Miqueas 3 - Q'eqchi Bible

Ra chaalel sa' xb'eeneb' li wankeb' sa' xk'anjel

¹ Ut laa'in xinye: “Ab'ihomaq anaqwan, laa'ex xjolomileb' laj Jakob; ab'ihomaq laa'ex li nekextaqlank sa' xb'eeneb' li ralal xk'ajol laj Israel. Ma ink'a' tab'i' sa' eeb'een wank xnawb'al k'aru li tiikilal?

² Ab'anan laa'ex neketz'eqtaana li us, ut a' chik li maa'usilal nekera; nekerahob'tesiheb' lintenamit toj chiru li xb'aqeleb'.

³ Neketz'ub' xkik'eleb' lintenamit; nekemich' li xtz'uumaleb' ut nekejori li xb'aqeleb', jo' na'uxk re li tib' nachiqe'k sa' uk'al.

⁴ Jo'kan wi teeyaab'a xk'ab'a' li Qaawa', A'an ink'a' texxsume chaq. Chiruheb' li kutan a'an tixmuq rib' cheru xb'aan li maa'usilal xeb'aanu”.

Ra chaalel sa' xb'eeneb' li propeet aj b'alaq'

⁵ A'an a'in xyehom li Qaawa' reheb' li propeet li neke'b'alaq'ink re lintenamit: tuqtuukilal neke'xtz'aama sa' xb'eeneb' li neke'k'ehok reheb' chi wa'ak, ab'an eb' li ink'a' neke'xk'eheb' chi tzekank neke'xtz'aama rahilal sa' xb'eeneb':

⁶ “Ink'a' chik tex'iloq moy u chiru li q'oqyink, chi moko sa' li aak'ab' teeye li k'aru chaalel”, chan li Qaawa'.

⁷ Eb' laj ilol sa' moy u ut eb' laj q'e te'kanaaq sa' xutaan ut te'se'eeq. Mem te'kanaaq chixjunileb' naq ink'a' te'sumeeq chaq xb'aan li Yos.

⁸ A'ut laa'in li xmusiq' li Qaawa' nak'ehok inkawilal; nujenaqin chi tiikil ut kawil ch'oolej re xch'olob'ankil chiru laj Jakob li xq'etq'etil ut chiru laj Israel li maak xb'aanu.

Li xsachik Jerusalén

⁹ Ab'ihomaq anaqwan li aatin a'in, ex xjolomileb' laj Jakob; ab'ihomaq laa'ex li nekextaqlank sa' xb'eeneb' li ralal xk'ajol laj Israel. Laa'ex xik' nekeril li tiikilal ut nekepo' ru li k'ulub'ej;

¹⁰ laa'ex nekekab'la Jerusalén ut Sión sa' xb'een li maa'usilal ut li kamsij ib'.

¹¹ Eb' laj raqol aatin sa' eeyanq neke'tuminaak ruheb', eb' laj tij neke'k'anjelak yal xb'aan aj chik li tumin ut eb' li propeet neke'xk'ayi eb' li raatin, neke'xkawub'resi xch'ooleb' rik'in li Qaawa' chi xyeeb'al: “Li Qaawa' wank sa' qayanq, ut maak'a' junaq rahilal tqak'ul”, chankeb'.

¹² Jo'kan utan, eemaak laa'ex naq Sión kama'aq chik li k'aleb'aal re awk, ut Jerusalén taakanaaq cho'q po'lem, ut taak'iche'o'q li xna'aj li rochoch li Yos.