Números 10 - Q'eqchi Bible

Eb' li tronpeet

¹ Li Qaawa' kixye re laj Moisés:

² “Yiib' wiib'aq tronpeet rik'in plaat li tenb'ilaq chi chaab'il. Taak'anjelaq aawe re xb'oqb'aleb' li komonil ut re xyeeb'al reheb' naq te'xik.

³ Naq te'yaab'asiiq xkab'ichaleb' li tronpeet, chixjunil li komonil te'xch'utub' rib' chak'atq chiru li Loq'laj Na'ajej.

⁴ Ab'an naq jun ajwi' taayaab'asiiq, te'xch'utub' rib' chak'atq ka'ajwi' li xjolomileb' li xch'uuteb' laj Israel.

⁵ Naq li tronpeet taayaab'asiiq chi yo'oon, te'elq li wankeb' xmuheb'aal sa' xjayal releb'l saq'e.

⁶ Naq taayaab'asiiq chi yo'oon sa' xka'sutil, te'elq li wankeb' xmuheb'aal sa' xjayal xsak'leb' iq'. Taayaab'asiiq chi yo'oon xyaab' li tronpeet re naq te'xik;

⁷ a'ut, naq taa'uxq ch'utub'aj ib', taayaab'asiiq li tronpeet yal jun tiikaj.

⁸ Eb' laj tij, li ralaleb' laj Aharón, a'aneb' li te'yaab'asinq reheb' li tronpeet. Ut a'inaq jun chaq'rab' chi junajwa cho'q eere ut cho'q reheb' leeralal eek'ajol.

⁹ “Naq akaq wanqex sa' leech'och' ut texxik chi yalok rik'ineb' li xik' neke'ilok eere, yaab'asihomaq li tronpeet chi yo'oon xyaab'; chi jo'kan texjultiko'q re li Qaawa' leeYos ut texxkol chiruheb' li xik' neke'ilok eere.

¹⁰ Sa' xkutankil li sahil ch'oolej, sa'atqeb' leeninq'e ut sa' xyo'lajikeb' li po, yaab'asihomaq li tronpeet sa' xhonalil xk'atb'al leemayej ut xq'axtesinkil leeyeechi'om re li k'amok ib' sa' usilal rik'in li Yos. Chi jo'kan texjultiko'q re li Qaawa'. Laa'in li Qaawa', leeYos”.

Xtiklajik li xb'eheb' laj Israel sa' li chaqich'och'

¹¹ Sa' li junmay xb'e li xkab' po, re li xkab' chihab', li choql ki'elk sa' xb'een li Loq'laj Na'ajej

¹² ut eb' laj Israel ke'elk sa' li chaqich'och' re Sinaí. Li choql koxxaqliiq toj sa' li chaqich'och' re Parán.

¹³ Sa' li kutan a'an koheb' chi uub'ej jo' yeeb'il xb'aan li Qaawa' re laj Moisés,

¹⁴ k'amol b'e li xb'anteereb' li ralal xk'ajoleb' laj Judá li wankeb' chi ch'uutal. Laj Najsón, ralal laj Aminadab, a'an li najolomink reheb';

¹⁵ li xteepaleb' laj Isakar, k'amol b'e laj Natanael, ralal laj Swar;

¹⁶ ut li xteepaleb' laj Sabulón, k'amol b'e laj Eliab, ralal laj Jehón.

¹⁷ Toja' naq eb' li ralal xk'ajol laj Kersón ut eb' laj Merarí ke'xb'oq' li loq'laj Na'ajej ut ke'xk'am.

¹⁸ Chirix chik a'an ke'elk li xteepaleb' laj Rubén, chi ch'uutal, k'amol b'e laj Elisur, ralal laj Sedewr;

¹⁹ li xteepaleb' laj Simehón, k'amol b'e laj Salumiel, ralal laj Surisaday;

²⁰ ut li xteepaleb' laj Kad, k'amol b'e laj Eliasaf, ralal laj Rewel.

²¹ Toja' naq ke'elk eb' laj Kehat li ke'k'amok re chixjunileb' li k'anjelob'aal. Naq neke'wulak sa' li na'ajej neke'xik wi', ak xaqab'anb'il chik li Loq'laj Na'ajej.

²² Chirix chik a'an ke'elk eb' li ralal xk'ajol laj Efraín, chi ch'uutal, k'amol b'e laj Elisamá, ralal laj Amiud;

²³ li xteepaleb' laj Manasés, k'amol b'e laj Gamaliel;

²⁴ ut li xteepaleb' laj Benjamín, k'amol b'e laj Abidán, ralal laj Kidehoní.

²⁵ Moqon chik ke'elk li xkomoneb' li teep, ut chirix a'an eb' li neke'xik rub'el xb'anteereb' laj Dan, chi ch'uutal: k'amol b'e laj Ajieser, ralal laj Amisaday;

²⁶ li xteepaleb' laj Aser, k'amol b'e laj Pakiel, ralal laj Okrán;

²⁷ ut li xteepaleb' laj Neftalí, k'amol b'e laj Ajirá, ralal laj Enán.

²⁸ Jo'ka'in naq ke'elk chi tustu ut chi ch'uut eb' laj Israel.

²⁹ Sa' jun kutan laj Moisés kixye re laj Jobab li xb'alk, ralal laj Rewel, aj Madián: “Laa'o xik qe sa' li na'ajej kixyeechi'i qe li Qaawa'. Kim chiqix ut sa tatwanq sa' qayanq, xb'aan naq li Qaawa' kixye naq sa te'wanq laj Israel”, chan.

³⁰ Kichaq'ok laj Jobab: “Ink'a' tinxik cherix, tinsutq'iiq b'an sa' lintenamit ut sa' xyanqeb' linkomon”, chan.

³¹ Kixye wi' chik laj Moisés re: “B'aanu usilal, moohaakanab'. Laa'at nakanaw chi us eb' li na'ajej sa' li chaqich'och' b'arwi' naru toohilanq. Laa'at tatk'amoq b'e chiqu.

³² Wi tatxik chiqix, tattz'aqonq sa' li sahilal toorusila wi' li Qaawa'”, chan laj Moisés.

³³ Jo'kan naq ke'elk sa' li xtzuul li Qaawa', ut oxib' kutan ke'b'eek. Li xLoq'laj Kaaxil li Sumwank k'amol b'e chiruheb', chiru li oxib' kutan, yo xsik'b'al b'ar naru te'hilanq.

³⁴ Ut chi kutan li xchoql li Qaawa' rochb'eeneb' chalen naq ke'elk sa' li xna'ajeb'.

³⁵ Naq na'elk li Loq'laj Kaax, laj Moisés naxye: “Xaqlin, at Qaawa'! Che'xcha'chali ta rib' eb' li xik' neke'ilok aawe; che'eleliq li neke'tz'eqtaanank aawe”, chan.

³⁶ Ut naq li Loq'laj Kaax nahilank, laj Moisés naxye: “At Qaawa', sutq'in chaq sa' xyanqeb' li k'iila o'q'ob' chi aj Israel”.