Nehemías 12 - Q'eqchi Bible

Li xk'ab'a'eb' laj tij ut eb' laj Leví

¹ A'aneb' a'in laj tij ut eb' laj Leví li ke'sutq'iik chaq Jerusalén rochb'een laj Sorobabel, ralal laj Sehaltiel, ut laj Josué: A'aneb' a'in laj tij: laj Seraías, laj Jeremías, laj Esdras,

² laj Amarías, laj Maluk, laj Jatús,

³ laj Sekanías, laj Rejún, laj Meremot,

⁴ laj Idó, laj Kinetón, laj Abías,

⁵ laj Mijamín, laj Mahadías, laj Bilká,

⁶ laj Semaías, laj Joharib, laj Jedaías,

⁷ laj Salú, laj Amok, laj Jilkías ut laj Adaías. A'aneb' a'in li xjolomileb' laj tij ut li rech'alaleb' naq kiwank chi k'amol b'ehil laj Josué.

⁸ A'aneb' a'in laj Leví: laj Josué, laj Binuy, laj Kadmiel, laj Serebías, laj Judá, laj Matanías li kik'amok b'e sa' li b'ichank re b'anyoxink;

⁹ ut laj Bakbukías jo'wi' laj Uní ut eb' li rech'alal li ke'tenq'ank reheb' sa' li b'ichank.

¹⁰ Laj Josué a'an chaq xyuwa' laj Johakín; laj Johakín a'an xyuwa' laj Eliasib; laj Eliasib a'an xyuwa' laj Johadá;

¹¹ laj Johadá a'an xyuwa' laj Johanán, ut laj Johanán a'an xyuwa' laj Yadúa.

¹² Sa'eb' li kutan naq kiwank laj Johakín cho'q aj tij, a'ineb' laj tij xjolomileb' li junqkab'al: sa' li xjunkab'al laj Seraías: laj Merías; sa' li xjunkab'al laj Jeremías: laj Jananías;

¹³ sa' li xjunkab'al laj Esdras: laj Mesulán; sa' li xjunkab'al laj Amarías: laj Johanán;

¹⁴ sa' li xjunkab'al laj Maluk: laj Jonatán; sa' li xjunkab'al laj Sebanías: laj José;

¹⁵ sa' li xjunkab'al laj Jarín: laj Asná; sa' li xjunkab'al laj Merayot: laj Jelkay;

¹⁶ sa' li xjunkab'al laj Idó: laj Sakarías; sa' li xjunkab'al laj Kinetón: laj Mesulán;

¹⁷ sa' li xjunkab'al laj Abías: laj Sikrí; sa' li xjunkab'al laj Miyamín...; sa' li xjunkab'al laj Mahasías: laj Piltay;

¹⁸ sa' li xjunkab'al laj Bilká: laj Samúa; sa' li xjunkab'al laj Semaías: laj Jonatán;

¹⁹ sa' li xjunkab'al laj Joharib: laj Matenay; sa' li xjunkab'al laj Jedaías: laj Usí;

²⁰ sa' li xjunkab'al laj Salay: laj Kalay; sa' li xjunkab'al laj Amok: laj Jéber;

²¹ sa' li xjunkab'al laj Jilkías: laj Jasabías; sa' li xjunkab'al laj Jedaías: laj Natanael.

²² Naq laj Eliasib, laj Johadá, laj Johanán ut laj Yadúa ke'wank cho'q xyuwa'ileb' aj tij, toj chalen naq ki'ok laj Darío cho'q awab'ej re Persia, eb' laj Leví ke'tz'iib'aak xk'ab'a'eb' cho'q xjolomileb' junkab'al, ut jo'kaneb' ajwi' laj tij.

²³ Eb' laj Leví li ke'wank cho'q xjolomileb' junqkab'al, ke'tz'iib'aak xk'ab'a'eb' sa' xhuhil li k'aru nak'ulmank, chalen toj sa'eb' li kutan naq kiwank cho'q aj tij laj Johanán, xmam laj Eliasib.

²⁴ Li xjolomileb' laj Leví a'aneb' a'in: laj Jasabías, laj Serebías, laj Josué, laj Binuy, laj Kadmiel ut eb' li rech'alaleb', wankeb' chiruheb' re xnimankil ut xb'anyoxinkil li Yos, sa' xkutankil li xk'anjeleb', jo' chanru chaq'rab'inb'ileb' wi' xb'aan laj David, laj k'anjel chiru li Yos.

²⁵ Ut li xk'ab'a'eb' laj ilol okeb'aal li neke'k'aak'alenk reheb' li k'uuleb'aal, a'aneb' a'in: laj Matanías, laj Bakbukías, laj Abdías, laj Mesulán, laj Talmón ut laj Akub.

²⁶ Eb' a'an ke'k'anjelak sa'eb' li kutan naq kiwank cho'q xb'eenil aj tij laj Johakín, ralal laj Josué, ralal laj Josadak, ut naq kiwank laj Nehemías cho'q aj taqlanel sa' xb'een li tenamit ut laj Esdras cho'q aj tij ut aj tz'iib'.

Xninq'ehinkil li xsuttz'akil Jerusalén

²⁷ Naq kiwulak xq'ehil xninq'ehinkil li xsuttz'akil Jerusalén, ke'sik'je'k laj Leví sa' chixjunil li na'ajej re xk'amb'aleb' chaq Jerusalén, re xninq'ehinkil ut xq'axtesinkil li suttz'ak sa' ruq' li Yos rik'in sahil ch'oolej, b'ichank, b'anyoxink rik'in xyaab' aarp, tzojtzoj ut wajb'.

²⁸ Ut eb' laj b'ichanel aj Leví ke'xch'utub' rib': chalenaqeb' chi xsutam Jerusalén, sa'eb' li k'aleb'aal xteepal Netofá,

²⁹ sa' li tenamit Bet-Hakilkal, sa' xteepal Keba ut Asmábet; xb'aan naq eb' laj b'ichanel ke'xk'ojob' xk'aleb'aaleb' sa' xteepal Jerusalén.

³⁰ Toja' naq eb' laj tij ut eb' laj Leví ke'xch'ajob'resi rib', ut chirix a'an ke'xch'ajob'resi li tenamit, eb' li okeb'aal ut li suttz'ak.

³¹ Moqon laa'in kinye reheb' li xjolomileb' laj Judá re te'taqe'q sa' xb'een li suttz'ak, ut kink'uub' wiib' ninqi ch'uut chi aj b'ichanel. Li xb'een ch'uut yookeb' chi xik sa' xb'een li suttz'ak sa' nim uq', sa' xjayal li Okeb'aal re li Mul.

³² Chirixeb' a'an yookeb' chi xik laj Hosaías ut li xyiijachil xjolomileb' laj Judá,

³³ a'eb' laj Asarías, laj Esdras, laj Mesulán,

³⁴ laj Judá, laj Benjamín, laj Semaías ut laj Jeremías.

³⁵ Ut wankeb' ajwi' aj tij li wankeb' xtronpeet naq yookeb' chi xik: laj Sakarías, ralal laj Jonatán, ralal laj Semaías, ralal laj Matanías, ralal laj Miká, ralal laj Sakur, ralal laj Asaf,

³⁶ rochb'eeneb' li rech'alaleb': laj Semaías, laj Asarel, laj Milalay, laj Kilalay, laj Mahay, laj Natanael, laj Judá, laj Jananí, wank rik'ineb' li xwajb'eb' laj David, laj k'anjel chiru li Yos.

³⁷ Naq ke'wulak wan wi' li Okeb'aal reheb' laj b'eelahom ha', ke'taqe'k chi tiik sa' xtaqleb'aal li Xtenamit laj David, toj sa' xb'een li suttz'ak, jo' ajwi' sa' xb'een li rochoch laj David, toj sa' li Okeb'aal reheb' laj b'eelahom ha', li wank sa' xjayal releb'l saq'e.

³⁸ Li xkab' ch'uut yookeb' chi xik sa' tz'e. Laa'in kohin chirixeb', wochb'eeneb' xyiijachil xjolomileb' li tenamit, sa' xb'een li suttz'ak, chalen sa' li najt xteramil kab'l reheb' li Oorn toj wan wi' li tz'ak nim ru.

³⁹ Koonume'k sa' xb'een li Okeb'aal re laj Efraín, sa' xb'een li Okeb'aal reheb' li Kar, sa' xb'een li najt xteramil rochoch laj Jananel jo'wi' li najt xteramil kab'l O'k'aal xk'ab'a', toj wan wi' li Okeb'aal reheb' li Karneer, ut kooxaqliik wan wi' li Okeb'aal re li Tz'alam.

⁴⁰ Chirix chik a'an li wiib' ch'uut chi aj b'ichanel ke'xk'e rib' sa' rochoch li Yos. Jo'kan ajwi' laa'in: kinxaqliik wochb'eeneb' li xyiijach li xjolomileb' li tenamit.

⁴¹ Eb' laj tij li wankeb' xtronpeet a'aneb' a'in: laj Eliakín, laj Mahasías, laj Miyamín, laj Miká, laj Eljohenay, laj Sakarías, laj Jananías,

⁴² laj Mahasías, laj Semaías, laj Elehasar, laj Usí, laj Johanán, laj Malkías, laj Elam ut laj Eser. Ut eb' laj b'ichanel ke'xtikib' b'ichank chi wank laj Israías cho'q aj k'amol xb'eheb'.

⁴³ Naab'al li mayej kiyeechi'imank sa' li kutan a'an ut k'ajo'eb' li tenamit chi ninq'ehik, xb'aan naq jun nimla sahil ch'oolej xk'ehom li Yos reheb'. Ke'ninq'ehik ajwi' eb' li ixq ut eb' li kok'al; ut toj chi najt ki'ab'iik li xsahilal xch'ooleb' laj Jerusalén.

⁴⁴ Sa'eb' li kutan a'an ke'xaqab'aak winq re te'ril li na'ajej li taaxokmanq wi' chixjunil li mayej, li yeechi'om, li xb'een ru li awimq ut li xlajeetqil chixjunil. Tento sa' xb'eeneb' li winq a'an xxokb'al ut xk'uulankil jo'ch'inal jo'nimal taachalq sa'atqeb' li xk'aleb'aalil eb' li tenamit jo' mayej cho'q reheb' laj tij ut eb' laj Leví, jo' tz'iib'anb'il sa' li Chaq'rab'. Xb'aan naq saheb' sa' xch'ool laj Judá rik'ineb' laj tij ut eb' laj Leví li wankeb' sa' xk'anjel.

⁴⁵ Eb' a'an, eb' laj b'ichanel ut eb' laj k'aak'alenel okeb'aal, xaqab'anb'ileb' xwankil chi k'anjelak chiru li Yos, jo' ajwi' xb'aanunkil li ch'ajob'resink ib', kama' chaq'rab'inb'ileb' wi' xb'aan laj David ut laj Salomón li ralal.

⁴⁶ Xb'aan naq chalen chaq najter, sa' xyu'amil laj David ut laj Asaf toj anaqwan, wankeb' xjolomileb' laj b'ichanel jo'wi' b'ich re xnimankil ru li Yos ut re b'anyoxink.

⁴⁷ Ut chixjunileb' laj Israel, sa'eb' li kutan naq ke'wank laj Sorobabel ut laj Nehemías, ke'xk'e reheb' laj b'ichanel ut eb' laj k'aak'alenel okeb'aal li k'aru tento te'xk'ul re li kutan junjunq. Ke'xk'e ajwi' reheb' laj Leví li xk'ulub'eb' xk'ulb'al, ut eb' a'in ke'xq'axtesi reheb' laj Aharón li k'aru tento te'xk'e reheb'.