San Mateo 24 - Q'eqchi Bible

XI. XSEERAQ' LI JESUS CHIRIX LI ROSO'JIK LI RUUCHICH'OCH' (24,1—25,46) Xtiklajik li xnimal rahilal

¹ Ki'elk li Jesus sa' rochoch li Yos ut naq yo chi xik, eb' li xtzolom ke'nach'ok rik'in re xk'utb'al chiru li k'iila kab'l wankeb' sa' xweent li rochoch li Yos.

² Ut li Jesus kixye reheb': —Nekeril chixjunil a'in, pe' yaal? Relik chi yaal ninye eere: ink'a' taakanaaq arin pek chi xb'een pek chi ink'a' ta taajuk'manq.

³ Chirix a'an, naq ak chunchu sa' xb'een li tzuul Olivos, eb' li xtzolom ke'jilok chi xk'atq naq wank xjunes ut ke'xye re: —Ye qe jo'q'e taak'ulmanq a'in ut k'aru reetalil laachalik ut li roso'jik li ruuchich'och'.

⁴ Kichaq'ok li Jesus ut kixye reheb': —Chek'ehaq reetal re naq maa'ani chib'alaq'inq eere.

⁵ Xb'aan naq naab'aleb' te'chalq ut te'roksi link'ab'a': «Laa'in li Kriist», cha'qeb', ut naab'aleb' te'b'alaq'iiq.

⁶ Teerab'ihatq naq yooq li kamsij ib' malaj ut yal resil li yalok, ab'anan chek'ehaq reetal, mexxiwak! Xb'aan naq tento taak'ulmanq a'in; ab'an toj maji'aq li roso'jik.

⁷ Te'waklije'q chi xkamsinkil rib'eb' tenamit rik'in jalan chik tenamit, li awab'ej rik'in jalan chik awab'ej, ut taawanje'q we'ej ut hiik sa' naab'al chi na'ajej.

⁸ Chixjunil a'in a'anaq li xtiklajik li nimla rahilal.

⁹ “Toja' naq texq'axtesiiq chi rahob'tesiik, texkamsiiq ut xik' tex'ile'q xb'aaneb' chixjunil li tenamit sa' ink'ab'a'.

¹⁰ Naab'aleb' te'luktaaq xch'ool sa'eb' li kutan a'an, te'xb'alaq'i rib' ut xik' te'ril rib' chirib'ileb' rib'.

¹¹ Te'waklije'q chaq propeet aj b'alaq' ut xiikileb' li te'b'alaq'iiq xb'aaneb' a'an.

¹² Taanumtaaq li maa'usilal, jo'kan naq taakeho'q li rahok sa' xch'ool li xk'ihaleb' li tenamit.

¹³ Ab'anan ani tixk'e xch'ool toj sa' roso'jik, a'an taakole'q.

¹⁴ Ut taapuktesimanq li chaab'il esilal a'in chirix li xnimajwal wankilal li choxa sa' chixjunil li ruuchich'och' re xch'olob'ankil li yaal chiruheb' chixjunil li tenamit: toja' naq taachalq li roso'jik.

Li xnimal xrahilal Jerusalén

¹⁵ “Jo'kan utan, naq teeril li xnimal tz'i'b'eetalil yeeb'il chaq xb'aan li propeet Daniel yooq sa' li santil na'ajej (li na'ilok ru hu chixtawaq xyaalal),

¹⁶ toja' naq eb' li wanqeb' Judea eleliqeb' ut che'xikaq toj chiru tzuul;

¹⁷ li wanq chaq sa' xb'een li kab'l mikub'eek chi xxokb'al li k'aru wank sa' li rochoch,

¹⁸ ut li wanq chaq sa' xk'al misutq'iik chi xxokb'al li xt'ikr.

¹⁹ Ra chaalel sa' xb'eeneb' li yaj aj ixq ut li yooqeb' chi tu'resink sa'eb' li kutan a'an!

²⁰ Chextijoq re naq leerelik ink'a' chik'ulmanq sa' hab'alq'e chi moko sa' sábado.

²¹ Xb'aan naq k'ajo'aq xnimal li rahilal taawanq sa'eb' li kutan a'an: maajun wa wanjenaq jo' a'an chalen chaq sa' xtiklajik li ruuchich'och' toj anaqwan, chi moko taak'ulmanq chik.

²² Ut wi ink'a' taak'osmanq li xk'ihaleb' li kutan a'an, maa'ani raj taakole'q; ab'an, sa' xk'ab'a' li sik'b'ileb' ru, taak'osmanq li xk'ihaleb' li kutan a'an.

²³ “Toja' naq wi junaq taayehoq eere: «Ilomaq, we' li Kriist», malaj: «Le' wank», meepaab'.

²⁴ Xb'aan naq naab'aleb' aj b'alaq' te'wakliiq ut te'xye naq a'aneb' li Kriist ut a'aneb' propeet; te'xb'aanuhatq xninqaleb' ru eetalil ut sachb'ach'oolej re xb'alaq'inkil li sik'b'ileb' ru, wi raj taaruuq.

²⁵ K'ehomaq reetal, ak junxilaj xinye resil eere.

²⁶ Wi ut te'xye eere: «Ilomaq, wank sa' chaqich'och'», mexxik; malaj te'xye: «Wank sa' kab'l le'», meepaab'.

²⁷ Xb'aan naq jo' li raq'kaaq na'elk chaq sa' releb'l saq'e ut nak'utunk toj sa' rokeb'l, jo'kanaq ajwi' li xk'ulunik li K'ajolb'ej.

²⁸ B'ar wanq li kamenaq, aran te'xch'utub' rib' eb' li so'sol.

Li xnimal xk'ulunik li Kriist

²⁹ “Akaq xk'ulmank li nimla rahilal a'an, li saq'e taaq'oqyino'q ru chi junpaat, li po ink'a' chik taasaqeno'q ru, eb' li chahim sa' choxa te't'anje'q chaq ut li xwankilal li choxa taachiq'chiq'iiq sa' xna'aj.

³⁰ Toja' naq taak'utunq chaq sa' choxa li reetalil li K'ajolb'ej ut te'xten li re xch'ooleb' chixjunil li xteepaleb' li ruuchich'och': te'ril li K'ajolb'ej yooq chaq chi k'ulunk sa' xb'eeneb' li choql sa' choxa, rik'in xnimal xwankil ut xloq'al.

³¹ Ut tixtaqlaheb' li x'ánjel rik'in xkawil yaab' tronpeet sa' xkaaxukuutil li ruuchich'och' re xch'utub'ankil li sik'b'ileb' ru xb'aan, chalen chaq sa' xtiklajik li choxa toj sa' xmaril.

³² “Rik'in li xche'el li iig chetzolaq li jaljookil ru aatin a'in. Naq ak naq'unq'utk li ruq' ut yo chi yo'laak li xxaq, aran nekenaw naq xnach'ok chaq li saq'ehil.

³³ Jo'kan ajwi' laa'ex, naq teeril chixjunil a'in, chenawaq naq ak nach' wan chaq li K'ajolb'ej; ak wank chire li kab'l.

³⁴ Relik chi yaal ninye eere naq ink'a' taanume'q li tenamit a'in chi toj maji'aq talajk'ulmanq chixjunil a'an.

³⁵ Li choxa ut li ruuchich'och' te'oso'q, a'ut li waatin ink'a' taanume'q.

Yo'lenqex!

³⁶ “A'ut chirix li kutan a'an malaj li xhonalil, maa'ani nanawok jo'q'e, chi moko eb' li ánjel sa' choxa chi moko li K'ajolb'ej, ka'ajwi' li Yuwa'b'ej.

³⁷ “Li k'aru kik'ulmank naq kiwank laj Noé, taak'ulmanq ajwi' sa' xk'ulunik li K'ajolb'ej.

³⁸ Jo' rub'elaj chaq li b'ut'iha' yookeb' chaq chi wa'ak chi uk'ak, yookeb' chi k'amok ut chi k'ame'k toj sa' li kutan ki'ok wi' laj Noé sa' li jukub' kab'l,

³⁹ ut ink'a' ke'xtaw xyaalal toj kichalk li b'ut'iha' ut kilaje'jukuuk chixjunileb', jo'kanaq ajwi' sa' xk'ulunik li K'ajolb'ej.

⁴⁰ Sa'eb' li kutan a'an wanqeb' chaq wiib' chi winq sa' xk'al: jun taaxoke'q ut jun taakanab'aaq;

⁴¹ wiib'eb' chi ixq yooqeb' chi ke'ek sa' li ke'leb': jun taaxoke'q ut jun taakanab'aaq.

⁴² “Chexyo'leq b'i', xb'aan naq ink'a' nekenaw k'aru kutankil tol'elq leeQaawa'.

⁴³ Chenawaq ut a'in: wi laj eechal kab'l tixnaw ta jo'q'e honal re li q'oqyink taachalq laj elq', taayo'leq raj ut ink'a' raj tixkanab' chi weqe'k li rochoch.

⁴⁴ Jo'kan utan, laa'ex ajwi' yo'oon wanqex, xb'aan naq maak'a'aq sa' eech'ool naq tol'elq li K'ajolb'ej.

Li jaljookil ru aatin chirix li chaab'il aj k'anjel

⁴⁵ “Ani li moosej tiik xch'ool ut wank xna'leb' li kik'ehe'k xwankil xb'aan laj eechal re sa' xb'eeneb' li rech moosil re xk'eeb'al xwaheb' sa' xq'ehil?

⁴⁶ Us xaq re li moosej a'an li toltawe'q chi xb'aanunkil a'in naq tol'elq laj eechal re.

⁴⁷ Relik chi yaal ninye eere naq tixxaqab' chi xjolominkil chixjunil li xjunkab'lal.

⁴⁸ Ab'anan, wi li moosej ink'a' us xna'leb' tixye sa' xch'ool: «Laj eechal we xb'ay chaq»,

⁴⁹ ut taa'ok chi xsak'b'aleb' li rech moosil, taawa'aq ut taa'uk'aq rochb'eenaqeb' laj kalajenaq,

⁵⁰ taak'ulunq laj eechal re li moosej a'an sa' li kutan ink'a' wi' naxyo'oni ut sa' li honal maak'a' wi' sa' xch'ool,

⁵¹ taarisi ut tixk'e xna'aj sa' xyanqeb' laj ka'pak'al u: aran taawanq li yaab'ak ut li k'uxuxink ruuch e.