San Mateo 28 - Q'eqchi Bible

Li xwaklijik chi yo'yo li Jesus

¹ Naq ak xnume'k li sábado, hik'e'k re li xb'een kutan re li xamaan, lix María aj Magdala ut lix María jun chik koheb' chi rilb'al li muqleb'aal.

² Tikto kiwank jun nimla hiik: jun x'ánjel li Qaawa' kikub'e chaq sa' choxa, kinach'ok wan wi' li muqleb'aal, kixtolk'osi li pek ut kik'ojlaak sa' xb'een.

³ Nalemtz'unk li rilob'aal chanchan raq'kaaq, ut saq li raq' kama' li ratz'am ke.

⁴ K'ajo'eb' xxiw laj k'aak'alenel muqleb'aal naq ke'ril a'an: neke'siksotk aj chik ut chanchan kamenaq ke'kanaak.

⁵ Toja' naq li ánjel ki'ok chi raatinankileb' li ixq ut kixye reheb': —Mexxiwak. Ninnaw naq yookex chi xsik'b'al li Jesus, a' li kik'ehe'k chiru krus.

⁶ Maa'ani chik arin: xwakliik chi yo'yo kama' kixye. Kimqex, ilomaq li na'ajej b'arwi' xjilib'aak.

⁷ Ayuqex sa' junpaat chi xyeeb'al reheb' li xtzolom: «Xwakliik chi yo'yo sa' xyanqeb' li kamenaq, ut k'amolb'e cheru toj Galilea; aran toxeeril ru». Chek'e reetal, ak xinye eere.

⁸ Ak te'eelunq wan wi' li muqleb'aal chi yookeb' xxiw ut k'ajo' ajwi' xsahilaleb' xch'ool, koheb' sa' aanil chi xyeeb'al resil reheb' li xtzolom.

⁹ Toja' naq li Jesus ki'elk chi xk'ulb'aleb' ut kixye: “Ma sa sa' leech'ool”. Eb' a'an ke'jilok chi xk'atq, ke'xq'alu chi roq ut ke'xloq'oni.

¹⁰ Toja' naq li Jesus kixye reheb': —Mexxiwak. Ayuqex chi xyeeb'al reheb' li wiitz'in naq xikaqeb' Galilea; aran toxe'ril wu.

Li k'aru ke'xyoob' eb' li xb'eenil aj tij

¹¹ Naq yookeb' chi xik eb' li ixq, wankeb' aj k'aak'alenel muqleb'aal koheb' sa' li tenamit chi xyeeb'al reheb' li xb'eenil aj tij chixjunil li kik'ulmank.

¹² Ut eb' a'in ke'xch'utub' rib' rochb'eeneb' li cheekel winq, ke'ok chi k'uub'ank ut ke'xk'e naab'al li tumin reheb' laj puub', ut ke'xye reheb':

¹³ —Jo'ka'in teeye: «Ke'wulak chi q'eq eb' li xtzolom ut ke'relq'a li xtz'ejwal, naq yooko chi wark».

¹⁴ Ut wi ta tixnaw a'an laj Pilaat, laa'o tqak'e chixpaab' ut texqakol chiru chixjunil li ch'a'ajkilal.

¹⁵ Eb' a'an ke'xk'ul li tumin ut ke'xb'aanu jo' chaq'rab'inb'ileb' wi'. Ut li resil a'an kisutunk sa' xyanqeb' laj Judiiy chalen chaq toj anaqwan.

Li xnimal ru qataqlankil

¹⁶ Eb' li xjunlaju chi tzolom koheb' Galilea sa' xb'een li tzuul li ke'taqlaak wi' xb'aan li Jesus.

¹⁷ Ut naq ke'ril ru, ke'xloq'oni; ab'an wankeb' sa' xyanqeb' ink'a' ajwi' ke'xpaab'.

¹⁸ Kijilok li Jesus chi xk'atqeb', kiraatinaheb' ut kixye: —K'eeb'il we chixjunil li wankilal, jo' sa' choxa jo' ajwi' sa' ruuchich'och'.

¹⁹ Ayuqex b'i', ut k'ehomaqeb' cho'q intzolom chixjunileb' li tenamit. Teekub'siheb' xha' sa' xk'ab'a' li Yuwa'b'ej, li K'ajolb'ej ut li Santil Musiq'ej,

²⁰ ut k'utumaq chiruheb' xpaab'ankil chixjunil li xexintaqla wi'. Chenawaq naq laa'in wanqin eerik'in chixjunil li kutan toj sa' roso'jik li ruuchich'och'.