San Lucas 10 - Q'eqchi Bible

Xtaqlankileb' li kab'laju xkaak'aal

¹ Chirix chik a'in li Qaawa' kixxaqab'eb' kab'laju xkaak'aal chik ut kixtaqlaheb' sa' ka'kab'il chi uub'ej, sa' chixjunileb' li tenamit ut na'ajej b'arwi' taaxik.

² Ut kixye reheb': “Li q'olom naab'al, a'ut eb' laj k'anjel ink'a' k'iheb'. Chetz'aama b'i' chiru laj Eechal q'olom naq xtaqlahaqeb' chaq aj k'anjel sa' li xq'olom.

³ “Ayuqex. Chek'e reetal, texintaqla jo'eb' li kok' karneer sa' xyanqeb' laj xojb'.

⁴ Meek'am eexalb'ek, chi moko eechampa, chi moko eexaab'; ut maa'ani teek'e xsahil xch'ool sa' b'e.

⁵ Sa' li kab'l toxex'okaq wi', cheye xb'enwa: «Chiwanq taxaq tuqtuukil usilal sa' li kab'l a'in».

⁶ Ut wi wanq ta aran junaq li naxra li tuqtuukil usilal, leetuqtuukilal taahilanq sa' xb'een; wi ut ink'a', li tuqtuukilal taasutq'iiq chaq eerik'in.

⁷ Chexkanaaq sa' li kab'l a'an, chetzeka ut cheruk' li k'aru wank reheb', xb'aan naq laj k'anjel xk'ulub' naq taak'ehe'q xtojb'al. Meeb'eeni eerib' chire kab'lal.

⁸ “Sa' li tenamit toxex'okaq wi', wi texk'ule'q chi chaab'il, chetzeka li k'aru taak'eemanq eere.

⁹ Chek'irtasiheb' li yaj li wanqeb' aran ut cheye reheb': «Li xnimajwal awab'ejihom li Yos nach' wank eerik'in».

¹⁰ “Ab'anan wi texwulaq sa' junaq tenamit ut ink'a' texk'ule'q, chex'elq chaq sa'atqeb' li xaalib'e ut cheyehaq:

¹¹ «Li xpojtz'il leetenamit li xletz rib' chi qoq taaqachiq' cho'q eere. Ab'anan, chenawaq naq li xnimajwal awab'ejihom li Yos ak nach' wank».

¹² Ninye eere naq sa' li kutan a'an kotzkooq b'ayaq li rahilal tixk'ul Sodoom chiru li tixk'ul li tenamit a'an.

Ra chaalel sa' xb'eeneb' li tenamit li ink'a' xe'paab'ank

¹³ “Ra chaalel sa' aab'een, at Korasín! Ra chaalel sa' aab'een, at Betsaida! Xb'aan naq wi ta aran Tiro ut Sidón kilaj'uxmank li sachb'ach'oolej li xe'uxk sa' eeyanq, ak junxil raj neke'xjal xk'a'uxl, xe'xtiqib' raj rib' rik'in q'es ruhil t'ikr ut xe'chunlaak raj sa' cha.

¹⁴ Jo'kan naq kotzko b'ayaq li rahilal te'xk'ul Tiro ut Sidón chiru li teek'ul laa'ex sa' xkutankil li raqb'a aatin.

¹⁵ Ut laa'at, Kafarnaúm, ma toj sa' choxa tab'i' tatwaklesiiq? Tatsob'e'q b'an toj sa' xb'alb'a!

¹⁶ “Ani taa'ab'inq eere, laa'in tinrab'i; ut ani taatz'eqtaananq eere, laa'in tinxtz'eqtaana; ut li taatz'eqtaananq we, tixtz'eqtaana ajwi' li kitaqlank chaq we”.

Xsutq'ijikeb' li kab'laju xkaak'aal

¹⁷ Ke'sutq'iik chaq eb' li kab'laju xkaak'aal chi saheb' sa' xch'ool ut ke'xye: —Qaawa', eb' laj tza neke'paab'ank chiqu sa' laak'ab'a'!

¹⁸ Kixye li Jesus reheb': —Xwil laj tza chi t'ane'k chaq toj sa' choxa chanchan li raq'kaaq.

¹⁹ Chek'e reetal, xink'e eewankil chi xyeq'b'aleb' li k'anti' ut laj xook', jo' ajwi' sa' xb'een chixjunil xwankilal li xik' na'ilok eere; ut maak'a' k'aru taarahob'tesinq eere.

²⁰ Ab'anan misaho'k sa' eech'ool rik'in naq eb' li maa'us aj musiq'ej neke'paab'ank cheru; chexsaho'q b'an rik'in naq tz'iib'anb'il leek'ab'a' sa' choxa.

Li Chaab'il Esilal ut eb' li q'uneb' xch'ool

²¹ Sa' ajwi' li honal a'an, li Jesus kisaho'k sa' xch'ool xb'aan li Santil Musiq'ej ut kixye: “Ninloq'on aawu, at inYuwa', laa'at aj eechal re li choxach'och', xb'aan naq xamuq a'in chiruheb' li wankeb' xna'leb' jo'wi' li seeb'eb' xch'ool, ut xak'ut chiruheb' li q'uneb' xch'ool. Yaal, at inYuwa', xb'aan naq jo'kan xwulak chawu.

²² “Chixjunil q'axtesinb'il sa' wuq' xb'aan linYuwa', ut maa'ani nanawok ru li K'ajolb'ej, ka'ajwi' li Yuwa'b'ej; ut maa'ani nanawok ru li Yuwa'b'ej, ka'ajwi' li K'ajolb'ej ut eb' li taaraj wi' xk'utb'esinkil”.

²³ Naq wankeb' xjuneseb', li Jesus kixsutq'isi rib' chi rilb'aleb' li xtzolom ut kixye: “Us xaq reheb' li xsa' uhej li neke'ril li k'aru nekeril laa'ex.

²⁴ Ninye eere naq naab'aleb' li propeet ut awab'ej ke'raj raj rilb'al li nekeril laa'ex ut ink'a' ke'ril; ke'raj raj rab'inkil li nekerab'i laa'ex ut ink'a' ke'rab'i”.

Li xnimal ru chaq'rab'

²⁵ Ak taaxaqliiq jun aj nahol Chaq'rab' re xyalb'al rix li Jesus, ut kixye: —At Tzolonel, k'aru tinb'aanu re naq tweechani li junelik yu'am?

²⁶ Li Jesus kixye re: —K'aru tz'iib'anb'il sa' li Chaq'rab'? K'aru nakawil chisa'?

²⁷ Kichaq'ok a'an ut kixye: —Taara li Qaawa' laaYos chi anchal aach'ool, chi anchal aawaanm, chi anchal aametz'ew ut chi anchal aak'a'uxl; ut taara laawas aawiitz'in jo' naq nakara aawib' laa'at.

²⁸ Kixye li Jesus re: —Xasume chi chaab'il. B'aanu a'an ut taawanq aayu'am.

Laj Samaria aj uxtaan

²⁹ Laj nahol Chaq'rab' kiraj xch'olob'ankil xyaalal li xpatz'om, jo'kan naq kixye re li Jesus: —Ani li was wiitz'in?

³⁰ Kichaq'ok li Jesus ut kixye: —Jun li winq ki'elk chaq Jerusalén. Yo chi kub'eek Jerikó naq kit'ane'k sa' ruq'eb' laj elq': ke'xmaq' jo'ch'inal jo'nimal wank re, ke'xteni chi che' ut kamk re ke'xkanab'.

³¹ Ut sa' ajwi' li b'e a'an yo chaq chi kub'eek jun aj tij; naq kiril li winq a'an, kixq'otb'ehin.

³² Jo'kan ajwi' kixb'aanu jun aj Leví li yo chi nume'k aran: naq kiril li winq a'an, kixq'otb'ehin.

³³ “Ab'an jun aj Samaria li yo chi nume'k aran, kiwulak wan wi' li winq ut, naq kiril, kixtoq'ob'a ru.

³⁴ Kijilok chi xk'atq, kixhoy aseeyt ut b'iin sa' li xtiq'ilal, toja' naq kixb'ati ru. Chirix chik a'an kixtaqsi sa' xb'een li xxul, kixk'am sa' jun ochochnaal, ut a'an ki'ilok re.

³⁵ Eweraq chik a'an, kirisi sa' xb'ools o'k'aal chi tumin ut kixk'e re laj eechal re li ochochnaal, ut kixye: «Chawilaq we, ut jo'nimal chik taasach chirix, sa' linsutq'ijik tolintoj aawe».

³⁶ “Ani reheb' li oxib' a'in nakak'oxla laa'at naq a'an tz'aqal ras riitz'in li kit'ane'k sa' ruq'eb' laj elq'?”.

³⁷ Kichaq'ok laj nahol Chaq'rab': —A' li ki'uxtaanank u. Ut li Jesus kixye re: —Ayu ut jo'kan ajwi' chab'aanu laa'at.

Lix Marta ut lix María

³⁸ Naq yo chi xik, kox'okaq li Jesus sa' jun li tenamit; ut jun li ixq, xMarta xk'ab'a', kixk'ul li Jesus sa' rochoch.

³⁹ A'an wank jun li riitz'in, xMaría xk'ab'a'; a'in kolk'ojlaaq rub'el roq li Qaawa', yo chi rab'inkil li raatin.

⁴⁰ Ut lix Marta laatz' ru rik'in li xk'iila k'anjel. Kijilok chi xk'atq li Jesus ut kixye re: —Qaawa', ma maak'a' nakawaj wi' naq li wiitz'in nikinxkanab' chi k'anjelak injunes? Ye re, naq chinxtenq'ahaq.

⁴¹ Kichaq'ok li Qaawa' ut kixye re: —Marta, Marta, nakapoxle aawib' ut yo laak'a'uxl chirix naab'al laak'anjel;

⁴² ab'anan jun ajwi' li na'ajmank ru, ut lix María xsik' ru li jwal chaab'il li ink'a' taamaq'manq chiru.