San Mateo 8 - Q'eqchi Bible

IV. XB'AANUHOM LI JESUS (8,1—9,38) Kik'irtasiik jun li saqlep rix

¹ Naq kikub'e chaq li Jesus chiru li tzuul, naab'aleb' li tenamit ke'taaqenk re.

² Toja' naq jun li winq saqlep rix kiwulak rik'in, kixwiq'ib' rib' chiru ut kixye re: —Qaawa', wi taawaj, truuq tinaak'irtasi.

³ Li Jesus kixye' li ruq' ut kixch'e': —Twaj, tatk'iraaq, chan re. Ut sa' junpaat ki'elk li saqlep chirix ut kik'iraak.

⁴ Li Jesus kixye re: —Il, maa'ani aj e chaye a'in; ayu b'an, k'ut aawib' chiru laj tij ut k'e laamayej li chaq'rab'inb'il xb'aan laj Moisés, re naq ch'olch'ooq chiruheb'.

Kik'irtasiik li xmoos jun xjolomileb' laj puub'

⁵ Naq yo chi ok li Jesus Kafarnaúm, jun xjolomileb' laj puub' kiwulak rik'in, kirelaji ru

⁶ ut kixye: —At Qaawa', yokyo linmoos sa' kab'l, sik ut q'axal ra wank.

⁷ Li Jesus kixye re: —Laa'in tinxik, toxink'irtasi chaq.

⁸ Kichaq'ok li xjolomileb' laj puub': —At Qaawa', moko ink'ulub' ta naq tat-ok rub'el linmuheb'aal; ka'ajwi' taaye laawaatin ut taak'iraaq linmoos.

⁹ Xb'aan naq jo'kan ajwi' laa'in wank ani nataqlank we, ut wankeb' aj puub' rub'el inwankil, ut ninye re junaq: «Ayu», ut a'an naxik; ut ninye re li jun chik: «Kim», ut a'an nachalk; ut ninye re linmoos: «B'aanu a'in», ut a'an naxb'aanu.

¹⁰ Naq li Jesus kirab'i a'in, kisachk xch'ool ut kixye reheb' li yookeb' chi taaqenk re: —Relik chi yaal ninye eere naq maajun aj Israel intawom wi' xnimal paab'aal jo' a'in.

¹¹ Ninye eere naq naab'aleb' te'chalq sa' releb'l ut sa' rokeb'l saq'e, ut tole'hilanq sa' meex rochb'eeneb' laj Abrahán, laj Isahak ut laj Jakob, sa' li xnimajwal wankilal li choxa;

¹² ut eb' li ke'b'oqe'k xb'enwa chi ok sa' li xnimajwal wankilal li choxa, te'isiiq ut te'tz'eqe'q sa' li aak'ab' chirix kab'l: aran taawanq li yaab'ak ut li k'uxuxink ruuch e.

¹³ Chirix a'an kixye li Jesus re li xjolomileb' laj puub': —Ayu ut chi'uxq aawe jo' naq xapaab'. Ut kik'iraak li xmoos sa' ajwi' li honal a'an.

Kik'irtasiik li xna' li rixaqil laj Pedro

¹⁴ Naq kiwulak li Jesus sa' rochoch laj Pedro, kiril li xna' li rixaqil, yokyo ut yo xtiq.

¹⁵ Kixch'e' li ruq' ut li tiq ki'elk. Toja' naq kiwakliik li ixq ut ki'ok chi k'anjelak chiru.

¹⁶ Naq ki'ewuuk, ke'k'ame'k chaq rik'in li Jesus naab'aleb' li eechaninb'ileb' xb'aan laj tza; kirisiheb' li maa'us aj musiq'ej rik'in li raatin ut kixk'irtasi chixjunileb' li yaj.

¹⁷ Chi jo'kan kitz'aqlok ru li xyehom li propeet Isaías: “A'an kik'uluk re li qarahilal ut ki'iiqanink re li qayajel”.

Xtaaqenkil li Jesus

¹⁸ Naq kiril li Jesus naq sutsu xb'aaneb' li k'iila tenamit, kixye: —Xikaqo junpak'al li palaw.

¹⁹ Toja' naq jun aj tz'iib' kiwulak rik'in ut kixye re: —At Tzolonel, tatintaaqe yalaq ta b'ar tatxik.

²⁰ Li Jesus kixye re: —Eb' li yak wankeb' xjob' sa' pek ut eb' li xul li neke'rupupik chiru choxa wankeb' xsuk, ab'an li K'ajolb'ej maak'a' wank re b'arwi' tixsotob' li xjolom.

²¹ Jun chik reheb' li xtzolom kixye re: —Qaawa', kanab'in wan chi xik chi xmuqb'al linyuwa'.

²² Ut li Jesus kixye re: —Taaqehin ut kanab'eb' li kamenaq chi xmuqb'aleb' li xkamenaq.

Kich'anaak li iq' chiru li palaw

²³ Naq ki'ok sa' li jukub', kitaaqeek xb'aaneb' li xtzolom.

²⁴ Ut sa' junpaat kichalk chiru li palaw jun kaqsut-iq' k'ajo' xnimal: namuqun li jukub' xb'aan li xkaw oq li ha'. A'ut li Jesus yo chi wark.

²⁵ Ke'jilok li xtzolom chi xk'atq, ke'rajsi ut ke'xye re: —Qaawa', choohaakol xb'aan naq oso'k qe.

²⁶ Ut a'an kixye reheb': —K'a'ut naq nekexxiwak laa'ex li jwal kach'in leepaab'aal? Toja' naq kiwakliik, kixq'us li iq' ut li palaw, ut ch'anaamil kikanaak.

²⁷ Sachsookeb' xch'ool eb' li winq ut yookeb' chi xyeeb'al: —K'a' chi winqul a'in naq a'atq li iq' ut li palaw neke'paab'ank chiru?

Eb' li eechaninb'ileb' xb'aan laj tza aran Gadara

²⁸ Naq kiwulak li Jesus junpak'al li palaw, sa' xch'och'eb' laj Gadara, wiib' li winq eechaninb'ileb' xb'aan laj tza ke'elk chaq sa'eb' li muqleb'aal kamenaq ut koxe'xk'ul. Eb' a'an q'axal xiwajeleb'; jo'kan naq maa'ani naru nanume'k sa' li b'e a'an.

²⁹ Tikto ke'xjap reheb' chi xyeeb'al: —K'aru wank qe aawik'in, at Ralal li Yos? Ma xatchalk arin re qarahob'tesinkil chi toj maji' xq'ehil?

³⁰ Najt rik'ineb' a'an wank jun tuub' chi aaq, yookeb' chi ichajib'k.

³¹ Ut eb' laj tza ke'xtz'aama chiru: —Wi toohaawisi arin, taqlaho rik'ineb' li k'iila aaq a'an, chankeb'.

³² Ut a'an kixye reheb': —Ayuqex. Ut naq eb' a'an ke'elk, koheb' rik'ineb' li aaq ut chi junpaat chixjunil li xk'ihaleb' ke'xkut rib' sa' xteram li uul, jun t'anikeb' sa' li palaw, ut aran ke'kamk.

³³ Eb' laj ilol aaq ke'elelik ut, naq ke'wulak sa' li tenamit, koxe'xye resil chixjunil li kik'ulmank; ke'xye ajwi' li k'aru ke'xk'ul li wankeb' maa'us aj musiq'ej rik'ineb'.

³⁴ Tikto ke'elk chaq chixjunil li poyanam chi xk'ulb'al li Jesus ut, naq ke'ril ru, ke'relaji ru naq chi'elq sa' li xch'och'eb'.