San Marcos 7 - Q'eqchi Bible

Li xchaq'rab' li Yos ut li xna'leb'eb' laj Pariseey

¹ Ke'xch'utub' rib' rik'in li Jesus eb' laj Pariseey jo'wi' eb' laj tz'iib' li ke'chalk chaq Jerusalén.

² Ke'ril naq wankeb' xtzolom li Jesus neke'wa'ak chi tz'aj ruq'eb', naraj naxye ink'a' neke'ch'ajok

³ (xb'aan naq eb' laj Pariseey ut chixjunileb' laj Judiiy ink'a' neke'wa'ak, wi ink'a' xe'xch'aj xb'enwa li ruq'eb' toj chi rit xteleb', a' kaw neke'xpaab' li xe'toonil na'leb';

⁴ naq neke'sutq'iik chaq sa' k'ayiil, ink'a' neke'wa'ak, wi ink'a' xe'xch'ajob'resi rib'. Ut wank chik naab'al xe'toonil na'leb' neke'xpaab', kama' li xch'ajob'resinkil li uk'leb' sek', li xaar ut li perpookil sek'),

⁵ jo'kan naq eb' laj Pariseey ut eb' laj tz'iib' ke'xpatz' re: —K'a'ut naq eb' laatzolom ink'a' neke'xb'aanu jo' k'utb'il chiqu xb'aaneb' li qaxe' qatoon, naq neke'wa'ak chi tz'aj ruq'eb'? chankeb'.

⁶ Ut li Jesus kixye reheb': —Yaal li kixye laj Isaías cherix laa'ex, aj ka'pak'al u, jo' naq tz'iib'anb'il: «Li tenamit a'in rik'in xtz'uumal reheb' nikine'roxloq'i, a'ut li xch'ooleb' najt wank wik'in.

⁷ Maak'a' aj e naq nikine'roxloq'i, xb'aan naq li k'aru neke'xk'ut chiruheb' li tenamit yal xtaqlahomeb' li winq».

⁸ Nekekanab' li xchaq'rab' li Yos ut a' chik li xnajteril na'leb' li winq nekepaab'.

⁹ Kixye ajwi' reheb': —Tz'aqal a' li xchaq'rab' li Yos neketz'eqtaana re xpaab'ankil li najteril na'leb' kanab'anb'il chaq eere.

¹⁰ Xb'aan naq laj Moisés kixye: «Chawoxloq'i laana' laayuwa'», ut: «Ani tixmajewa li xna' xyuwa' tixtoj rix li xmaak rik'in kamk».

¹¹ A'ut laa'ex nekeye: «Wi junaq tixye re li xna' xyuwa': Tatintenq'a raj, ab'an li k'aru we a'an korbán -chi jalb'il ru naraj naxye: ak mayejanb'il chik-,

¹² li winq a'an ink'a' chik tento tixtenq'a li xna' xyuwa' eeb'aan laa'ex».

¹³ Chi jo'kan nekesach xwankil li Raatin li Yos xb'aan li najteril na'leb' li neketzol wi' eerib'. Ut naab'al chik k'a'aq re ru xkomon a'in nalajeeb'aanu.

¹⁴ Li Jesus kixb'oqeb' wi' chik li tenamit ut kixye reheb': —Chineerab'ihaq chejunilex ut chetawaq xyaalal.

¹⁵ Maak'a' wank li tixtz'ajni li winq naq taa'ok chisa'; a' b'an li na'elk chaq rik'in li winq natz'ajnink re.

¹⁶ Ani wank xxik re ab'ink, chi'ab'inq.

¹⁷ Naq li Jesus kixkanab'eb' li k'iila tenamit, kox'okaq sa' kab'l ut eb' li xtzolom ke'xpatz' re xyaalalil li jaljookil ru aatin.

¹⁸ Ut a'an kixye reheb': —Ma jo'ka'in naq namajelo'k ajwi' leena'leb' laa'ex? Ma ink'a' neketaw ru naq chixjunil li na'ok rik'in li winq moko a'an ta li natz'ajnink re,

¹⁹ xb'aan naq ink'a' na'ok sa' li xch'ool, na'ok b'an sa' li xsa' ut taaxik sa' li tz'eqleb'aal mul? Rik'in a'an kixye naq chixjunil li tzekemq maak'a' xtz'ajnil.

²⁰ Ut kixye ajwi': —Li na'elk chaq rik'in li winq, a'an li natz'ajnink re,

²¹ xb'aan naq chisa' li xch'ool na'elk chaq li ink'a' usil na'leb': li ko'b'eetak yumb'eetak, elq'ak, kamsink,

²² muxuk sumlaak, pixilal, maa'usilal, b'alaq'ik, tz'i'b'eetalil na'leb', kaqalik, majewank, q'etq'etil, maak'a'il na'leb'.

²³ Chixjunil li maa'usilal a'in na'elk chaq sa' xch'ool li winq ut a'an natz'ajnink re.

III. LI XK'ANJEL LI JESUS MOKO SA' XTEEPAL TA GALILEA (7,24—10,52) Li ixq aj Sirofenicia

²⁴ Naq li Jesus ki'elk aran, koho sa' xteepal Tiro, kox'okaq sa' jun li kab'l ut kiraj raj naq maa'ani chinawoq re, ab'an ink'a' kiru kiwank chi muqmu.

²⁵ Chi junpaat jun li ixq li wank xch'ina ko' eechaninb'il xb'aan tz'ajn aj musiq'ej, kirab'i resil li Jesus, kichalk ut kolxkut rib' chi roq.

²⁶ Li ixq a'in maawa' aj Judiiy li xpaab'aal, a'an jun li ixq aj Fenicia wank sa' xteepal Siria; ut ki'ok chi relajinkil ru re naq chirisihaq li maa'us rik'in li xko'.

²⁷ Ab'an li Jesus kixye re: —Wa'aqeb' wan xb'enwa eb' li alal k'ajolb'ej, xb'aan naq moko us ta xmaq'b'al xwaheb' li alal k'ajolb'ej re xk'eeb'al reheb' li kok' tz'i'.

²⁸ A'ut a'an kichaq'ok: —Yaal, Qaawa', ab'anan eb' li kok' tz'i' neke'xwa' ajwi' li xk'aj xwaheb' li kok'al rub'el li meex, chan.

²⁹ Toja' naq li Jesus kixye re: —Ayu. Rik'in li aatin xaye x'elk li maa'us rik'in laako'.

³⁰ Naq kisutq'iik li ixq sa' rochoch, koxtaw li ch'ina ixqa'al yokyo sa' ch'aat, ut li maa'us aj musiq'ej elenaq chik rik'in.

Kixk'irtasi jun li winq tz'ap xxik ut tat re

³¹ Ki'elk chaq sa' xteepal Tiro, kinume'k Sidón ut kiwulak wi' chik chire li palaw re Galilea, sa' xteepaleb' li Lajeeb' chi Tenamit.

³² Toja' naq ke'xk'am chaq jun tz'ap xik ut tat re, ut ke'relaji ru re naq tixk'e li ruq' sa' xb'een.

³³ Li Jesus kirisi xjunes li winq sa' xyanqeb' li tenamit, kixch'ikeb' li ru'uj ruq' sa' xxik ut rik'in xya'al re kixch'e' li ru'uj raq'.

³⁴ Kixtaqsi li rilob'aal sa' choxa, kixjiq' xch'ool ut kixye re: “Effatá”, chi jalb'il ru naraj naxye: “Teliiqat!”.

³⁵ Ut ke'tehonk li xxik, ak taahite'q li b'ak'b'o wi' li ru'uj raq', ut us ki'ok chi aatinak.

³⁶ Li Jesus kixchaq'rab'iheb' naq maa'ani aj e che'xye a'in; ab'an, naq kaw naxchaq'rab'iheb', k'ajo' chik naq neke'xpuktesi resil.

³⁷ Ut numtajenaq xsachikeb' xch'ool: “Xb'aanu chixjunil chi chaab'il -chankeb'-. Naxk'e chi ab'ink eb' li tz'ap xxik ut chi aatinak eb' li mem”.