San Mateo 23 - Q'eqchi Bible

Li Jesus ki'aatinak chirixeb' laj tz'iib' ut eb' laj pariseey

¹ Toja' naq li Jesus kiraatinaheb' li tenamit jo'wi' eb' li xtzolom,

² ut kixye reheb': “Sa' li xk'ojarib'aal laj Moisés xe'k'ojlaak eb' laj tz'iib' ut eb' laj pariseey.

³ Cheb'aanu ut chepaab' chixjunil li te'xye eere, ab'anan meeb'aanu jo' neke'xb'aanu eb' a'an, xb'aan naq neke'xye ut ink'a' neke'xb'aanu.

⁴ Q'axal aal li iiq neke'xb'ak' ut neke'xk'e sa' xb'eeneb' li tenamit, a'ut eb' a'an chi moko rik'in ru'uj ruq'eb' neke'raj reek'asinkil.

⁵ Chixjunil nalaje'xb'aanu yal re naq ilb'ilaqeb' xb'aaneb' li tenamit: neke'xyu' li xloq'laj eetalil li Chaq'rab' chi xpeekemeb' jo'wi' chiruheb' li xtel, ut neke'xtiq xsahob' ru li re li raq'eb';

⁶ neke'raj wank chi xjolomil li meex naq neke'wa'ak ut neke'xsik' li xb'een na'ajej sa'eb' li ch'utleb'aal kab'l;

⁷ neke'raj naq te'k'ehe'q xsahilaleb' xch'ool sa'eb' li k'ayiil, jo'wi' naq «Tzolonel» te'yehe'q re xb'aaneb' li tenamit.

⁸ “A'ut laa'ex mixk'ul eech'ool xk'ab'a'inkil aj tzolonel, xb'aan naq jun ajwi' laj Tzolol eere ut chejunilex laa'ex eeriitz'in eerib'.

⁹ Maa'ani cheye wi' «Qayuwa'» sa' ruuchich'och', xb'aan naq jun ajwi' leeYuwa', a' li wank sa' choxa.

¹⁰ Chi moko chixk'ul eech'ool xk'ab'a'inkil aj k'amol b'e, xb'aan naq jun ajwi' laj K'amol eeb'e, a'an li Kriist.

¹¹ Li ani nim xwankil sa' eeyanq a'anaq aj k'anjel cheru.

¹² Li ani naxnimob'resi rib', taakub'siiq xwankil, ut li ani naxkub'si rib', taaterq'usiiq xwankil.

Wuqub' sut ke'q'use'k eb' laj tz'iib' ut eb' laj pariseey

¹³ “Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: neketz'ap li xnimajwal wankilal li choxa chiruheb' li tenamit! Xb'aan naq ink'a' nekex'ok laa'ex, ut nekeram chiruheb' li neke'raj raj ok.

¹⁵ “Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: nekesuti li palaw ut li ruuchich'och' re xsik'b'al ani taa'okenq cherix ut, naq ak xetaw chaq, nekek'e cho'q ralal li xb'alb'a ka' sut chik cheru laa'ex!

¹⁶ “Ra chaalel sa' eeb'een laa'ex aj k'amol b'e, ink'a' nekex'ilok ut nekeye: «Wi junaq tixpatz' li rochoch li Yos sa' jurament, a'an maak'a' reek'; a'ut li tixpatz' li x'oor li rochoch li Yos sa' jurament, a'an tento tixb'aanu li k'aru xye».

¹⁷ Maak'a' eena'leb' ut mutz'ex, xb'aan naq b'ar wank li q'axal nim xwankil: ma li oor malaj li rochoch li Yos li nasantob'resink re li oor?

¹⁸ Jo'kan ajwi' nekeye: «Wi junaq tixpatz' sa' jurament li artal, a'an maak'a' reek'; a'ut li ani tixpatz' sa' jurament li mayej li wank sa' xb'een li artal, a'an tento tixb'aanu li k'aru xye».

¹⁹ Ex mutz'! B'ar wank li q'axal nim xwankil: ma li mayej malaj li artal li nasantob'resink re li mayej?

²⁰ Li ani tixpatz' sa' jurament li artal, tixpatz' ajwi' chixjunil li wank sa' xb'een.

²¹ Li tixpatz' sa' jurament li rochoch li Yos, naxpatz' ajwi' li Yos li nawank chisa'.

²² Ut li ani tixpatz' sa' jurament li choxa, naxpatz' li xk'ojarib'aal li Yos jo' ajwi' Li k'ojk'o sa' xb'een.

²³ “Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: neketoj li xlajeetqil li isk'i'ij, li anis ut li komino, ut xekanab' xpaab'ankil li q'axal nim xwankil sa' li Chaq'rab': a' li tiikilal, li uxtaanank ut li paab'aal! Chixjunil a'in tento raj xeb'aanu, ab'an ink'a' raj xekanab' xb'aanunkil li junch'ol chik.

²⁴ Ex aj k'amol b'e ink'a' nekex'ilok! Neketz'ileb' li kok' suq ut nekenuq' li kameey!

²⁵ “Ra chaalel sa' eeb'een laa'ex aj tz'iib' ut aj Pariseey aj ka'pak'al uhex: nekech'aj rix li sek' ut li pulaat, a'ut li xsa' nujenaq chi elq' ut maa'usilal!

²⁶ At aj Pariseey ink'a' nakat-ilok, ch'aj xb'enwa xsa' li sek' re naq ch'ajb'ilaq ajwi' li rix!

²⁷ “Ra chaalel sa' eeb'een laa'ex aj tz'iib' ut aj Pariseey aj ka'pak'al uhex, xb'aan naq chanchanex li muqleb'aal kamenaq chuninbil: ch'ina'us rilb'aleb' li rix, ab'an chisa' nujenaqeb' chi xb'aqel kamenaq ut chixjunil li k'a'aq re ru chi tz'ajnil!

²⁸ Jo'kan ajwi' laa'ex, tiik eech'ool yal chiruheb' li poyanam, ab'an chisa' nujenaqex chi b'alaq' ut maa'usilal!

²⁹ “Ra chaalel sa' eeb'een laa'ex aj tz'iib' ut aj Pariseey aj ka'pak'al uhex, xb'aan naq nekeyiib' xmuqleb'aaleb' li propeet ut nekerutz'u'uji ru li xmuqleb'aaleb' li tiikeb' xch'ool,

³⁰ ut nekeye: «Wi ta xoowank chaq sa' xkutaneb' li qana' qayuwa', ink'a' raj xoo'okenk chirixeb' chi xkamsinkileb' li propeet!».

³¹ Chi jo'kan nekejit eerib' ut nekeye naq laa'ex ralal xk'ajolex li xe'kamsink reheb' li propeet.

³² Chenujob'resi b'i' li xb'isleb' leena' leeyuwa'!

Li rahilal chaalel sa' xb'eeneb' laj tz'iib' ut eb' laj pariseey

³³ “Ex k'anti', ralex q'anb'olay! Chanru naq tex'eleliq chiru li tojb'amaak sa' xb'alb'a?

³⁴ Jo'kan utan laa'in tintaqlaheb' li propeet eerik'in, eb' laj k'ehol na'leb' ut eb' laj tz'iib': wan teekamsiheb' ut teek'eheb' chiru krus, wankeb' chik teerapeb' chi tz'uum sa'atqeb' leech'utleb'aal kab'l ut teesik'eb' sa' junjunq chi tenamit re xchapb'aleb',

³⁵ re naq taachalq sa' eeb'een chixjunil li xkik'el li tiikeb' xch'ool li kihoye'k sa' ruuchich'och' chalen chaq sa' li xkamik laj Abel li tiik xch'ool toj rik'in li xkik'el laj Sakarías, ralal laj Barakías, li kekamsi sa' xyanq rochoch li Yos rik'in li artal.

³⁶ Relik chi yaal ninye eere: chixjunil a'in tixk'am chaq tojb'amaak sa' xb'een li tenamit a'in.

Kiraho'k xch'ool li Jesus chirix Jerusalén

³⁷ “At Jerusalén, Jerusalén, li nakakamsiheb' li propeet ut nakakuteb' chi pek li taqlanb'ileb' chaq aawik'in! K'ajo' naq xwaj raj xch'utub'ankileb' laawalal aak'ajol, kama' junaq kaxlan naxkupuheb' li ral rub'el li xxik', ut ink'a' xeraj!

³⁸ Ut anaqwan nakirirnak aj chik taakanab'aaq leerochoch!

³⁹ Ninye eere naq ink'a' chik teeril wu toj reetal teeye: «Usilaatinanb'il li xchalk sa' xk'ab'a' li Qaawa'!»”.