Nahum 2 - Q'eqchi Bible

Li roso'jik li tenamit Nínive

¹ At Nínive, we' chaq laj sachonel: yo chi chalk sa' aab'een. K'aak'alen chi us toj sa' li najt xteramil kab'l. Il chi us laab'e, b'ak' chasa' laaq'esnal ch'iich' ut kawresi aawib'.

² Xb'aan naq li Qaawa' tixk'ojob' wi' chik li xloq'al laj Jakob ut li xwankilal laj Israel. Eb' laj elq' ke'sachok re ut ke'xkanab' jo' jun toon chi uub' li maak'a'eb' chik li ruq', ab'an li Yos tixk'e wi' chi li xloq'al ut xwankilal.

³ Li xkolb'aleb' rib' laj yalonel a'an kaq xb'onol ut kaq ajwi' li raq'eb'. Ak yo'oon wankeb' chi yalok, chanchan xam eb' li b'eleb'aal ch'iich'; ut eb' li xkawaay neke'saapank re xik chi junpaat.

⁴ Eb' li b'eleb'aal ch'iich' neke'suutank sa'atqeb' li b'e, ut neke'chalk neke'xik sa' li tenamit; chanchaneb' li raq'xam ut li raq'kaaq naq neke'nume'k.

⁵ Neke'b'oqe'k li xjolomileb' laj puub', ut eb' a'in neke'xtiikisihatq rib' chi xik sa' xb'een li suttz'ak; kawresinb'ileb' chik li taqleb'aal.

⁶ Xe'teemank chaq eb' li okeb'aal li wankeb' sa' xka'yab'aal li nima', ut xjuk'e'k li rochoch li awab'ej.

⁷ Li xna' li tenamit x'isiik sa' li xna'aj rochb'eeneb' li xmoos ixq, yooqeb' chi q'oqonk jo'eb' li mukuy naq neke'xten reheb' li xch'ool.

⁸ Jo' li ha' yo chi elk sa' jun li jorol kumb', jo'kan naq yookeb' chi elelik eb' laj Nínive. “Xaqlinqex, xaqlinqex!”, chu'uxk reheb', ab'an maajun nasutq'iik.

⁹ “Elq'ahomaqeb' li plaat ut eb' li oor”, chankeb'. Li xb'ihomal Nínive ink'a' nalajk na'oso'k, ut nujenaq li tenamit chi chaab'il eechej.

¹⁰ Nakirirnak, nayamnak ut juk'ulk chixjunil, jo'ka'in naq xkanaak li tenamit Nínive. Neke'lub'je'k xb'aaneb' xxiw, neke'siksotk li roqeb', maak'a' chik xmetz'eweb' li poyanam; ut saqeb' aj chik chixjunileb' xb'aan xiwak.

Nínive chanchan jun kaqkoj li xq'axe' ru

¹¹ B'ar wank anaqwan li xna'ajeb' li kaqkoj? K'aru xk'ul li xjob'eb' li kok' kaqkoj b'arwi' xe'wank, chi maajun naxib'esink reheb'?

¹² Nínive jwal kaw rib' naq kiwank, jo' li kaqkoj naq naxkamsi li xtzak, naxch'oolaniheb' li ral ut naxnujob'resiheb' li xk'uuleb'aal rik'in junes tib'.

¹³ Jo'ka'in xye li Nimajwal Yos: “Xinchalk chajuk'b'al. Tink'ateb' laab'eleb'aal ch'iich' ut sib' aj chik teb'inkanab' wi'. Tinsach ruheb' laawalal aak'ajol, twisi sa' laatenamit chixjunil laawelq'ahom ut ink'a' chik taa'ab'imanq xyaab' xkux laj yehol esil”.