San Marcos 3 - Q'eqchi Bible

Li Jesus kixk'irtasi jun li winq chaqi li ruq'

¹ Li Jesus ki'ok wi' chik sa' li ch'utleb'aal kab'l. Wank aran jun li winq chaqi jun li ruq'.

² Ut yookeb' chi xk'eeb'al reetal ma tixk'irtasi tana sa' li sábado re naq te'ruuq xjitb'al.

³ Li Jesus kixye re li winq chaqi li ruq': —Xaqlin ut k'e aawib' arin sa' yiib'ej.

⁴ Ut kixpatz' reheb': —K'aru us xb'aanunkil sa' sábado, ma li usilal malaj li ink'a' us, xkolb'al xyu'am junaq malaj ut xkamsinkil? A'ut eb' a'an ch'anch'o ke'kanaak.

⁵ Toja' naq kirileb' sa' xsutam sa' josq'il, chi ra sa' xch'ool xb'aan xkawileb' xjolom, ut kixye re li winq: —Ye' laawuq'. A'an kixye' li ruq' ut kik'iraak.

⁶ Naq ke'elk aran eb' laj Pariseey, tikto ke'xch'utub' rib' rik'ineb' li neke'okenk chirix laj Herodes, chi k'uub'ank chirix li Jesus re xkamsinkil.

Naab'aleb' te'taaqenq re li Jesus

⁷ Li Jesus ki'elk aran ut koho wan wi' li palaw, rochb'eeneb' li xtzolom, ut jwal naab'aleb' aj Galilea ke'taaqenk re. Naab'aleb' ajwi' aj Judea,

⁸ aj Jerusalén, aj Idumea, eb' li wankatqeb' chaq junpak'al li nima' Jordán ut sa' xsutam Tiro ut Sidón, naq ke'rab'i li naxb'aanu li Jesus, ke'wulak rik'in.

⁹ Jo'kan naq kixye reheb' li xtzolom naq kawresinb'ilaq junaq ch'ina jukub' re naq ink'a' taanat'e'q xb'aaneb' li k'iila tenamit:

¹⁰ xb'aan naq naab'aleb' li kixk'irtasiheb', ut eb' li wankeb' xrahilal neke'xmululi rib' sa' xb'een chi xch'e'b'al.

¹¹ Ut eb' li tz'ajn aj musiq'ej, naq neke'ril ru, neke'xkutb'e rib' chi roq ut neke'xjap re: “Laa'at Ralalat li Yos”, chankeb'.

¹² Ab'an li Jesus naxq'useb' chi kaw re naq ink'a' te'xye chi kutankil.

Li Jesus kixsik'eb' ru li Kab'laju

¹³ Kitaqe'k chiru tzuul ut kixb'oqeb' li ani kiraj xb'oqb'aleb', ut ke'wulak rik'in.

¹⁴ Kixxaqab'eb' Kab'laju re naq te'wanq rik'in, jo'wi' re naq tixtaqlaheb' chi xpuktesinkil li Chaab'il Esilal,

¹⁵ chi wanq xwankileb' chi isink maa'us aj musiq'ej.

¹⁶ Ut kixxaqab'eb' li Kab'laju: laj Simón, aj Pedro chik kixk'e cho'q xk'ab'a';

¹⁷ laj Santiago, ralal laj Sebedeo, ut laj Jwan, riitz'in laj Santiago, li Boanerges chik kik'ehe'k cho'q xk'ab'a'eb' (chi jalb'il ru naraj naxye: ralaleb' li kaaq);

¹⁸ laj Andrés ut laj Felipe, laj Bartolomé, laj Mateo, laj Tomás, laj Santiago, ralal laj Alfeo, laj Tadeo, laj Simón aj Kanahán

¹⁹ ut laj Judas Iskariote, a' li kiq'axtesink re.

Li Jesus ut laj tza

²⁰ Koho li Jesus sa' kab'l ut k'ajo' xk'ihal li tenamit ke'ch'utlaak wi' chik: jo'kan naq chi moko wa'ak naxk'e rib' chiruheb'.

²¹ Naq eb' li rech'alal ke'rab'i resil, koheb' chi xk'amb'al, xb'aan naq neke'xye: “Ink'a' tuqtu li xna'leb'”.

²² Eb' laj tz'iib' li ke'kub'e chaq Jerusalén ke'xye: “Wank laj Beelsebul rik'in”. Jo'kan ajwi': “Rik'in xwankilal li xyuwa'ileb' laj tza narisiheb' laj tza”, chankeb' re.

²³ Toja' naq li Jesus kixb'oqeb' chaq ut kixye reheb' sa' jaljookil ru aatin: “Chanru naq laj tza taarisi laj tza?

²⁴ Wi junaq tenamit jachjooq chirib'il rib', ink'a' truuq taakanaaq chi xaqxo li tenamit a'an.

²⁵ Wi jachjooq chirib'il rib' jun kab'alaq, ink'a' truuq taakanaaq chi xaqxo li junkab'al a'an.

²⁶ Ut wi laj tza tixch'i'ch'i'i rib' ut jachjooq chirib'il rib', ink'a' truuq taakanaaq sa' xna'aj, xwulak b'an li roso'jik a'an.

²⁷ “Maajun truuq chi ok sa' rochoch li winq kaw rib' re xmaq'b'al li k'aru wank re, wi ink'a' ta xb'enwa tixb'ak' li kaw rib'; toja' naq tixjuk'i xsa' li rochoch.

²⁸ “Relik chi yaal ninye eere naq te'kuymanq te'sachmanq chixjunil li xmaakeb' li winq ut chixjunil li xmajewaleb', us ta k'iheb';

²⁹ ab'an li taamajewanq re li Santil Musiq'ej, maajoq'e taakuymanq taasachmanq xmaak, taariiqani b'an li xmaak chi junelik”.

³⁰ Kixye a'in xb'aan naq yookeb' chi xyeeb'al: “Wank tz'ajn aj musiq'ej rik'in”.

Li xna' ut eb' li riitz'in li Jesus

³¹ Ke'wulak aran li xna' ut eb' li riitz'in li Jesus; ke'kanaak chirix kab'l ut ke'xtaqla xb'oqb'al.

³² Ut eb' li tenamit chunchuukeb' chi xsutam, ke'xye re: —Ab'i, laana', eb' laawiitz'in ut eb' laawanab' wankeb' chirix kab'l, yookeb' chasik'b'al.

³³ Kichaq'ok li Jesus ut kixye: —Ani linna', aniheb' li wiitz'in?

³⁴ Ut naq kixsuti rilb'aleb' li chunchuukeb' chi xsutam, kixye: —A'aneb' a'in linna' ut eb' li wiitz'in.

³⁵ Xb'aan naq chixjunil li taab'aanunq re li rajom li Yos, a'an li wiitz'in, li wanab' ut linna'.