San Marcos 15 - Q'eqchi Bible

Li Jesus chiru laj Pilaat

¹ Naq kisaqewk, eb' li xb'eenil aj tij rochb'eeneb' li cheekel winq, jo'wi' eb' laj tz'iib' ut chixjunileb' li xninqaleb' ru aj raqol aatin, junpaat ke'xk'uub' xch'utameb'; ke'xk'am li Jesus chi b'ak'b'o ut ke'xq'axtesi sa' ruq' laj Pilaat.

² Ut laj Pilaat kixpatz' re: —Ma laa'at li xreyeb' laj Judiiy? Kixsume: —Yaal li xaye: laa'inin.

³ Eb' li xb'eenil aj tij naab'al li k'a'aq re ru yookeb' wi' chi xjitb'al.

⁴ Laj Pilaat kixpatz' wi' chik re: —Ma ink'a' tatchaq'oq b'ayaq? K'e reetal jo'nimal li yookeb' wi' chajitb'al!

⁵ A'ut li Jesus tik ink'a' kichaq'ok: k'ajo' naq kisachk xch'ool laj Pilaat xb'aan.

⁶ Rajlal chihab' sa' li Ninq'e narach'ab' reheb' li tenamit junaq li wank sa' tz'alam, a' yaal ani te'xpatz'.

⁷ Jun li winq, aj Barrabás xk'ab'a', wank sa' tz'alam rochb'eeneb' li ink'a' useb' xna'leb' li ke'kamsink sa' jun mululij ib'.

⁸ Toja' naq eb' li tenamit ke'taqe'k ut ke'ok chi xtz'aamankil li b'arwan naxk'e reheb' junelik.

⁹ Kichaq'ok laj Pilaat: —Ma teeraj tinwach'ab' eere li xreyeb' laj Judiiy? chan reheb'.

¹⁰ Xb'aan naq naxnaw naq xkaqaleb' xch'ool li xb'eenileb' aj tij naq ke'xq'axtesi.

¹¹ Ab'an eb' li xb'eenil aj tij ke'xtakchi'i li tenamit re xyeeb'al naq a' chik laj Barrabás chi'ach'ab'aaq.

¹² Ki'ok wi' chik laj Pilaat chi aatinak: —K'a' put ru tinb'aanu re li xreyeb' laj Judiiy nekeye? chan reheb'.

¹³ A'ut eb' a'an ke'xjap wi' chik re: —K'e chiru krus!

¹⁴ Kixye laj Pilaat reheb': —K'a' put ru li ink'a' us xb'aanu? Ut eb' a'an q'axal kaw chik ke'xjap re chi xyeeb'al: —K'e chiru krus!

¹⁵ Laj Pilaat kiraj xk'ojob'ankil xch'ooleb' li tenamit; jo'kan naq kirach'ab' laj Barrabás, kixrap chi tz'uum li Jesus ut kixq'axtesi sa' ruq'eb' re naq chik'ehe'q chiru krus.

Li Jesus kirahob'tesiik xb'aaneb' laj puub'

¹⁶ Eb' laj puub' ke'xk'am li Jesus sa' li xnimal kab'l, pretorio xk'ab'a', ut ke'xb'oq chixjunil li jun teep chi aj puub' li wankeb' aran.

¹⁷ Ke'xk'e kaqi t'ikr chirix, ke'xtz'ul jun koroon k'ix ut ke'xk'e sa' xjolom.

¹⁸ Ut ke'ok chi xk'eeb'al xsahil xch'ool: —Sahaq taxaq sa' aach'ool, at xreyeb' laj Judiiy!

¹⁹ Yookeb' chi xsak'b'al chi che' sa' xjolom, yookeb' ajwi' chi xchuub'ankil ut chi xloq'oninkil ru chi wiq'wookeb'.

²⁰ Naq ke'raqe'k chi reetz'unkil, ke'risi li kaqi t'ikr chirix ut ke'xk'e wi' chik li raq'. Toja' naq ke'xk'am re xk'eeb'al chiru krus.

Rokik li Jesus chiru krus

²¹ Ut ke'xmin ru chi xk'amb'al li xkrus li Jesus jun li winq aj Sirene yo chi nume'k, aj Simón xk'ab'a'. A'an li xyuwa' laj Alejandro ut laj Rufo, ut yo chi chalk chaq sa' xk'aleb'aal.

²² Ke'xk'am li Jesus sa' li na'ajej Gólgota xk'ab'a', chi jalb'il ru naraj naxye: “Xna'aj xb'aqel xjolom kamenaq”.

²³ Ut ke'xk'e xb'iin yuub'il rik'in miir, ab'an li Jesus ink'a' kiruk'.

²⁴ Ke'xk'e chiru krus, ke'xb'uuli rix li raq' re rilb'al k'aru tixk'am li junjunq, ut ke'xjek'i chirib'ileb' rib'.

²⁵ Ak b'eleeb' honal naq ke'xk'e chiru krus.

²⁶ Tz'iib'anb'il aran li xyaalalil k'a'ut naq kiteneb'aak kamk sa' xb'een: “A'an a'in li xReyeb' laj Judiiy”.

²⁷ Wiib'eb' aj elq' ke'k'ehe'k chiru krus rochb'een, jun sa' xnim uq' ut jun sa' xtz'e uq'.

²⁹ Eb' li neke'nume'k aran neke'xmajewa, neke'reek'asi li xjolomeb' ut neke'xye: —Laa'at li xajuk' raj li rochoch li Yos ut yal chiru oxib' kutan xayiib' raj wi' chik,

³⁰ kol aawib' ut kub'en chaq chiru li krus!

³¹ Jo'kan ajwi' li xb'eenileb' aj tij neke'reetz'u chirib'ileb' rib' rochb'eeneb' laj tz'iib': —Jalanatq chik kixkoleb', ut a'an ink'a' naruhank chi xkolb'al rib'!

³² Li Kriist, li xreyeb' laj Israel, chikub'eeq chaq anaqwan chiru li krus re naq taaqil ut taaqapaab'! Nahob'e'k ajwi' xb'aaneb' li wankeb' chiru krus rochb'een.

Xkamik li Jesus

³³ Sa' wa'leb', ki'aak'ab'o'k sa' xb'een chixjunil li ruuchich'och' toj sa' oxib' honal.

³⁴ Ut sa' li oxib' honal li Jesus kixjap re chi kaw ut kixye: “Eloí Eloí, lemá sabaktani?”. Chi jalb'il ru naraj naxye: “At inYos, at inYos, k'a'ut naq xinaakanab' injunes?”.

³⁵ Sa' xyanqeb' li wankeb' aran, wan ke'ab'ink re a'in ut ke'xye: —K'ehomaq reetal, yo chi xb'oqb'al laj Elías!

³⁶ Ak taaxik jun sa' aanil, koxtz'a chaq jun xmach palaw sa' vinaagr, kixk'e sa' ru'uj jun li che' ut kixyeechi'i chi ruk', yo chi xyeeb'al: —Kanab'omaq wan, qilaq ma taak'ulunq tana laj Elías chi xkub'sinkil.

³⁷ A'ut li Jesus kixjap re chi kaw ut ki'elk xch'ool.

³⁸ Ut li xt'ikrul li rochoch li Yos kiq'iche'k sa' xyi chalen taqe'q toj taq'a.

³⁹ Naq li xjolomileb' laj puub' li wank aran chiru li Jesus kiril naq ki'elk xch'ool, kixye: —Relik chi yaal naq li winq a'in Ralal li Yos!

⁴⁰ Wankeb' ajwi' ixq yookeb' chaq chi ilok chi najt. Sa' xyanqeb' a'an wank lix María aj Magdala, lix María xna' laj Santiago li kach'in ut xna' ajwi' laj José, jo' ajwi' lix Salomé,

⁴¹ eb' li ke'taaqenk re li Jesus ut ke'k'anjelak chiru naq kiwank chaq Galilea; wankeb' naab'aleb' chik li ke'taqe'k rochb'een toj Jerusalén.

Kimuqe'k li Jesus

⁴² Sa' li kutan a'an yo li Kawunk xb'aan naq wulajaq li sábado.

⁴³ Jo'kan naq kichalk ewu laj José aj Arimatea, xnimal ru winq sa' xyanqeb' laj k'amol b'e. A'an ajwi' yo chi royb'eninkil li xnimajwal awab'ejihom li Yos. Ut kikawuuk xch'ool chi ok wan wi' laj Pilaat ut koxpatz' chaq li xtz'ejwal li Jesus.

⁴⁴ Laj Pilaat kisachk xch'ool chi rab'inkil naq ak xkamk; kixb'oq li xjolomileb' laj puub' ut kixpatz' re ma ak kamenaq chik.

⁴⁵ Naq kiyehe'k xyaalal re xb'aan li xjolomileb' laj puub', kixk'e li xtz'ejwal li Jesus re laj José.

⁴⁶ Ut a'an kixloq' jun li t'ikr, kixkub'si chaq chiru krus, kixb'at sa' li t'ikr ut koxk'e sa' jun muqleb'aal hopb'il sa' pek; ut kixtolk'osi jun li pek chire li muqleb'aal.

⁴⁷ Lix María aj Magdala ut lix María xna' laj José yookeb' chi xk'eeb'al reetal b'ar xkanaak.