Nehemías 5 - Q'eqchi Bible

Laj Nehemías kixq'useb' li b'ihom

¹ Sa'eb' li kutan a'an naab'aleb' li winq rochb'een li rixaqileb' ke'ok chi xwech'b'al rixeb' li rech tenamitul.

² Wankeb' ke'yehok: “Naab'alo laa'o qochb'een li qalal qak'ajol. Aajel ru naab'al li triiw re naq tootzekanq ut ink'a' tookamq”.

³ Wankeb' chik ke'yehok: “Xb'aan li we'ej xqak'e li qach'och', li qawimq ut li qochoch cho'q reeqaj li tumin re xloq'b'al li triiw”.

⁴ Ut wan wi' chik ke'yehok: “Xqapatz' qatumin chi to' re xk'eeb'al li toj re li awab'ej, ut a' li qach'och' ut li qawimq xqak'e cho'q reeqaj li tumin.

⁵ Laa'o qakomon qib' rik'ineb' li qech tenamitul, ut juntaq'eet xloq'aleb' li qalal qak'ajol rik'ineb' li ralal xk'ajoleb' a'an. Ab'anan tento tqaq'axtesi eb' li qalal qak'ajol cho'q xmooseb' a'an. Ut wankeb' qarab'in ak xqak'ayeb' cho'q xmooseb' a'an, ut laa'o maak'a' naru tqab'aanu xb'aan naq li qach'och' ut li qawimq jalan aj e”.

⁶ K'ajo' naq kichalk injosq'il naq kiwab'i li wech'ij ib' a'an ut li xyaab' xkuxeb'.

⁷ Kink'oxla chi us k'aru tinb'aanu ut kinq'useb' li xninqaleb' ru winq ut eb' laj k'amol b'e xb'aan li iiq ke'xteneb' sa' xb'eeneb' li rech tenamitul. Keb'inb'oq sa' jun nimla ch'utub'aj ib' re xch'iilankileb'

⁸ ut kinye reheb': “Laa'o, jo' chanru xk'e rib' chiqu, xqisiheb' li qech tenamitul rub'el xwankileb' laj ab'l tenamit. Ut anaqwan laa'ex xek'ayeb' chik leeras eeriitz'in re naq laa'o tooloq'oq reheb'!”. Naq ke'rab'i a'in, ch'anch'o ke'kanaak chi ink'a' chik ke'xtaw k'aru ke'xye.

⁹ Ut laa'in kinye reheb': “Moko us ta li yookex xb'aanunkil. Tento raj sa' eeb'een roxloq'inkil li qaYos re naq ink'a' toohe'xhob' li tenamit li xik' neke'ilok qe.

¹⁰ Laa'in ajwi', eb' li wech'alal ut eb' laj k'anjel chiwu xqak'eheb' xtriiw ut xtumineb' chi to'. Ab'anan anaqwan ok qe chi xyeeb'al reheb' naq tqasach reetalil li k'as a'an.

¹¹ Nintz'aama cheru naq chi junpaat cheq'ajsi li xch'och'eb', li rawimqeb', li xna'ajeb' li oliiw ut li rochocheb', ut sachomaq reetalil li tumin, li triiw, li b'iin ut li aseeyt li xe'xto'oni eerik'in”.

¹² Ke'chaq'ok eb' a'an ut ke'xye: “Taaqaq'ajsi ut maak'a' chik tqapatz' reheb'. Taaqab'aanu jo' xaye laa'at”, chankeb'. Toja' naq kinb'oqeb' laj tij re naq chiruheb' a'an te'xye sa' jurament naq te'xb'aanu li xyehomeb'.

¹³ Chirix chik a'an kinchiq'chiq'i li waq' ut kinye: “Jo'ka'in taxaq tixb'aanu li Qaawa' Yos: yalaq ani ink'a' tixpaab' li aatin a'in, chiq'chiq'iiq ut chi'isiiq sa' li rochoch ut li reechanihom”, chankin. Tikto jo'k'ihaleb' li ch'utch'uukeb' aran ke'xsume: “Jo'kan taxaq!”, chankeb'. Ut ke'ok chi xnimankil xloq'al li Qaawa'. Chixjunileb' ke'xb'aanu jo' ke'xye.

¹⁴ Jo'wi' anchal, chalen naq kinxxaqab' li awab'ej chi aj taqlanel sa' xb'een Judá, chalen sa' li chihab' junmay toj sa' li xkab'laju xka'k'aal chihab' rokik chi awab'ejil laj Artajerjes, chiru kab'laju chihab', chi moko laa'in chi moko eb' linkomon maajun sut kiqatzeka li tzekemq ink'ulub' raj xk'ulb'al.

¹⁵ Ab'anan eb' laj taqlanel li ke'wank xb'een chiwu laa'in, ke'numtaak chi taqlank sa' xb'een li tenamit: rajlal kutan neke'xpatz' reheb' ka'k'aal chi tumin plaat jo' xkub'siil cho'q re li xwa ruk'a'eb'. Jo'kan ajwi' ke'xb'aanu eb' laj k'anjel chiruheb'. A'ut laa'in maajun wa kinb'aanu a'an xb'aan naq ninxiwa ru li Yos.

¹⁶ Jo'wi' anchal kink'e inch'ool chi k'anjelak re xyiib'ankil li xsuttz'akil li tenamit, ut maajun linch'och' kinloq'. Chixjunileb' laj tenq' we ke'okenk chi k'anjelak.

¹⁷ Lajeeb' xwaqxaqk'aal (150) chi aj Judiiy ut aj jolominel neke'wa'ak sa' li wochoch, chi ink'a' k'eeb'ileb' sa' ajl li qula' li neke'chalk chaq sa'eb' li tenamit chi nach'.

¹⁸ Rajlal kutan nink'e chi kamsiik jun inwakax ut waqib' inkarneer sik'b'ileb' ru; ut wankeb' ajwi' li xik'anel xul neke'k'uub'amank cho'q qatzekemq. Rajlal lajeetq kutan wank ajwi' b'iin chi yo'oon. Ab'anan maajun wa kinpatz' li k'aru neke'xtzeka laj taqlanel, xb'aan naq numtajenaq li iiq ak wank sa' xb'een li tenamit.

¹⁹ Chirix chik a'an kintijok chi jo'ka'in: “Chinjultiko'q taxaq aawe, at inYos; chinaawosob'tesi sa' xk'ab'a' chixjunil li xinb'aanu cho'q re li tenamit a'in!”.