San Lucas 9 - Q'eqchi Bible

Xtaqlankileb' li Kab'laju

¹ Naq kixch'utub'eb' li Kab'laju, li Jesus kixk'eheb' xkawilal ut xwankileb' sa' xb'een chixjunileb' li maa'us aj musiq'ej, jo'wi' re k'irtasink yajel.

² Ut kixtaqlaheb' chi xpuktesinkil resil li xnimajwal awab'ejihom li Yos ut chi k'irtasink.

³ Kixye reheb': —Maak'a' teek'am re leeb'e: chi moko eexuq', chi moko eechampa, chi moko eewa, chi moko plaat, chi moko ka'kab'aq leeraq'.

⁴ Chexhilanq sa' li kab'l taak'eemanq wi' eerochochnaal, toj reetal tex'elq aran.

⁵ Ut wi junaq ink'a' taak'uluq eere, naq tex'elq sa' li tenamit a'an, chechiq'aq li pojtz' wank cheroq re xch'olob'ankil li xmaakeb'.

⁶ Koheb' ut eb' a'an ut ke'xb'eeni eb' li tenamit, yookeb' chi xpuktesinkil li Chaab'il Esilal ut chi k'irtasink yalaq b'ar.

Laj Herodes ut li Jesus

⁷ Li rey Herodes naq kirab'i resil chixjunil li yo chi k'ulmank, ink'a' nak'ojlaak xch'ool, xb'aan naq wank neke'yehok: “Laj Jwan xwakliik chi yo'yo sa' xyanqeb' li kamenaq”.

⁸ Wankeb' chik neke'yehok: “Xk'ut rib' laj Elías”. Wankeb' wi' chik neke'yehok: “Jun reheb' li najteril propeet xwakliik wi' chik chi yo'yo”.

⁹ Ab'an laj Herodes kixye: —Laa'in kinch'ot xkux laj Jwan. Ani put a'an li yookin chi rab'inkil resil? Ut naraj raj rilb'al ru.

Naq ke'wa'ak li oob' mil

¹⁰ Naq ke'sutq'iik chaq eb' li apóstol, ke'xseeraq'i re li Jesus jo'ch'inal jo'nimal ke'xb'aanu chaq. Ut a'an kixk'ameb' xjuneseb' ut koho sa' jun tenamit, Betsaida xk'ab'a'.

¹¹ Ab'anan, naq ke'xnaw a'an eb' li poyanam, ke'xtaaqe. Li Jesus kixk'uleb' ut ki'ok chi raatinankileb' chirix li xnimajwal awab'ejihom li Yos, jo' ajwi' chi xk'irtasinkileb' li te'raj ru k'iraak.

¹² Ak yo chi ewuuk naq eb' li Kab'laju ke'jilok chi xk'atq li Jesus ut ke'xye re: —Chaq'rab'iheb' li tenamit re naq te'xik sa'eb' li tenamit ut k'aleb'aal wankeb' chi nach' ut xsik'aqeb' chaq rochochnaal ut xtzekemqeb', xb'aan naq wanko sa' junesal na'ajej.

¹³ Ab'an li Jesus kixye reheb': —K'ehomaqeb' laa'ex chi wa'ak. Ke'chaq'ok eb' a'an: —Maak'a' wank qe, ka'ajwi' oob' chi wa ut wiib' chi kar. Malaj ut tooxik laa'o chi xloq'b'al xtzekemqeb' li k'iila tenamit a'in? chankeb'.

¹⁴ Xb'aan naq wankeb' tana oob'aq mil chi winq. Li Jesus kixye reheb' li xtzolom: —K'ehomaqeb' chi hilank chi ch'uutil sa' lajeeb' roxtaqk'aal.

¹⁵ Ke'xb'aanu chi jo'kan ut ke'xk'eheb' chi hilank chixjunileb'.

¹⁶ Toja' naq kixchap li oob' chi wa ut li wiib' chi kar, kixtaqsi li rilob'aal sa' choxa, kiyoxink ut kixjachi, yo chi xk'eeb'al reheb' li xtzolom re naq te'xjek'i reheb' li tenamit.

¹⁷ Ke'tzekank chixjunileb' toj reetal ke'k'ojlaak xch'ool. Ut kixokmank li rela' li wa: kab'laju chakach chi wa.

Li xpaab'aal laj Pedro

¹⁸ Naq yo chi tijok li Jesus xjunes rochb'eeneb' li xtzolom, kixpatz' reheb': —Anihin laa'in naq neke'xye li tenamit?

¹⁹ Ke'chaq'ok eb' a'an ut ke'xye: —Wan neke'yehok naq laa'at laj Jwan aj kub'sihomha'. Wankeb' chik neke'yehok naq laa'at laj Elías, ut wankeb' wi' chik neke'yehok naq laa'at jun reheb' li najteril propeet xwakliik wi' chik chi yo'yo.

²⁰ Ut a'an kixye reheb': —Ut laa'ex, anihin laa'in naq nekeye? Kichaq'ok laj Pedro: —Laa'at li xKriist li Yos, chan.

²¹ Ut li Jesus kixchaq'rab'iheb' chi kaw naq maa'ani aj e che'xye a'in.

Xb'een resil li xkamik li Jesus

²² Kixye reheb': —Li K'ajolb'ej tento tixk'ul naab'al li rahilal, tento taatz'eqtaanaaq xb'aaneb' li cheekel winq, li xb'eenileb' aj tij ut eb' laj tz'iib'; taakamsiiq ut taawakliiq chi yo'yo sa' rox li kutan.

Xtaaqenkil li Qaawa' Jesus

²³ Chirix chik a'an kixye reheb' chixjunil: —Wi ani naraj intaaqenkil, mixra rib', chixchapaq li xkrus rajlal kutan ut chinxtaaqehaq.

²⁴ Xb'aan naq ani naraj xkolb'al li xyu'am, taasachq chiru; a'ut li taasachq li xyu'am chiru sa' ink'ab'a', a'an tixkol li xyu'am.

²⁵ K'a' put ru tixra junaq winq naq taareechani chixjunil li ruuchich'och', wi taa'oso'q li xyu'am malaj taasachq chiru?

²⁶ Xb'aan naq ani taaxutaanaq sa' ink'ab'a' ut xb'aaneb' li waatin, taaxutaanaq ajwi' li K'ajolb'ej xb'aan a'an, naq tol'elq sa' li xnimal xloq'al jo'wi' sa' xnimal xloq'al li xYuwa' ut eb' li xsantil ánjel.

²⁷ Relik chi yaal ninye eere: wankeb' sa' eeyanq li ink'a' te'kamq toj reetal te'ril li xnimajwal awab'ejihom li Yos.

Kilemtz'uno'k xjunxaqalil li Jesus

²⁸ Waqxaqib' kutan chik xyeeb'aleb' li aatin a'in, li Jesus kixk'ameb' chirix laj Pedro, laj Jwan ut laj Santiago, ut kitaqe'k sa' xb'een li tzuul chi tijok.

²⁹ Ut naq yo chi tijok, kijalano'k li rilob'aal ut li raq' kisaqo'k ut kilemtz'unk.

³⁰ Xaqaamileb' wiib' li winq yookeb' chi aatinak rik'in, a'aneb' laj Moisés ut laj Elías.

³¹ Eb' a'in ke'xk'ut rib' rik'in xnimal xloq'aleb' ut yookeb' chi aatinak chirix li relik li tento taatz'aqloq ru Jerusalén.

³² Laj Pedro ut eb' li rochb'een numtajenaqeb' xwara, ab'anan ke'ajk ru ut ke'ril li xnimal xloq'al li Jesus jo' ajwi' li wiib' chi winq li wankeb' rochb'een.

³³ Ut naq yookeb' chi elk eb' a'in, kixye laj Pedro re li Jesus: —At Tzolonel, us toowanq arin. Qayiib'aq oxib' chi muheb'aal: jun cho'q aawe, jun cho'q re laj Moisés, jun chik cho'q re laj Elías. Ab'an laj Pedro ink'a' naxnaw li k'aru yo chi xyeeb'al.

³⁴ Toj yo ajwi' chi aatinak chi jo'kan, naq kichalk jun li choql li kimuheelank reheb'; ut naq ke'ok sa' li choql, k'ajo' naq ke'xiwak.

³⁵ Toja' naq kichalk jun xyaab' kuxej sa' li choql, kixye: “A'in li walal sik'b'il ru inb'aan. A'an cherab'ihaq”.

³⁶ Naq yo chi ab'iik li xyaab' kuxej, ka'aj chik li Jesus wank aran. Ut maak'a' ke'xye; sa'eb' li kutan a'an maa'ani aj e ke'xseeraq'i b'ayaq li k'aru ke'ril chaq.

Li xk'irajik li ch'ina'al aaq xyajel

³⁷ Sa' li kutan jun chik, naq ke'kub'e chaq chiru li tzuul, naab'aleb' li tenamit ke'wulak chi xk'ulb'al.

³⁸ Jun li winq wank sa' xyanqeb' li tenamit; ut ki'ok chi xjapb'al re ut chi xyeeb'al: —At Tzolonel, nintz'aama chawu naq taawil chaq li walal xb'aan naq junaatal chiwu.

³⁹ Nachape'k xb'aan jun musiq'ej ut chi junpaat naxjap re, naxchiq'le rib' ut nawoqxo'k sa' re. Ut naq ak tawasinb'il chi us, elajik nakanab'aak xb'aan.

⁴⁰ Xintz'aama chiruheb' laatzolom naq te'risi, ab'an ink'a' xe'ruuk.

⁴¹ Kichaq'ok li Jesus ut kixye: —Ex tenamit tik maak'a' eepaab'aal ut sachenaqex sa' li maak, jo' najtil chik tinwanq eerik'in? Jo' najtil chik texinkuy? K'am chaq laawalal arin.

⁴² Ut naq yo chi nach'ok li al, kit'ane'k ut kichiq'leek xb'aan laj tza. Li Jesus kixq'us chi kaw li tz'ajn aj musiq'ej, kixk'irtasi li ch'ina'al ut kixq'axtesi re li xyuwa'.

⁴³ Ut chixjunileb' ke'sachk xch'ool xb'aan li xnimal xwankilal li Yos. Sachsookeb' xch'ool chixjunileb' xb'aan li jo'nimal nalajxb'aanu li Jesus; jo'kan naq kixye reheb' li xtzolom:

Xkab' resil li xkamik li Jesus

⁴⁴ —Chek'ehaq sa' leech'ool laa'ex eb' li aatin a'in: li K'ajolb'ej taaq'axtesiiq sa' ruq'eb' li winq.

⁴⁵ A' ut eb' a'an ink'a' neke'xtaw ru li aatin a'in: tz'aptz'o ru chiruheb', jo'kan naq ink'a' neke'xtaw xyaalal; ut neke'xiwak chi patz'ok re chirix li aatin a'in.

Ani li q'axal nim xwankil

⁴⁶ Eb' li xtzolom ke'ok chi xwech'inkileb' rib' chirix ani reheb' li q'axal nim xwankil.

⁴⁷ Ab'an naxnaw li Jesus k'aru yookeb' chi xk'oxlankil sa' xch'ooleb'; jo'kan naq kixchap jun li ch'ina'al, kixk'e chi xk'atq

⁴⁸ ut kixye reheb': —Ani taak'uluq re li ch'ina'al a'in sa' ink'ab'a', laa'in tinxk'ul; ut li ani taak'uluq we, tixk'ul li kitaqlank chaq we, xb'aan naq li jwal kach'in sa' eeyanq chejunilex, a'an li nim.

Roksinkil xk'ab'a' li Jesus

⁴⁹ Kixtikib' aatinak laj Jwan, ut kixye: —At Tzolonel, xqil jun li winq yo chi isink maa'us aj musiq'ej sa' aak'ab'a'. Xqayal xramb'al chiru xb'aan naq ink'a' nachalk chiqix.

⁵⁰ Ut li Jesus kixye re: —Meeram chiru xb'aan naq ani ink'a' xik' nekexril, na'okenk cherix.

IV. LI XTAQIK LI JESUS JERUSALÉN (9,51—19,27) Li Jesus ink'a' kik'ule'k chi us xb'aaneb' laj Samaria

⁵¹ Naq yo chi tz'aqlok xq'ehil li xtaqik, li Jesus kixkawila xch'ool chi xik Jerusalén

⁵² ut kixtaqlaheb' xtaql chi uub'ej. Eb' a'an koheb', koxe'okaq sa' jun xk'aleb'aaleb' laj Samaria re xkawresinkil xna'aj.

⁵³ Ab'anan ink'a' kik'ule'k aran xb'aan naq yo chi xik Jerusalén.

⁵⁴ Naq ke'ril a'in eb' li xtzolom, laj Santiago ut laj Jwan, ke'xye: —Qaawa', ma taawaj tqaye naq chikub'eeq chaq xam sa' choxa re naq te'sache'q?

⁵⁵ Ab'an li Jesus kixsutq'isi rib' ut kixq'useb' chi kaw.

⁵⁶ Chirix chik a'an koheb' sa' jalan chik k'aleb'aal.

K'aru na'ajmank ru re xtaaqenkil li Jesus

⁵⁷ Naq yookeb' chi xik, jun kiyehok re: —Tatintaaqe yalaq ta b'ar tatxik.

⁵⁸ Li Jesus kixye re: —Eb' li yak wankeb' xjob' sa' pek ut eb' li xul li neke'rupupik chiru choxa wankeb' xsuk, ab'an li K'ajolb'ej maak'a' wank re b'arwi' tixsotob' li xjolom.

⁵⁹ Chirix chik a'an kixye li Jesus re jun chik: —Taaqehin. Kichaq'ok a'an: —Kanab'in wan chi xik chi xmuqb'al linyuwa', chan.

⁶⁰ Ut li Jesus kixye re: —Kanab'eb' li kamenaq chi xmuqb'aleb' li xkamenaq. A'ut laa'at ayu chi xyeeb'al resil li xnimajwal awab'ejihom li Yos.

⁶¹ Jun chik kiyehok: —Tatintaaqe, at Qaawa'; ab'anan kanab'in wan chi xchaq'rab'inkileb' li wankeb' sa' li wochoch.

⁶² Li Jesus kixye re: —Maajun li ak xchap li xk'anjelob'aal ut toj taa'iloq wi' chik chirix, usaq cho'q re li xnimajwal awab'ejihom li Yos.