Nehemías 4 - Q'eqchi Bible

Eb' laj Judiiy ink'a' ke'ch'inank xch'ool xb'aaneb' li xik' neke'ilok reheb'

¹ Naq laj Sanbalat kirab'i resil naq yooko wi' chik chi xwaklesinkil li tz'ak, k'ajo' naq kipo'k ut kichalk xjosq'il. Ki'ok chi reetz'unkileb' laj Judiiy

² ut xyeeb'al chiruheb' li xkomon jo'wi' chiruheb' laj puub' re Samaria: “K'aru te'raj xb'aanunkil eb' aj Judiiy a'an li maak'a'eb' xmetz'ew? Ma te'xchoy tab'i' xyiib'ankil li tz'ak ut xyeechi'inkil xmayejeb' chiru jun kutan? Ma te'xyoob'tesi tab'i' eb' li k'atb'il pek a'an li wankeb' sa' jun tuub' chi juk'inb'il ochoch?”.

³ Toja' naq laj Tobías aj Amón kixye re laj Sanbalat li wank chi xk'atq: “Kanab'eb' chi tz'akab'k. Maak'a' xkawilal li tz'ak a'an: wi junaq yak taataqe'q sa' xb'een, relik chi yaal naq a'an taat'anoq re!”, chan.

⁴ Tikto laa'in kintijok chi jo'ka'in: “At qaYos, ab'i chanru naq nokoohe'xtz'eqtaana. Chak'e chi naqk sa' xb'eeneb' li xmajewahomeb'. Q'axtesiheb' sa' ruq'eb' li xik' neke'ilok reheb' ut che'k'ame'q chi preexil sa' jalan chik tenamit.

⁵ Ink'a' taxaq taakuy xmaa'usilaleb' chi moko chisachq sa' aach'ool li xmaakeb', xb'aan naq xe'xhob' li yookeb' chi xwaklesinkil li xtz'akil laatenamit”.

⁶ Jo'ka'in naq kiqawaklesi li xsuttz'akil Jerusalén li kiwulak sa' xyiitoq li xteram. K'ajo' naq ke'xk'e xch'ool li tenamit chi k'anjelak.

⁷ Naq laj Sanbalat, laj Tobías, eb' laj Arabia, eb' laj Amón ut eb' laj Asdod ke'rab'i resil naq kaw yookeb' chi xwaklesinkil wi' chik li xsuttz'akil Jerusalén jo'wi' xtz'apb'al eb' li hopox, q'axal ke'chalk xjosq'il

⁸ ut ke'xk'amchi'i rib' sa' junajil re naq junchalikaqeb' chi yalok rik'in Jerusalén ut xpoqoqinkil li tenamit.

⁹ Ab'anan laa'o kiqayaab'a xk'ab'a' li qaYos ut koo'ok chi k'aak'alenk chi q'eq ut chi kutan.

¹⁰ Ut eb' laj Judá ke'xye: “Yo chi lajk xmetz'eweb' laj iiqanel ut numtajenaq li puk'inb'il tz'ak isiik taaraj. Moko tooruuq ta xwaklesinkil wi' chik li suttz'ak”, chankeb'.

¹¹ Eb' li xik' neke'ilok qe ke'xk'oxla naq ink'a' taaqak'e reetal li k'aru yookeb' chi xk'oxlankil sa' qab'een. Sa' xch'ooleb' a'an naq ink'a' taaqil naq te'chalq sa' qab'een chi qakamsinkil re naq taaxaqliiq li qak'anjel.

¹² Ab'an naq eb' laj Judiiy li wankeb' sa' xyanqeb' ke'chalk k'iila sut chi xyeeb'al naq eb' a'an chalkeb' re yalaq b'ar chi yalok qik'in,

¹³ laa'in keb'intaqla li tenamit chi k'aak'alenk sa'atqeb' li julux aj na'ajej, chirix li suttz'ak ut b'arwi' teeto li tz'ak; kinjek'iheb' chi junqkab'alil, li junjunq wank xch'iich', xjutz' che' ut xsimajeb'.

¹⁴ Ut naq kink'e reetal naq yo xxiweb', kinxaqliik ut kinye reheb' li xninqaleb' ru winq, eb' laj k'amol b'e jo'wi' chixjunil li tenamit: “Meexiwa ruheb'. Jultikaq eere naq li Qaawa' nim xwankil ut xiwajel ru. Yalonqex re xkolb'aleb' leerech'alal, leeralal eek'ajol, leerixaqil ut leerochoch”.

¹⁵ Naq eb' li xik' neke'ilok qe ke'rab'i resil naq kawal wanko ut li Yos kixpo' ru li k'aru k'uub'anb'il xb'aaneb', ke'elk aran ut chiqajunilo kooho wi' chik chi xyiib'ankil li suttz'ak.

¹⁶ Chalen sa' li kutan a'an ka'aj chik jun xyiijacheb' li winq ke'okenk chi k'anjelak; li jun yiijach chik wankeb' xjutz' che', xkoleb', xna' xsimajeb' ut xramleb' chire xch'ooleb'. Ut eb' laj jolominel ke'xk'e xkawub' xch'ool jo'k'ihaleb' laj Judá yookeb' xwaklesinkil li suttz'ak.

¹⁷ Eb' laj iiqanel ajwi' wankatqeb' xch'iich': rik'in jun li ruq' yookeb' chi k'anjelak, ut rik'in li ruq' jun chik, chapcho li xch'iich'eb' re yalok.

¹⁸ Li junjunq aj tz'ak, b'ak'b'o li xch'iich' chi xsa' naq yo chi k'anjelak; ut chink'atq laa'in wank laj yaab'asinel tronpeet.

¹⁹ Xb'aan naq ak inyehom reheb' li xninqaleb' ru winq, eb' laj k'amol b'e jo'wi' chixjunileb' li tenamit: “Numtajenaq li k'anjel a'in ut q'axal nim roq. Ut laa'o qacha'cha'ihom qib' sa' xkelam li suttz'ak, najt wanko chiqib'il qib'.

²⁰ Jo'kan utan, b'ar teerab'i xyaab' li tronpeet, aran tqach'utub' qib'. Ut li qaYos taayaloq sa' qak'ab'a'”, chankin.

²¹ Chi jo'kan, naq laa'o yooko chi k'anjelak chalen eq'la toj ewu, li xyiijacheb' li poyanam wankeb' xch'iich'eb' re yalok sa' ruq'eb'.

²² Sa' ajwi' li honal a'an kinye reheb' li tenamit: “Chejunilex tento teenumsi li q'oqyink Jerusalén eerochb'eeneb' laj tenq'ahom eere. Chi jo'kan took'aak'alenq chi q'eq ut took'anjelaq chi kutan”, chankin.

²³ Ab'anan laa'in, eb' li wech'alal, eb' laj k'anjel chiwu ut eb' laj k'aak'alenel li wankeb' wochb'een ink'a' kiqisi li qab'aatal. Chiqajunilo chapcho li qach'iich' re yalok rik'in quq'.