Levítico 8 - Q'eqchi Bible

II. XXAQAB'ANKIL XWANKILEB' LAJ TIJ (8-10) Laj Aharón ut eb' li ralal ke'xaqab'aak cho'q aj tij

¹ Li Qaawa' kiraatina laj Moisés ut kixye re:

² “B'oq chaq laj Aharón ut eb' li ralal xk'ajol, ut k'am chaq li t'ikr li neke'roksi eb' laj tij, li aseeyt re osob'tesink, junaq saaj wakax li namayejamank chirix li maak, li wiib' chi karneer ut li xchakachil li kaxlan wa maak'a' xyu,

³ ut taach'utub'eb' chixjunil li komonil sa' rokeb'aal li Loq'laj Muheb'aal”.

⁴ Laj Moisés kixb'aanu li kiyehe'k re xb'aan li Qaawa', ut li komonil ke'ch'utlaak sa' rokeb'aal li Loq'laj Muheb'aal.

⁵ Toja' naq laj Moisés kixye re li komonil: “A'an a'in li xye li Qaawa' naq taab'aanumanq”.

⁶ Chirix chik a'an laj Moisés kixb'oqeb' laj Aharón ut eb' li ralal xk'ajol chi nach'ok rik'in, ut kixch'ajeb' rik'in ha'.

⁷ Kixk'e li jut-aq' chirix laj Aharón, kixb'ak' li xk'aamal xsa' ut kixtiqib' rik'in li xka'ta jut-aq'; kixk'e li efod sa' xb'een ut kixjit' chi kaw rik'in li xk'aamal.

⁸ Chirix a'an kixk'e li pektoral sa' xb'een, ut sa' li pektoral kixk'e li Urim ut li Tumim.

⁹ Kixk'e li xlanb'al xjolom, ut sa' xb'een a'an chi xpeekem kixlochob' jun perel yiib'anb'il rik'in oor, a' li loq'laj reetalil li xk'anjel, jo' chanru kiyehe'k re xb'aan li Qaawa'.

¹⁰ Chirix a'an laj Moisés kixchap li aseeyt re osob'tesink ut kixkirkiri li Loq'laj Muheb'aal ut chixjunil li k'aru wank chisa', ut chi jo'kan kirosob'tesi.

¹¹ Rik'in ajwi' li aseeyt a'an, kixrachrachi li artal wuqub' sut, ut kixyul li artal ut chixjunil li nak'anjelak chiru; jo'kan ajwi' li xna'aj li ha' ut li xk'ochleb'aal, re rosob'tesinkileb'.

¹² Chirix chik a'an laj Moisés kixhoy sa' xb'een xjolom laj Aharón li aseeyt re osob'tesink, kixyul ut kixxaqab' cho'q aj tij.

¹³ Kixb'oqeb' li ralal xk'ajol laj Aharón ut kixtiqib'eb' rik'in jut-aq', kixb'ak' chi kaw li xk'aamal xsaheb' ut kixk'e xlanb'al xjolomeb', jo' chanru kiyehe'k re xb'aan li Qaawa'.

¹⁴ Toja' naq laj Moisés kixtaqla xk'amb'al chaq li saaj wakax li namayejamank chirix li maak, ut laj Aharón rochb'eeneb' li ralal xk'ajol ke'xk'e li ruq'eb' sa' xb'een xjolom li saaj wakax.

¹⁵ Toja' naq laj Moisés kixyok' xkux li saaj wakax, kixxok li xkik'el rik'in ru'uj ruq', kixrachrachi chi xsutam li artal re xch'ajob'resinkil, ut li rela' li kik' kixhoy chi roq li artal. Chi jo'kan li artal kikanaak chi osob'tesinb'il re xtz'aamankil aran li xkuyb'al li maak.

¹⁶ Chirix a'an laj Moisés kixchap chixjunil li xeeb' li lanlo wi' li k'amk'ot, li xcha'al jwal xeeb' ru li xch'och' ut xkab'ichal li xkenq' rochb'een li xxeeb'ul, ut kixk'at chixjunil sa' xb'een li artal.

¹⁷ Ab'an li rela' li saaj wakax, naraj naxye, li xtz'uumal, xtib'el ut li natz'eqmank, kixk'ateb' chirix li xmuheb'aaleb' li tenamit, jo' chanru kiyehe'k re xb'aan li Qaawa'.

¹⁸ Laj Moisés kixye naq chijilosiiq chaq li karneer li taayeechi'imanq cho'q k'atb'il mayej, ut laj Aharón rochb'eeneb' li ralal xk'ajol ke'xk'e li ruq'eb' sa' xb'een xjolom.

¹⁹ Chirix chik a'an laj Moisés kixset xkux, kixrachrachi chi kik' chixjunil xsutam li artal,

²⁰ kixseti li karneer ut kixk'at li xjolom, li kok' setinb'il ut li xxeeb'ul;

²¹ kixch'aj rik'in ha' li xk'amk'ot ut eb' li ra' li karneer, ut kixk'at chixjunil sa' xb'een li artal cho'q k'atb'il mayej, sununkil b'ook chiru li Qaawa', jo' chanru kiyehe'k re xb'aan li Qaawa'.

²² Chirix chik a'an laj Moisés kixye naq che'xk'am chaq li karneer jun chik, a' li taak'anjelaq re ok cho'q aj tij, ut laj Aharón rochb'eeneb' li ralal xk'ajol ke'xk'e li ruq'eb' sa' xb'een xjolom.

²³ Toja' naq laj Moisés kixset chi xkux, kixxok kach'in li xkik'el ut kixyul chi rub'el xxik laj Aharón, a' li wank sa' xseeb'al, kixyul ajwi' chiru xna' ru'uj ruq' ut chiru li xna' ru'uj roq, a' li wank sa' xseeb'al.

²⁴ Chirix a'an kixye naq che'nach'oq eb' li ralal xk'ajol laj Aharón, ut jo'kan ajwi' kixb'aanu reheb': kixyul chi kik' rub'eleb' li xxik, kixyul kik' chiru li xna' ru'uj ruq'eb' ut chiru li xna' ru'uj roqeb', a' li wank sa' xseeb'aleb'; toja' naq kixrachrachi chi kik' chixjunil xsutam li artal.

²⁵ Kixchap li xeeb', li xye, chixjunil li xeeb' wank chirix li xk'amk'ot, li ch'och' jwal xeeb' ru, xkab'ichaleb' li kenq' rochb'een xxeeb'ul, ut li ra' wank sa' xseeb'al.

²⁶ Sa' li xchakachil li kaxlan wa maak'a' xyu li nak'eemank chiru li Qaawa', laj Moisés kixchap jun wa ink'a' yuub'il, jun chik yoq'lenb'il rik'in aseeyt, ut jun jayil k'orech, ut kixk'eheb' sa' xb'een li xeeb' ut li ra' li xul li wank sa' xseeb'al.

²⁷ Chirix a'an kixk'e chixjunil a'in sa' ruq' laj Aharón ut sa' ruq'eb' li ralal xk'ajol, re naq te'xninq'ehi chiru li Qaawa' li xq'axtesinkileb'.

²⁸ Laj Moisés kixxok chixjunil a'in sa' ruq'eb' ut kixk'at sa' xb'een li artal rochb'een li k'atb'il mayej, jo' sahil mayej sununk xb'ook re ok cho'q aj tij: a'an k'atb'il mayej sa' xk'ab'a' li Qaawa'.

²⁹ Toja' naq laj Moisés kixxok li re xmaqab' li karneer ut kixninq'ehi chiru li Qaawa' li ok cho'q aj tij. Li xcha'al li karneer li ki'oksimank re ok cho'q aj tij, a'an li kitz'aqk laj Moisés, jo' chanru kiyehe'k re xb'aan li Qaawa'.

³⁰ Laj Moisés kixchap ajwi' kach'in li aseeyt re yuluk ut li kik' li wank sa' xb'een li artal, ut kixrachrachi sa' xb'eeneb' laj Aharón ut eb' li ralal xk'ajol, jo' ajwi' sa' xb'een li raq'eb' jo' aj tij. Kama'an naq kirosob'tesiheb' laj Aharón jo'wi' eb' li ralal xk'ajol, ut li raq'eb' jo' aj tij.

³¹ Toja' naq laj Moisés kixye reheb' laj Aharón ut eb' li ralal: “Chiqomaq li tib' sa' rokeb'aal li Loq'laj Muheb'aal. Tiwomaq aran ajwi', rochb'een li wa wank sa' chakach re li ok cho'q aj tij, jo' tz'aqal kixye we li Qaawa': «Laj Aharón ut eb' li ralal xk'ajol te'xtiw li tib' a'in».

³² Chek'ataq moqon li tib' ut li kaxlanwa taa'ela'anq,

³³ ut mex'elk chire li rokeb'aal li Loq'laj Muheb'aal chiru wuqub' kutan, toj reetal taaraqe'q li wuqub' chi kutan naxk'am leerosob'tesinkil.

³⁴ Li Qaawa' kixye naq li xtz'aamankil xtojb'al rix leemaak, chib'aanumanq jo' xb'aanumank anaqwan.

³⁵ Jo'kan naq laa'ex tento texkanaaq chi kutan ut chiru li q'oqyink sa' rokeb'aal li Loq'laj Muheb'aal, chiru wuqub' kutan. Teepaab' li xchaq'rab' li Qaawa' ut ink'a' texkamq, xb'aan naq a'an a'in linchaq'rab'inkil”.

³⁶ Ut laj Aharón rochb'eeneb' li ralal xk'ajol ke'xb'aanu chixjunil li k'aru xyehom li Qaawa' re laj Moisés.