Levítico 5 - Q'eqchi Bible

Li mayejak chirix k'iila paay chi maak

¹ “Wi junaq taab'oqe'q chi aatinak jo' testiiw chirix li k'aru xril malaj xrab'i, ut ink'a' taaraj xyeeb'al, a'an wank xmaak ut tento taariiqani li maak a'an.

² “Wi ani tixch'e' junaq k'a'aq re ru tz'ajn ru, qayehaq junaq kamenaq xul tz'ajn ru, us ta xxulel k'iche' malaj xxulel ochoch, malaj ut xkomoneb' li neke'xjukuki rib' chiru ch'och', a'an tixtz'ajni rib' ut taakanaaq li maak sa' xb'een, us ta ink'a' xk'e reetal.

³ “Wi junaq tixch'e' xtz'ajnil poyanam, yalaq k'aru li namuxuk, ab'an ink'a' xk'e reetal sa' li honal a'an, li poyanam a'an wank xmaak, wi moqon tixk'e reetal naq ink'a' us xb'aanu.

⁴ “Wi ani tixye sa' jurament naq tixb'aanu k'a'aq re ru us malaj ut ink'a' us (xkomoneb' li jurament li nab'aanumank chi ink'a' nak'oxlamank rix), chi ink'a' xk'e reetal sa' li honal a'an, li poyanam a'an wank xmaak, wi moqon tixk'e reetal naq ink'a' us xb'aanu.

⁵ “Naq junaq taamaakob'q rik'in li k'a'aq re ru a'in, tento tixye k'aru li xmaakob'k wi',

⁶ ut tixk'am chaq chiru li Qaawa' junaq ixqi karneer malaj junaq ixqi chib'aat, cho'q mayej chirix li maak. Chi jo'kan laj tij tixk'e li mayej re xtojb'al rix li xmaak li poyanam a'in.

⁷ “Wi ink'a' tz'aqal xtumin re xloq'b'al junaq ch'ina karneer, tento tixk'am chiru li Qaawa' wiib'aq mukuy malaj ut wiib'aq k'ook'ob' re xtz'aamankil xkuyb'al li xmaak. Jun tixk'e re xtojb'al rix li xmaak ut li jun chik cho'q xk'atb'il mayej.

⁸ Tento naq tixk'am rik'in laj tij, ut a'an tixq'axtesi xb'enwa li jun taayeechi'imanq chirix li maak; tixyatz' li kux, ab'an ink'a' tixb'oq' li xjolom chi junajwa.

⁹ Chirix a'an tixrachrachi b'ayaq xkik'el li xul xmayejamank chirix li maak chi xk'atq li artal, ut li kik' taa'ela'anq tixhoy sa' xtoon li artal, xb'aan naq a'an mayej re kuyuk sachok maak.

¹⁰ Rik'in li xkab' xul tixb'aanu jun k'atb'il mayej, jo' chanru yeeb'il. Chi jo'kan laj tij tixk'e li mayej re xtojb'al rix li xmaak li poyanam a'an, ut taakuye'q li maak.

¹¹ “Wi maak'a' xtumin re xloq'b'al wiib'aq mukuy malaj ut wiib'aq k'ook'ob', tento tixk'am cho'q xmayej chirix li xmaak kaahib'aq liib'r li xchaq'alil ru k'aj triiw. Ink'a' tixk'e x'aseeytil chi moko pom sa' xb'een, xb'aan naq a'an jun mayej chirix li xmaak.

¹² Tento naq tixk'am rik'in laj tij, ut a'an tixchap jun mooch'aq cho'q sahil mayej ut tixk'at sa' xb'een li artal rochb'een li mayej nak'atmank sa' xk'ab'a'. A'an jun mayej chirix li maak.

¹³ Chi jo'kan laj tij tixk'e li mayej re xtojb'al rix li xmaak li poyanam a'an, ut taakuye'q li xmaak. Ut li k'aru taa'ela'anq, taakanaaq cho'q re laj tij, jo' nab'aanumank rik'in li mayej k'aj”.

Li mayejak re xtojb'al rix li maak

¹⁴ Li Qaawa' kiraatina laj Moisés ut kixye re:

¹⁵ “Li poyanam taamaakob'q chi ink'a' rajom xch'ool ut taak'utunq naq wank xmaak xb'aan naq xb'alaq'ik sa' li k'a'aq ru jwal loq' chiru li Qaawa', tento tixchap chaq junaq reheb' li xkarneer li maak'a' reek', tixk'e cho'q xmayej re xtojb'al rix li xmaak, ut tixk'am chiru li Qaawa'. Li xtz'aq li karneer tento xb'irb'al rix chi plaat, jo' tz'aqal neke'b'isok sa' li Loq'laj Na'ajej b'arwi' na'uxk li mayejak chirix li maak.

¹⁶ Li poyanam a'an tento tixtoj li xb'alaq'ik wi' sa' li k'a'aq ru jwal loq'; tixk'e chik junqmay sa' xb'een li o'taqk'aal ut tixq'axtesi chixjunil re laj tij. Chirix a'an, rik'in li karneer taayeechi'imanq chirix li maak, laj tij taamayejaq re xtojb'al rix li xmaak li poyanam a'an, ut taakuye'q li xmaak.

¹⁷ “Wi ani taamaakob'q rik'in xb'aanunkil k'a'aq re ru ramro xb'aan xchaq'rab' li Qaawa', us ta ink'a' tixk'e reetal, a'an wanq xmaak ut tento taariiqani li maak.

¹⁸ Tento tixchap junaq reheb' li xkarneer li maak'a'aq reek' (ut li xtz'aq laa'at tatb'iroq rix), ut tixk'am rik'in laj tij cho'q mayej chirix li maak, re naq chi jo'kan taawanq xkuyb'al xmaak li poyanam a'an, li xmaakob'k chi ink'a' rajom xch'ool, ut li xmaak taakuye'q.

¹⁹ A'an jun mayej chirix li maak, xb'aan naq li poyanam a'an wank xmaak chiru li Qaawa'”.