Miqueas 4 - Q'eqchi Bible

Li x'awab'ejihom li Qaawa' sa' tuqtuukilal

¹ Chiruheb' li kutan chaalel li tzuul wan wi' li rochoch li Qaawa' taawakliiq chi nimaq xwankil sa' xb'eeneb' chixjunileb' li b'ool, ut q'axal nimaq xteram chiruheb' chixjunil li tzuul. Chixjunileb' li tenamit te'chalq aran;

² k'ajo'aqeb' xk'ihal li poyanam te'chalq ut te'xye: “Kimqex ut taqe'qo sa' xtzuulul li Qaawa', sa' rochoch li xYos laj Jakob. A'an tixk'ut chiqu k'aru li rajom ut laa'o tqataaqe li b'e sik'b'il ru xb'aan”. Xb'aan naq aran Sión taa'elq chaq li chaq'rab', ut Jerusalén taachalq li raatin li Yos.

³ Li Qaawa' taaraqoq aatin sa' xb'eeneb' li tenamit ut a'anaq laj raqol aatin sa' xyanqeb' naab'al chi poyanam, toj sa' xb'eeneb' li wankatqeb' chaq chi najt. Te'xsutq'isi eb' li q'esnal ch'iich' cho'q pikleb' ch'och', ut li xjutz' ch'iich'eb' te'kanaaq cho'q setleb' k'im. Eb' li tenamit ink'a' chik te'yaloq chirib'ileb' rib' chi moko te'xkawresi rib' re yalok.

⁴ Ut li junjunq taahilanq sa' xmu li rochoch sa' tuqtuukilal, chi maak'a'aq xxiw. A'an a'in xyehom li Qaawa', li Nimajwal Yos.

⁵ Eb' li tenamit junch'ol neke'xloq'oni ut neke'xpaab' li xyoseb', a'ut laa'o junelik naqapaab' ut naqaloq'oni li Qaawa' li qaYos.

Li Qaawa' tixkol li xtenamit

⁶ Xyehom li Qaawa': “Sa' li kutan a'an teb'inxok chaq linkarneer li yeq ra'eb'; tinch'utub'eb' li cha'cha'inb'ileb' ut li xinrahob'tesiheb'.

⁷ Sa' xyanqeb' li yeq ra'eb' tinkol jun ch'uut li taakanaaq; ut eb' li najt wankeb' chaq tink'uub' junaq kawil tenamit rik'ineb'. Toja' naq tin'awab'ejinq sa' xb'eeneb' aran Sión, chalen anaqwan ut chi junelik.

⁸ Ut laa'at Sión, rochochilat li xtenamit li Yos ut xkawilat li tenamit Jerusalén, nimaq wi' chik laawankil jo' junxil: laa'at tat-ok wi' chik chi awab'ejink sa' xb'een Israel”.

⁹ Ut anaqwan, k'a'ut naq japjo aawe, jo'kat li ixq yo chi alank? Ma yal xb'aan naq maak'a' li awab'ej, malaj xb'aan naq xe'kamk eb' laj k'ehol aana'leb'?

¹⁰ Yaab'an ut chimayoq aach'ool, at Sión, jo'qat li ixq yo chi alank, xb'aan naq anaqwan tento tat-elq sa' li tenamit ut tatq'axonq sa' li k'aleb'aal. Tatwulaq toj Babilonia, ab'an aran tatkole'q, xb'aan naq li Qaawa' taa'isinq aawe sa' ruq'eb' li xik' neke'ilok aawe.

¹¹ Anaqwan naab'aleb' li tenamit xe'xch'utub' rib' chi xxik'b'al aawilb'al: “Chimuxmanq Sión ut chisaho'q qach'ool rik'in rilb'al li roso'jik Jerusalén”, chankeb'.

¹² Ab'an eb' a'an ink'a' neke'xnaw li xk'a'uxl li Qaawa' chi moko neke'xtaw ru li k'aru naraj; ink'a' neke'xnaw naq A'an xch'utub'ank reheb' jo' na'uxk re li triiw sa' xq'ehil risinkil li rix.

¹³ Xaqlin, at Sión, ut eeqajun sa' xb'eeneb'! Xb'aan naq xyehom li Qaawa': “Laa'in tink'e aakawilal jo' junaq teelom wakax li wank xxukub' ch'iich' ut q'anch'iich' li xxaab'. K'ajo'eb' li tenamit taaputz'i. Toja' naq taamaq' chixjunil li b'ihomal xe'relq'a ut taamayeja chiwu laa'in, li xQaawa' chixjunil li ruuchich'och'.