San Lucas 18 - Q'eqchi Bible

Li xmalka'an ut laj raqol aatin

¹ Kixye reheb' jun li jaljookil ru aatin re xk'utb'al chiruheb' naq tento te'tijoq junelik, chi maak'a'aq ch'inank ch'oolej:

² “Sa' jun li tenamit kiwank jun aj raqol aatin li ink'a' naxxiwa ru li Yos chi moko naroxloq'iheb' li poyanam.

³ Sa' li tenamit a'an kiwank ajwi' jun xmalka'an li na'ulyan rik'in chi xyeeb'al: «Chinaakol chiru li xik' na'ilok we».

⁴ Chiru k'iila kutan laj raqol aatin ink'a' kiraj, ab'anan moqon chik kixye sa' xch'ool: «Us ta ink'a' ninxiwa ru li Yos chi moko nawoxloq'iheb' li poyanam,

⁵ ab'anan us tinkol li xmalka'an a'in xb'aan naq nikinxch'i'ch'i'i. Mare anchal taachalyanq chi xk'eeb'al xtib'l injolom»”.

⁶ Ut kixye li Qaawa': “Chek'e reetal li k'aru naxye laj raqol aatin ink'a' tiik xch'ool.

⁷ Ma toja' ta chik li Yos ink'a' tixkoleb' li sik'b'ileb' ru xb'aan, li neke'yaab'ank re li xk'ab'a' chi q'eq ut chi kutan, us ta tixk'eheb' chi oyb'enink?

⁸ Ninye eere naq tixkoleb' chi junpaat. Ab'anan, naq tol'elq li K'ajolb'ej, ma tolxtaw li paab'aal sa' ruuchich'och'?”.

Laj pariseey ut laj titz'ol toj

⁹ Kixye ajwi' li jaljookil ru aatin a'in reheb' li neke'xk'oxla rib' naq tiikeb' xch'ool ut neke'xtz'eqtaanaheb' li junch'ol chik:

¹⁰ “Wiib'eb' li winq ke'taqe'k sa' rochoch li Yos chi tijok; li jun a'an aj pariseey ut li jun chik aj titz'ol toj.

¹¹ Laj pariseey, xaqxo naq kitijok sa' xch'ool chi jo'ka'in: «At inYos, ninyoxink chawu xb'aan naq ink'a' jo'kineb' li winq junch'ol, aj elq'eb', ink'a' tiikeb' xch'ool, aj muxuleb' sumlaak, chi moko jo'kin laj titz'ol toj a'in.

¹² Ka' sut nin'ayuunik chiru li xamaan, ninmayeja li xlajeetqil chixjunil li naweechani».

¹³ “Ut laj titz'ol toj najt kixk'e chaq rib'; chi moko kiraj xtaqsinkil li rilob'aal sa' choxa, naxtenyan li re xch'ool: «At inYos, laa'in aj maak. Chawuxtaana taxaq wu!», chan.

¹⁴ “Ninye eere naq a'in kisutq'iik sa' rochoch chi tiikob'resinb'il chik li xch'ool, ut li jun chik ink'a'. Xb'aan naq yalaq ani tixnimob'resi rib', taakub'siiq xwankil; ut li tixkub'si rib', taaterq'usiiq xwankil”.

Li Jesus ut eb' li kok'al

¹⁵ Ke'xk'am ajwi' chaq eb' li k'uula'al rik'in li Jesus re naq tixch'e'eb'. Naq ke'ril a'in eb' li xtzolom, ke'xq'us li ke'k'amok chaq reheb' li k'uula'al.

¹⁶ A'ut li Jesus kixb'oqeb' ut kixye: —Kanab'omaqeb' li kok'al chi chalk wik'in ut meeram chiruheb', xb'aan naq li kama'eb' a'an, reheb' li xnimajwal awab'ejihom li Yos.

¹⁷ Relik chi yaal ninye eere: ani ink'a' tixk'ul li xnimajwal awab'ejihom li Yos jo' junaq ch'ina'al, ink'a' taa'ok chisa'.

Li Jesus ut li winq b'ihom

¹⁸ Jun reheb' li xb'eenileb' li tenamit kipatz'ok re: —At chaab'il aj Tzolonel, k'aru tinb'aanu re tweechani li junelik yu'am?

¹⁹ Kixye li Jesus re: —K'a'ut naq nakaye chaab'il we? Maajun chaab'il, ka'ajwi' li Yos.

²⁰ Laa'at nakanaweb' li chaq'rab': «Matmuxuk sumlaak, mat-kamsink, mat-elq'ak, matyoob'ank tik'ti', chawoxloq'i laana' laayuwa'».

²¹ Ut a'an kixye: —Chixjunil a'in ak inpaab'ahom chalen chaq sa' insaajilal.

²² Naq kirab'i a'in li Jesus, kixye re: —Toj jun chik maa nakab'aanu: k'ayi jo'nimal wank aawe, jek'i reheb' li neb'a', ut taawanq aab'ihomal sa' choxa; toja' naq tatchalq ut tinaataaqe.

²³ Naq kirab'i a'in, q'axal kiraho'k sa' xch'ool li winq, xb'aan naq naab'al xb'ihomal.

²⁴ Naq kiril a'in li Jesus, kixye: —K'ajo' xch'a'ajkilal naq eb' li wankeb' xb'ihomal te'ok sa' li xnimajwal awab'ejihom li Yos!

²⁵ Ink'a' ch'a'aj naq junaq kameey taa'ok sa' ru kuux chiru naq junaq b'ihom taa'ok sa' li xnimajwal awab'ejihom li Yos.

²⁶ Toja' naq eb' li ke'ab'ink re ke'xye: —Ani put truuq taakole'q?

²⁷ Kixsumeheb': —Li ink'a' naru chiruheb' li winq, a'an naru chiru li Yos, chan.

Xtaaqenkil li Jesus

²⁸ Toja' naq kixye laj Pedro: —K'e reetal, laa'o xqakanab' li k'aru wank qe ut xatqataaqe.

²⁹ Ut li Jesus kixye reheb': —Relik chi yaal ninye eere: maajun li ak xkanab' rochoch, rixaqil, riitz'in, xna' xyuwa' malaj ralal xk'ajol sa' xk'ab'a' li xnimajwal awab'ejihom li Yos,

³⁰ taakanaaq chi ink'a' ta tixk'ul q'axal naab'al chik sa'eb' li kutan a'in, ut tixk'ul li junelik yu'am sa' li ruuchich'och' chaalel.

Rox sut li Jesus kixye resil li xkamik

³¹ Li Jesus kixb'oqeb' li Kab'laju ut kixye reheb': “Chek'e reetal, yooko chi taqe'k Jerusalén ut taatz'aqloq ru chixjunil li ke'xtz'iib'a chaq eb' li propeet chirix li K'ajolb'ej.

³² Xb'aan naq taaq'axtesiiq sa' ruq'eb' li maawa'eb' aj Judiiy; taa'eetz'uuq, taahob'e'q ut taachuub'aaq,

³³ ut, akaq xe'xrapi chi tz'uum, te'xkamsi. Ab'an sa' rox li kutan taawakliiq chi yo'yo”.

³⁴ Eb' a'an maak'a' ke'xtaw ru chirix a'in; toj muqmu chiruheb' li aatin a'in, ut ink'a' neke'xtaw xyaalal li yo chi xyeeb'al.

Li mutz' aj Jerikó

³⁵ Naq yo chi nach'ok li Jesus Jerikó, jun li mutz' chunchu chire li b'e, yo chi lemooxnik.

³⁶ Naq kirab'i li k'iila tenamit yookeb' chi nume'k, kixpatz' k'aru a'an.

³⁷ Ut ke'xye re naq a' li Jesus aj Nazaret yo chi nume'k.

³⁸ Toja' naq kixye chi kaw xyaab' xkux: —At Jesus, ralalat laj David, chawuxtaana wu!

³⁹ Li yookeb' chi xik chi uub'ej ke'xq'us re naq tixkanab' choqink; a'ut a'an q'axal kaw chik kixjap re chi xyeeb'al: —At ralal laj David, chawuxtaana wu!

⁴⁰ Kixaqliik li Jesus ut kixtaqla xk'amb'al chaq. Ut naq nach' chik wank, kixpatz' re: —K'aru taawaj tinb'aanu aawe? chan.

⁴¹ Kichaq'ok a'an ut kixye: —Qaawa', chin'iloq ta.

⁴² Li Jesus kixye re: —Chat-iloq! Laapaab'aal xkolok aawe.

⁴³ Sa' junpaat ki'ok chi ilok ut kixtaaqe li Jesus, yo chi xnimankil ru li Yos. Ut chixjunil li tenamit, naq ke'ril a'an, ke'xk'e xloq'al li Yos.