Nehemías 8 - Q'eqchi Bible

Laj Esdras kiril xsa' li Santil Hu chiruheb' li tenamit

¹ Sa' xwuq li po chixjunil li tenamit ke'xch'utub' rib' sa' junajil sa' li neb'aal li wank chire li Okeb'aal reheb' laj b'eelahom ha', ut ke'xye re laj Esdras laj tz'iib' naq tixk'am chaq xhuhil li xChaq'rab' laj Moisés li xk'ehom li Yos re te'xpaab' eb' laj Israel.

² Sa' li xb'een kutan re li xwuq po laj Esdras laj tij kixk'am chaq xHuhil li xChaq'rab' li Qaawa' chiru li komonil, ch'utch'uukeb' aran jo' winq, jo' ixq ut li jo'k'ihaleb' te'ruhanq chi xtawb'al xyaalal.

³ Chalen hik'ho toj tuqtu wa'leb' kixyaab'asi xsa' li hu chiruheb' li winq, li ixq ut chixjunileb' li wankeb' xna'leb', sa' li neb'aal li wank chiru li Okeb'aal reheb' laj b'eelahom ha'. Q'es xxikeb' chixjunil li tenamit chi rab'inkil li xHuhil li Chaq'rab'.

⁴ Laj Esdras laj tz'iib' wank chi xaqxo sa' xb'een jun li na'ajej najt xteram, li ke'xyiib' rik'in che' cho'q re li k'anjel a'an. Chi xk'atq laj Esdras wankeb' sa' xnim: laj Matatías, laj Sema, laj Anaías, laj Urías, laj Jilkías ut laj Mahasías; ut sa' xtz'e wankeb': laj Pedaías, laj Misael, laj Malkías, laj Jasún, laj Jasbadaná, laj Sakarías ut laj Mesulán.

⁵ Toja' naq laj Esdras, li wank taqe'q, kixte li hu chiru chixjunil li tenamit, ut naq kixte li hu, ke'xaqliik chixjunileb'.

⁶ Laj Esdras kixnima li Qaawa' li Nimajwal Yos, ut chixjunil li tenamit ke'xtaqsi li ruq'eb' ut ke'sumenk chi jo'ka'in: “Amén, amén!”, chankeb'. Chirix chik a'an ke'xhupub' rib' ut ke'xloq'oni ru li Qaawa'.

⁷ Ut eb' laj Leví ke'xtikib' xch'olob'ankil xyaalal li Chaq'rab' chiruheb' li poyanam li toj xaqxookeb' sa' xna'ajeb'. A'aneb' a'in li xk'ab'a'eb' laj Leví: laj Josué, laj Baní, laj Serebías, laj Yamín, laj Akub, laj Sabtay, laj Hodías, laj Mahasías, laj Kelitá, laj Asarías, laj Josabad, laj Janán ut laj Pelaías.

⁸ Ke'xyaab'asi xsa' xHuhil li xChaq'rab' li Yos chi raqal ut ke'xch'olob' sa' raatinob'aaleb' re naq taatawmanq ru li xyaab'asimank.

⁹ Toja' naq chixjunil li tenamit ke'ok chi yaab'ak naq ke'rab'i li aatin li wank sa' li Chaq'rab'. Ut laj Nehemías laj taqlanel sa' xb'een li tenamit, laj Esdras laj tij ut laj tz'iib', ut eb' laj Leví li yookeb' chi ch'olob'ank chiru chixjunileb' li tenamit, ke'xye: “Li kutan a'in jwal loq' ut q'axtesinb'il cho'q re li Qaawa' leeYos. Miraho'k leech'ool ut mexyaab'ak”, chankeb'.

¹⁰ Laj Esdras kixye ajwi': “Ayuqex ut tzekahomaq li k'aru jwal chaab'il, uk'anqex ut taqlahomaq jun wa'alaq xtzekemqeb' li maak'a' wankeb' re. Xb'aan naq jwal loq' li kutan a'in ut q'axtesinb'il cho'q re li Qaawa' li qaYos. Miraho'k leech'ool, xb'aan naq li sahil ch'oolej li nachalk rik'in li Qaawa' a'an li xkawub' leech'ool”.

¹¹ Eb' laj Leví ajwi' ke'xk'ojob' xch'ooleb' li poyanam rik'in xyeeb'al: “Jwal loq' li kutan a'in. Mexchoqink ut miraho'k leech'ool”.

¹² Toja' naq chixjunileb' koheb' chi wa'ak ut chi uk'ak, chi xwotzb'al li xtzekemqeb' ut xb'aanunkil jun nimla ninq'e, xb'aan naq ke'xtaw ru li aatin ke'tzole'k wi'.

Li xNinq'eheb' li Muheb'aal

¹³ Sa' li kutan jun chik, chixjunileb' li xjolomileb' junqkab'al aj Israel, eb' laj tij ut eb' laj Leví ke'xch'utub' rib' rik'in laj Esdras laj tz'iib' re xtawb'al ru chi us chixjunil li naxye li Chaq'rab'.

¹⁴ Ut ke'xtaw chi tz'iib'anb'il naq li Qaawa' kixye re laj Moisés naq eb' laj Israel tento te'wanq sa' kok' muheb'aal naq te'ninq'ehiq sa' xwuq li po.

¹⁵ Tikto ke'xtaqla resil aran Jerusalén ut sa'atqeb' chixjunil li tenamit: “Ayuqex sa' pim ut k'amomaq chaq ruq' oliiw, ruq' waa'uut, ruq' mirto, xxaq kala' ut eb' chik li che' k'ajo' ruq', re xyiib'ankil li kok' muheb'aal jo' tz'iib'anb'il sa' li Chaq'rab'”, chankeb'.

¹⁶ Toja' naq koheb' li poyanam ut ke'xk'am chaq ruq'eb' li che' re xyiib'ankil li xkok' muheb'aaleb': wan ke'xyiib' sa' xtaqeq'il li ochoch, wan sa' li neb'aal; wankeb' ajwi' ke'xyiib' sa' li neb'aal re li rochoch li Yos jo' ajwi' chiru li Okeb'aal reheb' laj b'eelahom ha'; wankeb' chik ke'xyiib' li kok' muheb'aal chiru li Okeb'aal re laj Efraín.

¹⁷ Chixjunil li komonil li wanjenaqeb' chaq Babilonia, ke'xyiib' kuukil ochoch ut ke'hilank chisa' chi k'ajo'eb' xsahilal xch'ooleb', xb'aan naq chalen sa'eb' li kutan naq kiwank laj Josué, ralal laj Nun, maajun sut ke'xb'aanu chi jo'kan.

¹⁸ Chiru wuqub' kutan ke'ninq'ehik; ut chalen sa' li xb'een kutan toj sa' xraqik, li ninq'e laj Esdras kixyaab'asi xsa' li xHuhil xChaq'rab' li Yos. Ut sa' xwaqxaq li kutan kiwank jun nimla ch'utam jo' chanru chaq'rab'inb'ileb' wi'.