San Lucas 3 - Q'eqchi Bible

II. LI JESUS KIXKAWRESI RIB' CHI K'ANJELAK (3,1—4,13) Li kixye laj Jwan aj kub'sihomha'

¹ Ak o'laju chihab' rokik chi awab'ejil laj Tiberio César ut laj Poncio Pilato wan chaq cho'q ruuchil li awab'ej aran Judea. Laj Herodes nataqlank sa' xb'een Galilea, laj Felipe li riitz'in sa' xb'een Iturea ut Trakonítida, ut laj Lisanias sa' xb'een Abilene.

² Laj Anás ut laj Kaifás wankeb' chaq cho'q xyuwa'il aj tij. Sa'eb' li kutan a'an kichalk li Raatin li Yos rik'in laj Jwan, ralal laj Sakarías, naq wan chaq sa' li chaqich'och'.

³ Ut a'an kixb'eeni chixjunil li na'ajej wank chire li nima' Jordán, yo chi xyeeb'al reheb' li tenamit naq tento te'xyot' xch'ool te'xjal xk'a'uxl ut te'kub'siiq xha' re naq li Yos tixkuy tixsach li xmaakeb'.

⁴ Li propeet Isaías ki'aatinak chirix laj Jwan naq kixye chi jo'ka'in: “Xyaab' xkux li japjo re sa' li chaqich'och': «Tuqub'omaq li xb'e li Qaawa', tiikob'resihomaq li ruq' b'e chiru.

⁵ Chixjunil li julux taab'ut'manq, chixjunileb' li tzuul ut eb' li b'ool te'kub'simanq xteram; li yokos ru taatiikob'resimanq ut li b'uk'ux ru taatuqub'amanq ru cho'q taq'a.

⁶ Ut chixjunileb' te'ril li kolb'a ib' naxk'e li Yos»”.

⁷ Naab'aleb' li tenamit neke'wulak rik'in laj Jwan chi kub'siik xha' ut a'an naxye reheb': “Ex ral q'anb'olay, ani xk'utuk cheru elelik chiru li josq'il chaalel sa' eeb'een?

⁸ Chik'utunq b'i' sa' leeyu'am li naruuchin li yot'b'ach'oolej jalb'ak'a'uxl, ut mex'ok chi xyeeb'al sa' leech'ool: «A' laj Abrahán a'an qayuwa'». Xb'aan naq ninye eere naq li Yos taaruhanq chi risinkil sa'eb' li pek a'in ralal xk'ajol laj Abrahán.

⁹ Ak wank li maal sa' xtoonaleb' li che'; ut chixjunil li che' ink'a' chaab'il li ru naxk'e, taayok'manq ut taakutmanq sa' xam”.

¹⁰ Toja' naq eb' li tenamit ke'xpatz' re: —K'a' put ru tento taaqab'aanu?

¹¹ Kichaq'ok ut kixye reheb': —Ani wanq wiib' li raq' chixk'e junaq re li maak'a' raq'; ani wanq xtzekemq, jo'kanaq ajwi' chixb'aanu.

¹² Wankeb' ajwi' aj titz'ol toj ke'wulak rik'in chi kub'siik xha': —At aj Tzolonel, k'aru tento taaqab'aanu?

¹³ Ut a'an kixye reheb': —Meepatz' xb'een li taqlanb'ilex wi'.

¹⁴ Wankeb' ajwi' aj puub' ke'xpatz' re: —Ut laa'o, k'aru tento taaqab'aanu? Kichaq'ok a'an ut kixye reheb': —Maak'a' teemaq' re anihaq, mexjitok rik'in b'alaq'il aatin ut k'ojk'ooq leech'ool rik'in leetojb'al.

¹⁵ Li tenamit yo'oon wankeb' ut chixjunileb' yookeb' chi xk'oxlankil sa' xch'ooleb' ma maawa' ta laj Jwan li Kriist.

¹⁶ Kichaq'ok ut laj Jwan ut kixye reheb': “Laa'in ninkub'si eeha' yal rik'in ha', ab'an chalk re li q'axal nim xwankil chiwu laa'in, li moko ink'ulub' ta xhitb'al xk'aamal li xxaab'. A'an tixkub'si eeha' rik'in Santil Musiq'ej ut xam.

¹⁷ Ak wan chaq xk'anjelob'aal sa' li ruq' re xyamtesinkil li xch'oxleb'aal: tixk'uula li xtriiw sa' li xk'uuleb'aal, ab'an li xk'imal tixk'at sa' xam li maajoq'e taachupq”.

¹⁸ Jo'ka'in naq laj Jwan yo chi xch'olob'ankil xna'leb'eb'; ut rik'in naab'al chik chi aatin naxye li Chaab'il Esilal reheb' li tenamit.

¹⁹ Laj Herodes, li nataqlank sa' xb'een Galilea, kaw naq'use'k xb'aan laj Jwan xmaak li xHerodías, rixaqil li riitz'in, jo' ajwi' xmaak chixjunil li maa'usilal kilajxb'aanu.

²⁰ Ab'an sa' roso'jik jun chik kixb'aanu naq kixtz'ap laj Jwan sa' tz'alam.

Xkub'ik xha' li Jesus

²¹ Naq chixjunil li tenamit yookeb' chi kub'siik xha', kikub'eek ajwi' xha' li Jesus. Ut naq yo chi tijok aran, kitehonk li choxa:

²² li Santil Musiq'ej kikub'e chaq sa' xb'een kama' na'ilok junaq mukuy ut kichalk chaq jun xyaab' kuxej sa' choxa, kixye: “Laa'at li walal; aawik'in nasaho'k inch'ool”.

Eb' li xxe'toonil yuwa' li Jesus

²³ Ak wank lajeeb' xka'k'aal chihab' re li Jesus naq kixtikib' li xk'anjel. Sa' xch'ooleb' li tenamit naq a'an ralal laj José. Laj José a'an ralal laj Elí,

²⁴ ralal laj Matat, ralal laj Leví, ralal laj Melkí, ralal laj Janay, ralal laj José,

²⁵ ralal laj Matatías, ralal laj Amós, ralal laj Nahúm, ralal laj Eslí, ralal laj Nangay,

²⁶ ralal laj Mahat, ralal laj Matatías, ralal laj Semehín, ralal laj Josek, ralal laj Jodá,

²⁷ ralal laj Johanán, ralal laj Resá, ralal laj Sorobabel, ralal laj Salatiel, ralal laj Nerí,

²⁸ ralal laj Melkí, ralal laj Adí, ralal laj Kosam, ralal laj Elmadam, ralal laj Er,

²⁹ ralal laj Jesus, ralal laj Elieser, ralal laj Jorim, ralal laj Matat, ralal laj Leví,

³⁰ ralal laj Simehón, ralal laj Judá, ralal laj José, ralal laj Jonam, ralal laj Eliakín,

³¹ ralal laj Meleá, ralal laj Mená, ralal laj Matatá, ralal laj Natán, ralal laj David,

³² ralal laj Jesé, ralal laj Obed, ralal laj Bohos, ralal laj Sala, ralal laj Najsón,

³³ ralal laj Aminadab, ralal laj Admin, ralal laj Arní, ralal laj Esrom, ralal laj Fares, ralal laj Judá,

³⁴ ralal laj Jakob, ralal laj Isahak, ralal laj Abrahán, ralal laj Tara, ralal laj Najor,

³⁵ ralal laj Seruj, ralal laj Rakaw, ralal laj Pélej, ralal laj Eber, ralal laj Sala,

³⁶ ralal laj Kenán, ralal laj Arfaksad, ralal laj Sem, ralal laj Noé, ralal laj Lámek,

³⁷ ralal laj Matusalén, ralal laj Enok, ralal laj Járet, ralal laj Malelehel, ralal laj Kenán,

³⁸ ralal laj Enós, ralal laj Set, ralal laj Adán, ralal li Yos.