Nehemías 3 - Q'eqchi Bible

Ke'ok chi xwaklesinkil wi' chik li xsuttz'akil Jerusalén

¹ Laj Eliasib, li xyuwa'il aj tij, ut eb' li rochb'een, eb' laj tij, ke'ok chi xyiib'ankil li Rokeb'aaleb' li Karneer. Ke'xyiib' ut ke'xk'e li xtz'amb'ahil, li xtz'apb'al ut li xnat'b'al rix. Chirix chik a'an ke'xwaklesi wi' chik li suttz'ak chalen li najt xteramil kab'l O'k'aal xk'ab'a' toj sa' li najt xteramil rochoch laj Jananel.

² Chi xk'atqeb' a'an ke'ok chi k'anjelak laj Jerikó jo'wi' laj Sakur, ralal laj Imrí.

³ Eb' laj Hasená ke'xyiib' wi' chik li Rokeb'aaleb' li Kar: ke'xk'e li xtz'amb'ahil, li xtz'apb'al ut li xnat'b'al rix.

⁴ Chi xk'atqeb' a'an kitz'akab'k laj Meremot, ralal laj Urías ut ri laj Hakós; chirix chik a'an laj Mesulán, ralal laj Berekías ut ri laj Mesesabel, ut chirix a'an kitz'akab'k laj Sadok, ralal laj Bahaná.

⁵ Chi xk'atq a'an ke'tz'akab'k eb' laj Tékoha, us ta eb' li ninqeb' xwankil ink'a' ke'raj xtenq'ankileb' li neke'jolomink reheb'.

⁶ Laj Johadá, ralal laj Paséhaj, ut laj Mesulán, ralal laj Besodías, ke'xyiib' li Najteril Okeb'aal: ke'xxaqab' sa' xna'aj ut ke'xk'e xtz'amb'ahil, li xtz'apb'al ut li xnat'b'al rix.

⁷ Chi xk'atqeb' a'an ke'tz'akab'k laj Melatías aj Gabahón ut laj Yadón aj Meronot, jo' ajwi' eb' laj Gabahón ut eb' laj Mispá, li wankeb' chaq rub'el xwankil li nataqlank junpak'al li nima' Éwfrates.

⁸ Chi xk'atqeb' a'an kitz'akab'k laj Usiel, ralal laj Jaraías, aj tenol plaat, ut chirix chik a'an kitz'akab'k laj Jananías, aj yiib'ahom sununkil b'an. Eb' a'in ke'raqe'k chi k'anjelak aran Jerusalén toj wan wi' li tz'ak nim ru.

⁹ Chi xk'atqeb' a'an kitz'akab'k laj Refaías, ralal laj Jur, xjolomil li xyiijachil Jerusalén.

¹⁰ Chirix chik a'an laj Jedaías, ralal laj Harumaf, kitz'akab'k chiru li rochoch, ut sa' xtiqam a'an kitz'akab'k laj Jatús, ralal laj Jasabnías.

¹¹ Sa' xtiqam a'an ke'tz'akab'k laj Malkías, ralal laj Jarín, ut laj Jasub, ralal laj Pajat-Mohab, toj wan wi' li najt xteramil kab'l reheb' li Oorn.

¹² Chi xk'atqeb' a'an kitz'akab'k laj Salún, ralal laj Halojés, xjolomil li xkab' xyiijachil Jerusalén, jo' ajwi' eb' li xrab'in.

¹³ Laj Janún ut eb' laj Sanóhaj ke'xyiib' li Okeb'aal naxik taq'a: ke'xxaqab' sa' xna'aj, ke'xk'e xtz'amb'ahil, li xtz'apb'al ut li xnat'b'al rix, ut ke'xyiib' ajwi' wuqlaju xkaalajuk'aal (277) moqoj li tz'ak toj wan wi' Rokeb'aal li Mul.

¹⁴ Li Rokeb'aal li Mul kiyiib'aak xb'aan laj Malkías, ralal laj Rekab ut xjolomil li teep Bet-Keren: kixxaqab' sa' xna'aj ut kixk'e xtz'amb'ahil, li xtz'apb'al ut li xnat'b'al rix.

¹⁵ Li Rokeb'aal li Yu'amha' kiyiib'aak xb'aan laj Salún, ralal laj Koljosé, xjolomil li teep Mispá: kixxaqab' sa' xna'aj ut kixk'e xtz'amb'ahil, li xtz'apb'al ut li xnat'b'al rix. Kixyiib' ajwi' xtz'akul li Ha' re Siloé, li wank chi xk'atq li rawimq li awab'ej, toj wan wi' li xtaqleb'aal li xTenamit laj David.

¹⁶ Chirix chik a'an laj Nehemías, ralal laj Astuk, xjolomil xyiijachil li teep Bet-Sur, kitz'akab'k toj chiruheb' li xmuqleb'aal laj David, toj wan wi' li kumb' ut li rochocheb' laj puub'.

¹⁷ Chirix chik a'an ke'tz'akab'k laj Leví: laj Rejún, ralal laj Baní; chi xk'atq a'an laj Jasabías, xjolomil xyiijachil li teep Kehilá, sa' xk'ab'a'eb' li wankeb' sa' xteepal.

¹⁸ Chirix chik a'an ke'tz'akab'k li xkomon: laj Binuy, ralal laj Jenadad, xjolomil li xkab' xyiijachil li teep Kehilá;

¹⁹ laj Eser, ralal laj Josué, xjolomil Mispá, li kiyiib'ank re li tz'ak sa' xka'yab'aal li taqsink naxik sa' li xk'uuleb'aaleb' li ch'iich' re yalok, toj sa' xxuk li tz'ak.

²⁰ Chirix chik a'an kitz'akab'k laj Baruk, ralal laj Sabay, chalen sa' li xuk toj wan wi' li okeb'aal sa' rochoch laj Eliasib li xyuwa'il aj tij.

²¹ Chirix chik a'an kitz'akab'k laj Meremot, ralal laj Urías ut ri laj Hakós, chalen sa' li okeb'aal re li rochoch laj Eliasib toj b'ar nokoxraqe'q wi' li kab'l.

²² Chirix chik a'an ke'tz'akab'k eb' laj tij li wankeb' chaq chiru taq'a.

²³ Laj Benjamín ut laj Jasub ke'tz'akab'k sa' xka'yab'aal li rochocheb', ut laj Asarías, ralal laj Mahasías ut ri laj Ananías, kitz'akab'k chi xk'atq li rochoch.

²⁴ Sa' xtiqam a'an kitz'akab'k laj Binuy, ralal laj Jenadad, chalen wan wi' li rochoch laj Asarías toj sa' xxuk li tz'ak.

²⁵ Chirix chik a'an kitz'akab'k laj Palal, ralal laj Usay, sa' xka'yab'aal li xuk ut li najt xteramil kab'l li wank sa' xb'een li rochoch li awab'ej, nach' rik'in xneb'aalil li tz'alam. Chirix chik a'an laj Pedaías, ralal laj Parós, kitz'akab'k

²⁶ toj sa' li Okeb'aal reheb' laj b'eelahom ha', li na'ilok sa' xjayal releb'l saq'e, ut toj sa' xka'yab'aal li najt xteramil kab'l li wank sa' xb'een li rochoch li awab'ej.

²⁷ Sa' xtiqam a'an eb' laj Tékoha ke'tz'akab'k sa' xka'yab'aal li najt xteramil kab'l li wank chi tzuul sa' xb'een rochoch li awab'ej toj wan wi' li tz'ak re Ofel.

²⁸ Chalen wan wi' li Rokeb'aaleb' li Kawaay ke'tz'akab'k laj tij, li junjunq kixyiib' li tz'ak li wank sa' xka'yab'aal li rochoch.

²⁹ Chirixeb' a'an kitz'akab'k laj Sadok, ralal laj Imer, sa' xka'yab'aal li rochoch, ut sa' xtiqam a'an kitz'akab'k laj Semaías, ralal laj Sekanías, laj k'aak'alenel re li okeb'aal sa' releb'l saq'e.

³⁰ Chirix chik a'an ke'tz'akab'k laj Jananías, ralal laj Selemías, ut laj Janún, li xwaq ralal laj Salaf. Chirixeb' a'an kitz'akab'k laj Mesulán, ralal laj Berekías, sa' xka'yab'aal li rochoch.

³¹ Sa' xtiqam a'an laj Malkías, laj tenol plaat, kixyiib' li tz'ak toj wan wi' li rochocheb' laj k'anjel sa' rochoch li Yos ut eb' laj yakonel, sa' xka'yab'aal li okeb'aal re Mifkad, toj sa' li kab'l na'uxk wi' k'aak'alenk sa' xxuk li tz'ak.

³² Ut li tz'ak ke'xyiib' laj tenol plaat ut eb' laj yakonel, natiklaak sa' xuk wan wi' li na'ajej na'uxk wi' li k'aak'alenk ut kiraqe'k toj sa' li Rokeb'aaleb' li Karneer.