San Marcos 14 - Q'eqchi Bible

V. XRAHILAL, XKAMIK UT XWAKLIJIK CHI YO'YO LI JESUS (14,1—16,20) Ke'xk'uub' xchapb'al li Jesus

¹ Ka'b'ejaq li Paswa nawa'e'k wi' li wa ink'a' yuub'il, eb' li xb'eenil aj tij ut eb' laj tz'iib' yookeb' chi xsik'b'al chan raj ru naq te'xchap li Jesus chi b'alaq'inb'il ut te'xkamsi raj.

² Xb'aan naq neke'xye: —Ink'a' us a'an sa' li ninq'e; mare anchal taawanq mululij ib' sa' li tenamit.

Li Jesus kiyule'k Betania rik'in sununkil b'an

³ Wan chaq Betania li Jesus, sa' rochoch laj Simón li saqlep rix, yo chi hilank sa' meex. Toja' naq kichalk jun li ixq: kixk'am chaq jun saqi meet chi sununkil b'an, tz'aqal naard wank chisa' ut q'axal terto xtz'aq; kixjor li meet ut kixhoy li b'an sa' xjolom li Jesus.

⁴ Wan xik' ke'reek'a ut ke'ok chi xyeeb'al chirib'ileb' rib': —K'a' aj e naq xsachmank li sununkil b'an a'in?

⁵ Xru raj xk'ayimank li sununkil b'an a'in chi numenaq o'lajuk'aal tumin plaat ut xk'eemank raj reheb' li neb'a'. Ut ke'xkawil'aatina li ixq.

⁶ A'ut li Jesus kixye reheb': —Kanab'omaq. K'a'ut naq nekech'i'ch'i'i? Chaab'il k'anjel xb'aanu we.

⁷ Xb'aan naq eb' li neb'a' junelik wanqeb' eerik'in ut, naq teeraj, texruhanq chi rusilankileb'; a'ut laa'in moko junelik ta wanqin eerik'in.

⁸ Xb'aanu jo'ch'inal jo'nimal xru xb'aanunkil: xyul chi junxilaj linjunxaqalil re linmuqb'al.

⁹ Relik chi yal ninye eere: yalaq ta b'ar sa' ruuchich'och' taapuktesimanq wi' li Chaab'il Esilal, taayeemanq ajwi' resil li xb'aanu li ixq a'in re xpatz'b'alaq.

Laj Judas kixyeechi'i xq'axtesinkil li Jesus

¹⁰ Toja' naq laj Judas Iskariote, jun reheb' li Kab'laju, koho rik'ineb' li xb'eenil aj tij re xq'axtesinkil li Jesus reheb'.

¹¹ Naq ke'rab'i a'in, ke'saho'k sa' xch'ool ut ke'xyeechi'i xtumin. Ut a'an yo chi xsik'b'al chan raj ru naq tixq'axtesi sa' ruq'eb', tz'aqal sa' xq'ehil.

Li xloq'laj Wa li Qaawa'

¹² Sa' li xb'een kutan nawa'e'k wi' li wa ink'a' yuub'il, naq namayejamank li karneer re li Paswa, eb' li xtzolom li Jesus ke'xye re: —B'ar taawaj tooxik chi kawunk re naq toxaatzeka li Paswa?

¹³ Toja' naq kixtaqla wiib' li xtzolom: —Ayuqex sa' li tenamit, chan reheb'. Teek'ul jun li winq paqpooq chaq jun kuk chi ha' xb'aan; chetaaqehaq

¹⁴ ut, b'arwi' tox'okaq, cheyehaq re laj eechal kab'l: «B'ar wank linna'aj tintzeka wi' li Paswa wochb'eeneb' lintzolom? chan chaq laj Tzolonel», cha'qex re.

¹⁵ Ut a'an tixk'ut cheru, sa' xkab' xk'ojaril li kab'l, jun nimla na'ajej, ak wank chixjunil xhilob'aal ut ak kawresinb'il: aran texkawunq cho'q qe.

¹⁶ Koheb' li xtzolom ut, naq ke'wulak sa' li tenamit, koxe'xtaw jo' chanru kiyehe'k reheb' xb'aan li Jesus, ut ke'xkawresi li Paswa.

¹⁷ Naq ki'ewuuk, kiwulak li Jesus aran rochb'eeneb' li Kab'laju.

¹⁸ Ut naq hilhookeb' sa' meex chi wa'ak, kixye reheb': —Relik chi yaal ninye eere naq jun eere taaq'axtesinq we, a' li nawa'ak wik'in.

¹⁹ Eb' a'an ke'ok chi raho'k sa' xch'ool ut chi xyeeb'al re li Jesus chi xjunjunqaleb': —Malaj laa'inin, at Qaawa'?

²⁰ Kixye reheb': —Jun eere laa'ex li Kab'laju, a' li naxtz'a li xwa wochb'een sa' linpulaat.

²¹ Li K'ajolb'ej taaxik jo' tz'iib'anb'il chirix, ab'an ra chaalel sa' xb'een li winq li taaq'axtesinq re li K'ajolb'ej! Q'axal us raj cho'q re li winq a'an naq ink'a' xyo'laak chaq.

²² Ut naq yookeb' chi wa'ak, kixchap li wa, kiyoxink sa' xb'een, kixjachi, kixk'e reheb' ut kixye: —K'ulumaq, a'an a'in lintz'ejwal.

²³ Chirix chik a'an kixchap jun li uk'leb'-sek', kiyoxink, kixk'e reheb', ut chixjunileb' ke'uk'ak.

²⁴ Ut kixye reheb': —A'an a'in linkik'el re li Sumwank, hoyb'il sa' xk'ab'a' chixjunileb'.

²⁵ Relik chi yaal ninye eere naq ink'a' chik twuk' li xya'al li uub' toj sa' chik li kutan a'an naq a' chik li ak' b'iin twuk' sa' li xnimajwal awab'ejihom li Yos.

Li Jesus kixye resil chi junxilaj li xmaak laj Pedro

²⁶ Naq ak ke'xb'icha eb' li loq'laj b'ich, koheb' sa' xb'een li tzuul Olivos.

²⁷ Ut li Jesus kixye reheb': —Chejunilex taaluktaaq eech'ool xb'aan naq tz'iib'anb'il: «Tintiq' laj k'aak'alenel karneer, ut eb' li karneer te'xcha'cha'i rib'eb'».

²⁸ Ab'an, naq akaq xinwakliik chi yo'yo, k'amolb'ehaqin cheru toj Galilea.

²⁹ Toja' naq laj Pedro kixye re: —Us ta chixjunileb' te'luktaaq xch'ool, ab'an laa'in ink'a'.

³⁰ Li Jesus kixye re: —Relik chi yaal ninye aawe naq hoon ajwi', chiru li q'oqyink a'in, toj maji'aq nayaab'ak ka'sutaq li tzo' kaxlan, akaq xaye ox sut naq ink'a' nakanaw wu.

³¹ A'ut laj Pedro kixye wi' chik chi kaw: —Us ta tento tinkamq wochb'eenat, ab'an maajaruj tinmuq naq ninnaw aawu. Jo'kan ajwi' ke'xye chixjunileb'.

Li Jesus kitijok Getsemaní

³² Ke'wulak sa' jun li na'ajej Getsemaní xk'ab'a', ut li Jesus kixye reheb' li xtzolom: —K'ojlanqex arin, tijoqin wan chaq le'.

³³ Kixk'am chirix laj Pedro, laj Santiago ut laj Jwan, ut kixtikib' xiwak ut yot'e'k xch'ool:

³⁴ Kixye reheb': —K'ajo' xrahil li waanm, ka'aj chik maa ninkamk! Kanaaqex arin ut yo'lenqex.

³⁵ Kijilok kach'in chik ut kit'ane'k chiru ch'och', yo chi xtz'aamankil naq, wi truuq, chinume'q li honal a'an chi xb'een.

³⁶ Ut kixye: “Abbá, at inYuwa', maak'a' ch'a'aj chawu laa'at: chawisi wik'in li sek' a'in. Ab'an moko jo' ta li nawaj laa'in, jo'aq b'an li nakawaj laa'at”.

³⁷ Naq kisutq'iik chaq, kixtaweb' chi wark; ut kixye re laj Pedro: —At Simón, ma yookat chi wark? Ma ink'a' xatruuk chi yo'lek jun k'amokaq?

³⁸ Yo'lenqex ut tijonqex re naq mext'ane'k sa' li aaleek: li musiq'ej yo'oon wank, a'ut li tz'ejwalej lub'lub' wank.

³⁹ Koho wi' chik ut kitijok rik'ineb' a ajwi' li aatin ak xye chaq.

⁴⁰ Ut naq kisutq'iik chaq, kixtaweb' wi' chik chi wark, xb'aan naq k'ajo'eb' li xwara sa' ruheb', ut ink'a' neke'xnaw k'aru te'xsume wi'.

⁴¹ Kichalk wi' chik rox sut ut kixye reheb': —Warinqex ut hilanqex wan. Ak xtz'aqlok ru, xwulak xhonal: anaqwan li K'ajolb'ej taaq'axtesiiq sa' ruq'eb' laj maak.

⁴² Waklinqex! Yo'qeb'! We' chaq li taaq'axtesinq we.

Kichape'k li Jesus

⁴³ Toj yo ajwi' chi aatinak li Jesus, naq kiwulak laj Judas, jun reheb' li Kab'laju. Naab'aleb' li rochb'een, wankatqeb' xch'iich' ut xche', taqlanb'ileb' chaq xb'aaneb' li xb'eenil aj tij, xb'aaneb' laj tz'iib' ut eb' li cheekel winq.

⁴⁴ Li taaq'axtesinq re kixk'e li eetalil a'in reheb': “A' li tintz'ub' ru, a'an a'an. Chapomaq ut teek'am sa' yaal”.

⁴⁵ Ka'ajwi' kiwulak, kinach'ok rik'in li Jesus ut kixye re: —At Tzolonel! Ut kixtz'ub' ru.

⁴⁶ Toja' naq eb' a'an ke'xtaqsi li ruq'eb' sa' xb'een ut ke'xchap.

⁴⁷ Jun reheb' li wankeb' aran, kirisi li xch'iich', kixtiq' li xmoos li xyuwa'il aj tij ut kixch'ot li xxik.

⁴⁸ Ki'aatinak li Jesus ut kixye reheb': —Ma jo' nachape'k junaq aj elq' naq xexchalk chinchapb'al rik'in ch'iich' ut che'?

⁴⁹ Rajlal kutan xinwank chaq sa' eeyanq cheetzolb'al sa' rochoch li Yos, ut ink'a' xineechap. Ab'an tento naq taatz'aqloq ru li Santil Hu.

⁵⁰ Toja' naq ke'elelik chixjunileb' ut ke'xkanab' xjunes.

⁵¹ Jun li saaj al yo chi taaqenk re, yal lanlo sa' jun xt'ikr; ut kichape'k.

⁵² Ab'an kixkanab' li xt'ikr ut ki'elelik chiruheb' chi t'ust'u.

Li Jesus chiru li xyuwa'il aj tij

⁵³ Ke'xk'am li Jesus rik'in li xyuwa'il aj tij. Ut chixjunileb' li xb'eenil aj tij, jo'wi' eb' li cheekel winq ut eb' laj tz'iib' ke'xch'utub' rib'.

⁵⁴ Laj Pedro najt rik'in naq yo chi xtaaqenkil, toj kiwulak chi xneb'aal li rochoch li xyuwa'il aj tij; aran, k'ojk'o sa' xyanqeb' li moosej, yo chi q'ixink chire li xam.

⁵⁵ Li xb'eenileb' aj tij ut chixjunil li xninqaleb' ru aj raqol aatin yookeb' chi xsik'b'al junaq aatin chirix li Jesus re xk'eeb'al chi kamsiik, ab'an ink'a' neke'xtaw,

⁵⁶ xb'aan naq naab'aleb' neke'xye yoob'anb'il aatin chirix, a'ut li neke'xye ink'a' naxk'ul rib'.

⁵⁷ Wan ke'xaqliik ut ke'xye yoob'anb'il aatin chirix:

⁵⁸ —Laa'o xqab'i naq kixye: «Laa'in tinjuk' li rochoch li Yos a'in yiib'anb'il chi uq'mej, ut chiru oxib' kutan tinyiib' jun chik moko yiib'anb'il ta rik'in uq'ej».

⁵⁹ Ab'an chi moko li neke'xye eb' a'an naxk'ul rib'.

⁶⁰ Toja' naq kixaqliik li xyuwa'il aj tij, kixk'e rib' sa' xyiheb' ut kixpatz' re li Jesus: —Ma ink'a' tatchaq'oq b'ayaq? K'aru neke'xye eb' a'in chawix?

⁶¹ A'ut a'an ink'a' ki'aatinak ut maak'a' kixsume wi'. Li xyuwa'il aj tij kixpatz' wi' chik re: —Ma laa'at li Kriist, li Ralal li oxloq'inb'il Yos?

⁶² Kixye li Jesus: —Hehe', laa'inin, ut teeril li K'ajolb'ej k'ojk'ooq sa' xnim uq' li Nimajwal Yos, yooq chaq chi chalk sa' xb'eeneb' li choql sa' choxa.

⁶³ Toja' naq li xyuwa'il aj tij kixq'ich li raq' ut kixye: —K'a' chik te'ok wi' qe li testiiw?

⁶⁴ Xerab'i, xmajewa li Yos. K'aru teeye? Chixjunileb' ke'xye naq wank xmaak re kamsiik.

⁶⁵ Wan ke'ok chi xchuub'ankil, ke'xtz'ap li xnaq' ru, ke'xpik'a chi ruq'eb': —Q'ehi: ani xsak'ok aawe, chankeb' re. Jo'kan ajwi' eb' laj k'anjel ke'xpaq'ihatq chi ruq'eb' naq ke'xk'ul.

Laj Pedro kitik'ti'ik

⁶⁶ Naq laj Pedro wank taq'a chi neb'aal, kiwulak jun li ixq, xmoos li xyuwa'il aj tij.

⁶⁷ Naq kiril laj Pedro yo chi q'ixink, kixka'ya ut kixye: —Laa'at ajwi' xat-ochb'eenink chaq re li Jesus aj Nazaret.

⁶⁸ A'ut a'an kitik'ti'ik: —Ink'a' ninnaw chi moko nintaw ru li nakaye. Ut ki'elk chirix kab'l sa' li nimla okeb'aal, ut jun li tzo' kaxlan kiyaab'ak.

⁶⁹ Li moos ixq, naq kiril ru, ki'ok wi' chik chi xyeeb'al reheb' li wankeb' aran: —Li winq a'in jun reheb' a'an.

⁷⁰ A'ut a'an kitik'ti'ik wi' chik. Junpaataq chik a'an, eb' li wankeb' aran ke'xye wi' chik re laj Pedro: —Relik chi yaal naq laa'at jun reheb' a'an, xb'aan naq laa'at aj Galilea.

⁷¹ A'ut a'an ki'ok chi majewank ut chi xyeeb'al rik'in jurament: —Ink'a' ninnaw ru li winq a'an li nekeye laa'ex!

⁷² Tikto kiyaab'ak xka' sut li tzo' kaxlan. Ut laj Pedro kinaqk sa' xch'ool li kiyehe'k re xb'aan li Jesus: “Toj maji'aq nayaab'ak ka' sutaq li tzo' kaxlan, akaq ox sut xaye naq ink'a' nakanaw wu”. Ut k'ajo' naq kiyot'e'k chi yaab'ak.