San Marcos 4 - Q'eqchi Bible

Li jaljookil ru aatin chirix laj awinel

¹ Ki'ok wi' chik chi xtzolb'aleb' li tenamit chire li palaw, ut q'axal naab'aleb' ke'ch'utlaak rik'in: jo'kan naq ki'ok ut kik'ojlaak sa' jun li jukub', sa' li palaw.

² Ut naab'al li na'leb' kixtzoleb' wi' sa' jaljookil ru aatin. Kixye reheb' chi jo'kan naq yo chi xtzolb'aleb':

³ “Ab'ihomaq. Ki'elk jun aj awinel chi awk.

⁴ Ut naq yo chi awk, wan iyaj kinaqk chire li b'e; ke'chalk eb' li kok' xul ut ke'xwa'.

⁵ Wan chik kinaqk sa' pek ru, b'arwi' jay ru li ch'och': kimoqk chi junpaat xb'aan naq ink'a' cham li ch'och';

⁶ ab'an, naq ki'elk chaq li saq'e, kik'atk ut kichaqik xb'aan naq maak'a' li xxe'.

⁷ Wan ajwi' iyaj kinaqk sa' k'ix ru ut, naq kichamo'k li k'ix, kinat'e'k li iyaj, ut ink'a' ki'uuchink.

⁸ Ut wan chik iyaj kinaqk sa' chaab'il ch'och', kik'iik, kichamo'k ut ki'uuchink: wan kixk'e lajeeb' xka'k'aal, wan chik oxk'aal ut wan chik o'k'aal”.

⁹ Toja' naq kixye: “Ani wank xxik re ab'ink, chi'ab'inq”.

K'a'ut naq li Jesus na'aatinak sa' jaljookil ru aatin

¹⁰ Naq kikanaak xjunes li Jesus, eb' li ke'kanaak rik'in rochb'eeneb' li Kab'laju ke'xpatz' re xyaalalil eb' li jaljookil ru aatin.

¹¹ Ut a'an kixye reheb': “K'eeb'il eere laa'ex xnawb'al xyaalal li muqmuukil na'leb' chirix li xnimajwal awab'ejihom li Yos, ab'an reheb' li junch'ol chik chixjunil nak'eemank sa' jaljookil ru aatin

¹² re naq, us ta te'iloq maak'a' te'ril, us ta te'ab'inq maak'a' te'xtaw ru. Mare anchal te'xyot' xch'ool te'xjal xk'a'uxl ut te'kuye'q te'sache'q li xmaakeb'”.

Xyaalalil li jaljookil ru aatin chirix laj awinel

¹³ Ut kixye reheb': “Ma ink'a' neketaw ru li jaljookil ru aatin a'in? Chan put ru naq teetaw xyaalal chixjunileb' li jaljookil ru aatin?

¹⁴ Laj awinel naraw li Aatin.

¹⁵ Li wankeb' chire li b'e, a'aneb' li na'awe' wi' li Aatin, ab'an naq ak xe'rab'i, sa' junpaat nachalk laj tza ut naxmaq' li aatin awb'il sa' xch'ooleb'.

¹⁶ Jo'kan ajwi', eb' li neke'xk'ul li iyaj sa' pek ru, a'aneb' li neke'rab'i li Aatin ut neke'xk'ul chi junpaat chi saheb' sa' xch'ool.

¹⁷ Ab'an maak'a' xxe' rik'ineb' ut ink'a' najt neke'xkuy. Ut naq nachalk junaq raaxiik' malaj rahob'tesiik sa' xk'ab'a' li Aatin, sa' junpaat neke'ch'inank xch'ool.

¹⁸ Wankeb' chik li neke'xk'ul li iyaj sa' k'ix ru: a'aneb' li xe'rab'i li Aatin,

¹⁹ ab'an li k'oxlak chirix li k'a'aq re ru wank sa' ruuchich'och', li nab'alaq'ink wi' li b'ihomal ut li ratawankil li k'a'aq chik re ru na'ok sa' xch'ooleb', naxnat' li Aatin ut ink'a' chik na'uuchink xb'aan.

²⁰ Ut eb' li neke'xk'ul li iyaj sa' chaab'il ch'och', a'aneb' li neke'ab'ink re li Aatin, neke'xk'ulub'an xch'ool ut neke'uuchink: wan naxk'e lajeeb' xka'k'aal, wan oxk'aal ut wan chik o'k'aal li junjunq chi iyaj”.

Li jaljookil ru aatin chirix li saqenk

²¹ Kixye ajwi' reheb': “Ma nak'ame'k tab'i' chaq junaq saqenk re xke'eebal rub'el li uk'al malaj ut rub'el li ch'aat? Ma ink'a' tab'i' re taak'eemanq sa' xna'aj?

²² Xb'aan naq maak'a' wank chi muqmu li ink'a' ta taanawmanq, ut maak'a' xk'ulmank chi muqmu li ink'a' ta taa'elq chi kutankil.

²³ Ani wank xxik re ab'ink, chi'ab'inq”.

Li jaljookil ru aatin chirix li b'isleb'

²⁴ Kixye ajwi' reheb': “K'ehomaq reetal li yookex chi rab'inkil. Rik'in li b'isleb' nekexb'isok wi', texb'ise'q ajwi' laa'ex, ut taak'eemanq chik xtz'aqob'.

²⁵ Xb'aan naq ani wank k'aru re, ruk' chik taak'eemanq re; ut ani maak'a' wank re, a' ajwi' li k'aru re taamaq'manq chiru”.

Li jaljookil ru aatin chirix li iyaj nak'iik xjunes rib'

²⁶ Kixye ajwi' reheb': “Jo'ka'in li xnimajwal awab'ejihom li Yos: kama' jun li winq kixhir li iyaj sa' ch'och'.

²⁷ Taawarq malaj taawakliiq, chi q'eq malaj chi kutan, li iyaj nayo'laak, nak'iik, chi moko a'an naxnaw chan ta wi' ru.

²⁸ Li ch'och' na'uuchink xjunes rib'; xb'enwa naq'unq'utk, chirix a'an natz'utujink, moqon na'uuchink chi naab'al.

²⁹ Ut naq ak xq'ano'k li ru, chi junpaat naq'olmank xb'aan naq xwulak xq'ehil li q'olok”.

Li jaljookil ru aatin chirix li riyajil mostaas

³⁰ Kixye ajwi': “K'aru tqajuntaq'eeta wi' li xnimajwal awab'ejihom li Yos, malaj k'a' chi jaljookil ru aatin taaqach'olob' wi'?

³¹ Chanchan jun t'orol li mostaas: naq na'awmank sa' ch'och', q'axal kach'in chiruheb' chixjunil li iyaj li wankeb' sa' ruuchich'och';

³² ab'an naq ak x'awmank, nak'iik, naxq'ax ru chixjunileb' li awimq ut ninq li ruq' naxk'e. Chi jo'kan eb' li xul li neke'rupupik chiru choxa neke'ruuk chi sukub'k sa' xmu”.

³³ Ut rik'in naab'al chik jaljookil ru aatin jo'eb' a'in, li Jesus naxye reheb' li Aatin, a' yaal b'arwan neke'ruuk xtawb'al ru;

³⁴ ut ink'a' naraatinaheb' chi maak'a' ta jaljookil ru aatin. Ab'an reheb' li xtzolom, naq wankeb' xjuneseb', naxch'olob' ru chixjunil.

Naq kich'anaak li kaqsut-iq'

³⁵ Sa' li kutan a'an, naq ki'ewuuk, kixye reheb': —Numenqo junpak'al li palaw.

³⁶ Ut naq ak xe'xchaq'rab'iheb' li tenamit, ke'xk'am li Jesus sa' li jukub' b'arwi' wank; wankeb' jalanatq chik jukub' ke'ochb'eenink re.

³⁷ Toja' naq kiwakliik jun nimla kaqsut-iq' ut li xkaw oq li palaw naxkut rib' sa' li jukub', ak yo chi nujak li jukub' xb'aan.

³⁸ Li Jesus wank chi ixb'ej, yo chi wark chi xb'een xsok xjolom. Ke'rajsi ut ke'xye re: —At Tzolonel! Ma maak'a' nakawaj wi' naq too'oso'q?

³⁹ Li Jesus ki'ajk ru, kixq'us li iq' ut kixye re li palaw: —Matchoqink! Ch'anaqat! Kich'anaak li iq' ut kichalk jun nimla tuqtuukilal.

⁴⁰ Chirix chik a'an kixye li Jesus reheb' li xtzolom: —K'a'ut naq k'ajo' leexiw? K'a'ut naq maak'a' eepaab'aal?

⁴¹ Ut jun nimla xiw ki'ok sa' xch'ooleb', neke'xye chirib'ileb' rib': —Ani put a'in naq a'atq li iq' ut li palaw neke'paab'ank chiru?