Nehemías 11 - Q'eqchi Bible

A'aneb' a'in xk'ab'a'eb' laj Jerusalén

¹ Eb' li xjolomil li tenamit ke'na'ajunk Jerusalén; ut eb' li junch'ol chik ke'b'uuliik rixeb', re naq sa' xyanq li lajeetq chi winq jun taakanaaq chi wank Jerusalén, li Loq'laj Tenamit, ut li b'eleeb'eb chik toxe'na'ajunq sa'eb' li jalaneb' tenamit.

² Chirix chik a'an eb' li poyanam ke'xb'anyoxi chiruheb' li ke'xyeechi'i rib' chi kanaak Jerusalén.

³ A'aneb' a'in li xjolomileb' li tenamit ke'kanaak Jerusalén. Sa' xteepal Judá koxe'na'ajunq eb' laj Israel, eb' laj tij, eb' laj Leví, eb' laj k'anjel sa' rochoch li Yos ut eb' li ralal xk'ajol li ke'k'anjelak chiru laj Salomón, li junjunq wank xtenamit ut li xch'och'.

⁴ Sa' xyanqeb' li ke'kanaak Jerusalén, wankeb' li ralal xk'ajol laj Judá ut laj Benjamín. Eb' li ralal xk'ajol laj Judá a'aneb' a'in: laj Ataías, ralal laj Osías, ralal laj Amarías, ralal laj Sefatías, ralal laj Mahalalel, xkomoneb' laj Fares;

⁵ laj Mahasías, ralal laj Baruk, ralal laj Koljosé, ralal laj Jasaías, ralal laj Adaías, ralal laj Joharib, ralal laj Sakarías, ralal laj Siloní.

⁶ Li xk'ihaleb' laj Fares li ke'kanaak Jerusalén, a'an waqxaqib' xkaak'aal xkab' o'q'ob' (468) chi kawil winqeb'.

⁷ Eb' li ralal xk'ajol laj Benjamín, a'aneb' a'in: laj Salú, ralal laj Mesulán, ralal laj Yohed, ralal laj Pedaías, ralal laj Kolaías, ralal laj Mahasías, ralal laj Itiel, ralal laj Isaías,

⁸ jo' ajwi' laj Gabay ut laj Salay: waqxaqib' xwuqk'aal rox o'q'ob' (928) chi kawil winqeb'.

⁹ Laj Joel, ralal laj Sikrí, a'an chaq li xb'eenil; ut laj Judá, ralal laj Hasenuá, a'an li xkab'il sa' xyanqeb' li xjolomileb' li tenamit.

¹⁰ Eb' laj tij a'aneb' a'in: laj Jedaías, ralal laj Joharib, laj Yakín

¹¹ ut laj Seraías, ralal laj Jilkías, ralal laj Mesulán, ralal laj Sadok, ralal laj Merayot, ralal laj Ajitub, li najolomink li rochoch li Yos,

¹² jo'wi' eb' li rech'alal li ke'k'anjelak sa' rochoch li Yos: wiib' xka'k'aal rox o'q'ob' (822) chi winq; laj Adaías, ralal laj Yeroján, ralal laj Pelalías, ralal laj Amsí, ralal laj Sakarías, ralal laj Pasjur, ralal laj Malkías,

¹³ ut eb' li rech'alal, xjolomileb' li junqkab'al: wiib' roxlajuk'aal (242) chi winq; ut laj Amasay, ralal laj Asarel, ralal laj Ajsay, ralal laj Mesilemot, ralal laj Imer,

¹⁴ ut eb' li rech'alal: waqxaqib' xwuqk'aal (128) chi kawil winqeb'. Laj Sabdiel, ralal laj Hakadol, a'an chaq li xb'eenileb' a'an.

¹⁵ Eb' laj Leví a'aneb' a'in: laj Semaías, ralal laj Jasub, ralal laj Asrikán, ralal laj Jasabías, ralal laj Buní;

¹⁶ laj Sabtay ut laj Josabad, li ke'ilok re li k'anjel li ink'a' na'uxmank sa' rochoch li Yos;

¹⁷ laj Matanías, ralal laj Miká, ralal laj Sabdí, ralal laj Asaf, li kik'amok b'e sa' li b'ichank sa' xhonalil li tijok; laj Bakbukías, jun reheb' li riitz'in laj Matanías; laj Abdá, ralal laj Samúa, ralal laj Kalal, ralal laj Jedutún.

¹⁸ Li xk'ihaleb' laj Leví sa' li Loq'laj Tenamit, a'an kaahib' ro'lajuk'aal (284) chi winq.

¹⁹ Eb' laj k'aak'alenel okeb'aal a'aneb' a'in: laj Akub, laj Talmón ut eb' li rech'alal li ke'k'aak'alenk re li okeb'aal. A'aneb' kab'laju xb'eleek'aal (172) chi winq.

²⁰ Li jo'k'ihaleb' chik aj Israel, eb' laj tij ut eb' laj Leví li ink'a' ke'kanaak Jerusalén, koxe'na'ajunq sa'eb' li tenamit xteepal Judá, li junjunq sa' li reechanihom.

²¹ Eb' laj k'anjel sa' rochoch li Yos ke'kanaak Ofel. Laj Sijá ut laj Kispá a'aneb' li xjolomileb'.

²² Li xb'eenileb' laj Leví aran Jerusalén, a'an laj Usí, ralal laj Baní, ralal laj Jasabías, ralal laj Matanías, ralal laj Miká, xkomoneb' laj Asaf li neke'k'amok b'e chi b'ichank sa' li loq'laj k'anjel na'uxmank sa' rochoch li Yos.

²³ Ak yeeb'il reheb' laj b'ichanel xb'aan jun xchaq'rab' li awab'ej k'aru tento te'xb'aanu rajlal kutan.

²⁴ Laj Petajías, ralal laj Mesesabel, xkomoneb' laj Séraj, ralal laj Judá, a'an xaqab'anb'il chi aatinak sa' xk'ab'a'eb' laj Israel sa' rochoch li awab'ej re Persia.

Eb' laj Judá li ink'a' ke'kanaak aran Jerusalén

²⁵ Wan reheb' laj Judá ink'a' ke'kanaak Jerusalén. A'aneb' a'in li poyanam li ke'kanaak wi': Kiryat-Arbá, Dibón, Jekabsel,

²⁶ Yesúa, Moladá, Bet-Pélet,

²⁷ Jasar-Suhal, Berseba,

²⁸ Siklak, Mekoná,

²⁹ Enrimón, Sorá, Yarmut,

³⁰ Sanóhaj, Adulán, Lakix, Aseká, jo' ajwi' sa'eb' li xk'aleb'aaleb'. Ke'xk'ojob' li xna'ajeb' chalen chaq Berseba toj sa' li taq'a re Hinón.

³¹ Wan reheb' laj Benjamín ke'xk'ojob' li xna'ajeb' aran Keba, Mikmás, Ayá, Betel ut sa'eb' li xk'aleb'aaleb',

³² Anatot, Nob, Ananías

³³ Jasor, Ramá, Kitáhin,

³⁴ Jadid, Seboín, Nebalat,

³⁵ Lod ut Onó, jo' ajwi' sa' xTaq'ahil eb' laj Pak'onel.

³⁶ Wankeb' ajwi' aj Leví sa' xteepal Judá ut Benjamín.