Levítico 9 - Q'eqchi Bible

Xtiklajik xk'anjeleb' laj tij chiru li Yos

¹ Waqxaqib' kutan chik chirix a'an, laj Moisés kixb'oq laj Aharón ut eb' li ralal xk'ajol, jo' eb' ajwi' li xcheekelaleb' laj Israel.

² Ut kixye re laj Aharón: “Chap junaq saaj wakax cho'q mayej chirix li maak, ut junaq karneer li maak'a'aq reek', re naq taayeechi'imanq cho'q k'atb'il mayej, ut q'axtesiheb' chiru li Qaawa'.

³ Ye reheb' laj Israel naq xchapaqeb' jun chib'aat cho'q mayej chirix li maak, jun saaj wakax ut jun karneer aj junq chihab' xyu'ameb' ut maak'a'aqeb' reek', re naq te'yeechi'imanq cho'q k'atb'il mayej.

⁴ Te'xchap ajwi' junaq teelom wakax ut junaq karneer re xkamsinkil chiru li Qaawa' cho'q mayej re k'amok ib' sa' usilal. Xk'amaqeb' ajwi' chaq mayej k'aj puq'b'ilaq rik'in aseeyt, xb'aan naq li Qaawa' tixk'ut rib' chiruheb' sa' li kutan a'in”.

⁵ Eb' laj Israel ke'xk'am toj chiru li Loq'laj Muheb'aal li k'aru kixpatz' laj Moisés ut chixjunil li komonil ke'nach'ok aran ut ke'wank chi xaqxo chiru li Qaawa'.

⁶ Toja' naq laj Moisés kixye: “A'an a'in li xtaqlahom li Qaawa'. B'aanuhomaq, ut li Qaawa' tixk'ut rib' cheru rik'in xnimal xloq'al”.

⁷ Chirix chik a'an kixye laj Moisés re laj Aharón: “Jilon chaq rik'in li artal ut q'axtesi laamayej chirix li maak jo' ajwi' li xul li taayeechi'i cho'q k'atb'il mayej. Chatoj rix laamaak ut li xmaakeb' laj Israel. Q'axtesi ajwi' li xmayejeb' laj Israel ut chatoj rix xmaakeb', jo' chanru xye li Qaawa'”.

⁸ Laj Aharón kinach'ok rik'in li artal ut kixset xkux li saaj wakax li kixyeechi'i chirix li xmaak.

⁹ Aka' chik eb' li ralal ke'xk'am li kik' ut ke'xk'e re, ut laj Aharón kixtz'a li ru'uj ruq' chisa', kixyul chiru xxukub' li artal ut kixhoy li rela' li kik' chi roq li artal.

¹⁰ Chirix a'an kixk'at sa' xb'een li artal li xeeb', eb' li kenq' ut li xxeeb'ul li xch'och' li xul li xmayejamank chirix li maak, jo' chanru kixye li Qaawa' re laj Moisés.

¹¹ Ab'an li tib' ut li tz'uum kixk'at najt rik'in li na'ajej wankeb' wi' li xmuheb'aaleb' laj Israel.

¹² Laj Aharón kixset ajwi' xkux li xul kiyeechi'imank cho'q k'atb'il mayej. Eb' li ralal ke'xk'e re li kik', ut laj Aharón kixrachrachi chire li artal chi xjunsutam.

¹³ Chirix a'an ke'xk'e re li xjolom ut li setinb'il xul li kiyeechi'imank cho'q k'atb'il mayej, ut laj Aharón kixk'at sa' xb'een li artal.

¹⁴ Kixch'aj li xk'amk'ot ut eb' li ra', ut kixk'at sa' li artal sa' xb'een li mayej yo chi k'atk.

¹⁵ Laj Aharón kixq'axtesi ajwi' li mayej sa' xk'ab'a'eb' laj Israel. Kixchap li chib'aat, a' li mayej chirix xmaakeb' li tenamit, ut kixset xkux, yo chi xmayejankil chirix li maak, kama' ajwi' kixb'aanu rik'in li mayej ak xyeechi'i.

¹⁶ Naq kixq'axtesi li k'atb'il mayej, kixb'aanu jo' chanru chaq'rab'inb'il wi'.

¹⁷ Chirix chik a'an kixq'axtesi li mayej k'aj, kixchap jun mooch' ut kixk'at sa' xb'een li artal, jalan wi' chiru li k'atb'il mayej re li eq'la.

¹⁸ Laj Aharón kixset ajwi' xkux li teelom wakax ut li karneer li neke'xyeechi'i eb' laj Israel re xk'amb'al rib' sa' usilal rik'in li Yos. Eb' li ralal ke'xk'e re li kik', ut a'an kixrachrachi chi xjunsutam li artal.

¹⁹ Ke'xk'e ajwi' re li xxeeb'ul li teelom wakax ut li xxeeb'ul li karneer, li xye, ut li xeeb' wank chirix li xk'amk'oteb', eb' li xkenq' ut li xxeeb'ul li xch'och';

²⁰ ke'xk'e li xeeb' rochb'een li re xmaqab'. Toja' naq laj Aharón kixk'at li xeeb' sa' xb'een li artal.

²¹ Tikto rik'in li re xmaqab' ut li ra' li wank sa' xseeb'al, kixninq'ehi chiru li Qaawa' li q'axtesink mayej, jo' chanru yeeb'il chaq re laj Moisés xb'aan li Qaawa'.

²² Toja' naq laj Aharón kixtaqsiheb' li ruq' ut kirosob'tesiheb' laj Israel; kixq'axtesi li mayej chirix li maak, li k'atb'il mayej ut li mayej re k'amok ib' sa' usilal, ut ki'elk chaq sa' li artal.

²³ Chirix chik a'an laj Moisés ut laj Aharón ke'ok sa' li Loq'laj Muheb'aal ut, naq ke'elk chaq, ke'rosob'tesiheb' laj Israel. Toja' naq li Qaawa' kixk'ut rib' rik'in xnimal xloq'al chiruheb' chixjunil li tenamit:

²⁴ ki'elk xam b'arwi' kixk'ut rib' li Qaawa' ut kixk'at li xul li taak'atmanq raj ut li xeeb' li wank sa' xb'een li artal. Naq ke'ril a'in, chixjunileb' laj Israel ke'xjap re xb'aan xsahileb' xch'ool ut ke'xhupub' rib' sa' ch'och' chi loq'onink.