj Israel te'xkanab' eewech'b'al”, chan li Qaawa'.

⁶ Laj Moisés kixye a'in reheb' laj Israel ut li junjunq chi xjolomil li junq teeq kixq'axtesi li xxuq': kab'laju chi xuq' ke'xk'e sa' xk'ab'a'eb' li kab'laju chi teep. Sa' xyanqeb' li xuq' a'an wank ajwi' li xxuq' laj Aharón.

⁷ Ut laj Moisés kixkanab'eb' li xuq' chiru li Qaawa' sa' li Loq'laj Muheb'aal.

⁸ Chiru li kutan jun chik, naq ki'ok laj Moisés sa' li Loq'laj Muheb'aal, kixk'e reetal naq li xxuq' laj Aharón, ruuchil li xteepaleb' laj Leví, xtuxmek chik: ki'atz'umak ut ki'uuchink.

⁹ Toja' naq laj Moisés kirisi chixjunileb' li xuq' chiru li Qaawa' ut kixk'ut chiruheb' laj Israel; eb' a'in ke'ril ut li junjunq kixxok li xxuq'.

¹⁰ Toja' naq li Qaawa' kixye re laj Moisés: “K'e wi' chik li xxuq' laj Aharón chiru li Loq'laj Kaax; chak'uula aran cho'q reetalil chiruheb' li q'etq'eteb'; chi jo'kan ink'a' chik te'wech'inq chiwix, ut ink'a' te'kamq”, chan.

¹¹ Laj Moisés kixb'aanu jo' kiyehe'k re xb'aan li Qaawa';

¹² ab'an eb' laj Israel ke'xye re laj Moisés: “Xoo'oso'k chiqajunilo; chiqajunilo tookamq!

¹³ Yalaq ani taajiloq chi xk'atq li xLoq'laj Muheb'aal li Qaawa', taakamq. Ma tookamq chiqajunilo?”, chankeb'.