San Mateo 3 - Q'eqchi Bible

II. XTIKLAJIK LI XK'ANJEL LI JESUS (3,1—4,25) Chetuqub'aq li xb'e li Qaawa'

¹ Sa'eb' li kutan a'an kox'okaq laj Jwan aj kub'sihomha' chi ch'olob'ank sa' li chaqich'och' wank Judea. A'an a'in li esil kixpuktesi:

² “Cheyot' eech'ool chejal eek'a'uxl, xb'aan naq li xnimajwal wankilal li choxa ak nach' wank”, chan.

³ Li propeet Isaías ki'aatinak junxil chirix laj Jwan naq kixye chi jo'ka'in: “Xyaab' xkux li japjo re sa' li chaqich'och': «Tuqub'omaq li xb'e li Qaawa', tiikob'resihomaq li ruq' b'e chiru»”.

⁴ Li raq' laj Jwan yiib'anb'il rik'in rix kameey, jun tz'uum-k'aam naxb'ak' wi' li xsa'; aj saak' naxtzeka rik'in xya'al saqk'aw.

⁵ Ut neke'wulak laj Jerusalén rik'in, jo'wi' chixjunileb' laj Judea ut eb' li tenamit wankeb' chi xk'atq li nima' Jordán.

⁶ Neke'xxooto li xmaakeb', ut laj Jwan naxkub'siheb' xha' sa' li nima' Jordán.

⁷ Ab'an naq kiril naq naab'aleb' laj Pariseey ut laj Saduseey yookeb' chi chalk rik'in re raj naq te'kub'siiq xha', kixye reheb': “Ex ral q'anb'olay, ani xk'utuk cheru elelik chiru li josq'il chaalel sa' eeb'een?

⁸ Chik'utunq b'i' sa' leeyu'am li naruuchin li yot'b'ach'oolej jalb'ak'a'uxl,

⁹ ut meeb'alaq'i eerib' chi xyeeb'al sa' leech'ool: «A' laj Abrahán a'an qayuwa'». Xb'aan naq ninye eere naq li Yos taaruhanq chi risinkil sa'eb' li pek a'in ralal xk'ajol laj Abrahán.

¹⁰ Ak wank li maal sa' xtoonaleb' li che'; ut chixjunil li che' ink'a' chaab'il li ru naxk'e, taayok'manq ut taakutmanq sa' xam.

¹¹ Laa'in ninkub'si eeha' yal rik'in ha', re naq teeyot' eech'ool teejal eek'a'uxl; ab'an li yo chi chalk chiwix a'an q'axal nim xwankil chiwu, ut laa'in ink'a' ink'ulub' xk'amb'al li xxaab'. A'an tixkub'si eeha' rik'in Santil Musiq'ej ut xam.

¹² Ak wan chaq xk'anjelob'aal sa' li ruq' ut tixyamtes li xch'oxleb'aal: tixk'uula li xtriiw sa' li xk'uuleb'aal, ab'an li xk'imal tixk'at sa' xam li maajoq'e taachupq”.

Xkub'ik xha' li Jesus

¹³ Toja' naq kichalk chaq li Jesus Galilea ut kiwulak rik'in laj Jwan sa' li nima' Jordán re naq taakub'siiq xha'.

¹⁴ A'ut laj Jwan ink'a' raj kiraj xkub'sinkil xha': —Laa'in raj tento naq taakub'si inha' -chan-. Chan put ru naq nakatchal wik'in?

¹⁵ Kichaq'ok li Jesus ut kixye re: —Kanab' wan chi jo'kan anaqwan, xb'aan naq jo'ka'in taatz'aqloq ru qab'aan chixjunil li rajom li Yos. Toja' naq kixk'ulub'an xch'ool laj Jwan.

¹⁶ Ut naq ak xkub'siik xha' li Jesus, ki'elk chaq chi junpaat sa' li ha'; toja' naq kitehonk li choxa ut kiril li xMusiq' li Yos yo chaq chi kub'eek sa' xb'een kama' junaq mukuy.

¹⁷ Ut ki'ab'iik jun xyaab' kuxej kichalk chaq sa' choxa, kixye: “A'an a'in li walal raaro inb'aan; rik'in a'in nasaho'k inch'ool”.