San Mateo 25 - Q'eqchi Bible

Li jaljookil ru aatin chirixeb' li lajeeb' chi tuq'ixq

¹ “Li taak'ulmanq sa' li xnimajwal wankilal li choxa chanchan li kik'ulmank sa' jun li sumlaak. Lajeeb' chi tuq'ixq ke'xk'am xsaqenkeb' naq ke'elk chi xk'ulb'al li b'eelomej.

² Oob' reheb' a'an maak'a'eb' xna'leb' ut oob' wankeb' xna'leb'.

³ “Eb' li maak'a'eb' xna'leb' ke'xk'am li xsaqenkeb' chi ink'a' ke'xk'am xya'al;

⁴ a'ut eb' li wankeb' xna'leb' ke'xk'am xsaqenkeb' jo' ajwi' li xya'al sa'eb' li meet.

⁵ Naq kib'ayk chaq li b'eelomej, ke'chalk xwara, ke'ok chi xiiqank chixjunileb' ut ke'kub'eek xwara.

⁶ “Tuqtu q'oqyink ki'ab'iik jun xyaab' kuxej: «We' chaq li b'eelomej! Elenqex chi xk'ulb'al!».

⁷ Toja' naq ke'wakliik chixjunileb' li tuq'ixq a'an ut ke'xk'uub' li xsaqenkeb'.

⁸ Ut eb' li maak'a'eb' xna'leb' ke'xye reheb' li wankeb' xna'leb': «K'ehomaq b'ayaq qe xya'al leesaqenk, xb'aan naq chupk re li qasaqenk».

⁹ Ab'anan eb' li wankeb' xna'leb' ke'xye: «Ink'a', mare anchal ink'a' taatz'aqloq iqe; ma' ta chik eere laa'ex tqataw. Jwal us texxik rik'ineb' laj k'ay ut toxeeloq' chaq eere».

¹⁰ “Naq yookeb' chi xik chi xloq'b'al, kol'elq li b'eelomej, ut eb' li yo'oon wankeb' ke'ok rochb'een sa' li kab'l chi xninq'ehinkil li sumlaak; ut kitz'ape'k li okeb'aal.

¹¹ “Moqon ke'wulak eb' li tuq'ixq junch'ol chik: «Qaawa', Qaawa', te li kab'l chiqu!», chankeb'.

¹² A'ut a'an kixsumeheb' ut kixye: «Relik chi yaal ninye eere, ink'a' ninnaw eeru».

¹³ “Chexyo'leq b'i' laa'ex, xb'aan naq ink'a' nekenaw jo'q'e xkutankil chi moko li xhonalil xk'ulunik li K'ajolb'ej.

Li jaljookil ru aatin chirix li tumin

¹⁴ “Li taak'ulmanq sa' li xnimajwal wankilal li choxa chanchan ajwi' li kik'ulmank naq jun li winq koho chi najt; kixb'oqeb' li xmoos ut kixq'axtesi li xjunkab'lal sa' ruq'eb'.

¹⁵ Oob' mil li tumin kixk'e re li jun, wiib' mil re li jun chik ut jun mil re li rox: kixk'e re li junjunq a' yaal chanru li xseeb'al xch'ool; ut koho chi najt.

¹⁶ “Li kik'uluk oob' mil tikto koho chi yakok chiru ut kireechani oob' mil chik sa' xb'een.

¹⁷ Jo'kan ajwi' li kik'uluk wiib' mil, kireechani wiib' mil chik sa' xb'een.

¹⁸ A'ut li kik'uluk jun mil koho chi xb'ekb'al jun li jul sa' ch'och' ut koxmuq xtumin laj eechal re.

¹⁹ “Ak najteraq chik a'an, kik'ulunk laj eechal reheb' li moosej a'an ut kixb'oqeb' chi xq'axtesinkil li xtumin.

²⁰ Kiwulak li kik'uluk oob' mil ut kixk'am chaq oob' mil chik: «Wa', oob' mil kaq'axtesi we; waye' oob' mil chik xweechani sa' xb'een», chan.

²¹ Ut laj eechal re kixye: «Us, chaab'il aj k'anjelat ut tiik aach'ool! Tiik aach'ool naq xatwank rik'in li b'a'b'ay, tink'e aawankil sa' xb'een naab'al chik. Tattz'aqonq sa' xsahilal xch'ool laj eechal aawe».

²² “Kiwulak ajwi' li kik'uluk wiib' mil; kixye: «Wa', wiib' mil kaq'axtesi we; waye' wiib' mil chik xweechani sa' xb'een».

²³ Ut laj eechal re kixye re: «Us, chaab'il aj k'anjelat ut tiik aach'ool! Tiik aach'ool naq xatwank rik'in li b'a'b'ay, tink'e aawankil sa' xb'een naab'al chik. Tattz'aqonq sa' xsahilal xch'ool laj eechal aawe».

²⁴ “Kiwulak ajwi' li kik'uluk jun mil: «Wa', xink'e reetal naq josq' aj winqat -chan-. Nakatq'olok b'arwi' ink'a' xat-awk ut nakatxokok b'arwi' ink'a' xathirok.

²⁵ Kinxiwak ut koxinmuq sa' ch'och' laatumin. Il, waye' laatumin».

²⁶ A'ut laj eechal re kixchaq'b'e ut kixye: «At maa'us aj k'anjel, aj q'emat! Ak nakanaw naq ninq'olok b'arwi' ink'a' xin'awk ut ninxokok b'arwi' ink'a' xinhirok.

²⁷ Jo'kan naq xak'e raj lintumin reheb' laj yakol tumin ut sa' linsutq'ijik chaq, xink'ul raj wi' chik li we rochb'een li ral.

²⁸ Maq'omaq b'i' chiru li jun mil ut k'ehomaq re li wank lajeeb' mil rik'in.

²⁹ Xb'aan naq yalaq ani wank k'aru re, taak'eemanq xkomon re ut taa'ela'anq chiru; a'ut li maak'a' wank re, a' ajwi' li k'aru re taamaq'manq chiru.

³⁰ Ut laj k'anjel a'in li maak'a' na'ok wi', kutomaq sa' aak'ab'. Aran taawanq li yaab'ak ut li k'uxuxink ruuch e».

Li raqb'a aatin sa' roso'jikeb' li kutan

³¹ “Naq taak'ulunq chaq li K'ajolb'ej sa' li xnimal xloq'al rochb'eenaqeb' chaq chixjunileb' li x'ánjel, toja' naq taak'ojlaaq sa' li xloq'laj k'ojarib'aal.

³² Chixjunileb' li tenamit talaje'ch'utub'aaq chiru, ut taarisi li junch'ol sa' xyanqeb' li junch'ol chik, jo' laj k'aak'alenel ketomq narisiheb' li karneer sa' xyanqeb' li chib'aat.

³³ Ut tixk'eheb' li karneer sa' xnim uq', ut eb' li kok' chib'aat sa' xtz'e.

³⁴ “Toja' naq li Rey tixye reheb' li wanqeb' sa' xnim uq': «Kimqex laa'ex, osob'tesinb'ilex xb'aan linYuwa'! Eechanihomaq li nimajwal wankilal kawresinb'il cho'q eere chalen chaq sa' xk'ojlajik li ruuchich'och'.

³⁵ Xb'aan naq xintz'okaak chaq, ut xineek'e chi wa'ak; xchaqik we, ut xek'e wuk'a'; xinsik' wochochnaal, ut xineek'ul sa' leerochoch.

³⁶ Xint'usq'i, ut xineetiqib'; xinyajerk, ut xineerula'ani; xinwank sa' tz'alam, ut koxineeril chaq».

³⁷ “Toja' naq te'chaq'oq li tiikeb' xch'ool: «Qaawa', jo'q'e tab'i' xatqil chi tattz'okaaq, ut xatqak'e ta chi wa'ak; malaj xatqil chi taachaqiq aawe, ut xatqak'e ta chi uk'ak?

³⁸ Jo'q'e tab'i' xatqil chi maak'a' aawochochnaal, ut xatqak'ul ta qik'in; malaj chi t'ust'uukat, ut xatqatiqib' ta chaq?

³⁹ Jo'q'e tab'i' xatqil chi yajat malaj sa' tz'alam, ut koxatqil ta chaq?», cha'qeb' re.

⁴⁰ Ut li Rey tixye reheb': «Relik chi yaal ninye eere: jo'ch'inal jo'nimal xeb'aanu chaq reheb' linkok' iitz'in a'in q'axal kok'eb', we laa'in xeb'aanu chaq».

⁴¹ “Toja' naq tixye ajwi' reheb' li wanqeb' sa' xtz'e uq': «Elenqex chiwu, maa'usilanb'ilex. Ayuqex sa' li xam li ink'a' nachup, kawresinb'il cho'q re laj tza ut eb' laj k'anjel chiru.

⁴² Xb'aan naq xintz'okaak chaq, ut ink'a' xineek'e chi wa'ak; xchaqik we, ut ink'a' xek'e wuk'a';

⁴³ xinsik' wochochnaal, ut ink'a' xineek'ul eerik'in; xint'usq'i, ut ink'a' xineetiqib'; xinyajerk, xinwank sa' tz'alam, ut ink'a' xineerula'ani chaq».

⁴⁴ “Toja' naq te'chaq'oq ajwi' eb' a'an: «Qaawa', jo'q'e tab'i' xatqil chaq chi tattz'okaaq, chi taachaqiq aawe, chi maak'a' aawochochnaal, chi t'ust'uukat, chi yajat malaj sa' tz'alam, ut ink'a' xook'anjelak chawu?», cha'qeb' re.

⁴⁵ Ut a'an tixsumeheb' ut tixye: «Relik chi yaal ninye eere naq jo'ch'inal jo'nimal ink'a' xeb'aanu re junaq reheb' a'in li q'axal kok'eb', chi moko we laa'in xeb'aanu chaq».

⁴⁶ Ut te'xik eb' a'in sa' li tojb'amaak chi junelik, ut eb' li tiikeb' xch'ool te'xik sa' li junelik yu'am”.