Levítico 4 - Q'eqchi Bible

Li mayejak chirix li maak

¹ Li Qaawa' kiraatina laj Moisés ut kixye re:

² “Ye reheb' laj Israel: Wi ani taamaakob'q chi moko rajom ta xch'ool, tixq'et junaq xchaq'rab' li Qaawa' ut tixb'aanu li ink'a' raj naru xb'aanunkil, kama'in taab'aanumanq chirix:

³ “Wi a' li xb'eenil aj tij namaakob'k, nakanaak li xmaak sa' xb'een li tenamit. Jo'kan naq tento tixmayeja chiru li Qaawa' junaq ch'ina wakax maak'a'aq reek', cho'q xmayej chirix li maak li xb'aanu.

⁴ Tixk'am chiru li Qaawa', sa' rokeb'aal li Loq'laj Muheb'aal; aran tixk'e li ruq' sa' xb'een li xjolom, ut chirix a'an tixyok' xkux chiru A'an.

⁵ Chirix chik a'an tixxok b'ayaq xkik'el li ch'ina wakax ut tixk'am sa' li Loq'laj Muheb'aal.

⁶ Aran tixtz'a li ru'uj ruq' sa' li kik' ut wuqub' sut tixrachrachi li kik' chiru li Qaawa', sa' xjayal li xt'ilkemil li Santil Na'ajej.

⁷ Rik'in li kik' a'an tixyul ajwi' b'ayaq li xxukub'eb' li artal b'arwi' nak'atmank li pom jwal sununk xb'ook, a' li wank chiru li Qaawa', sa' li Loq'laj Muheb'aal, ut li rela' li kik' tixhoy chi roq li x'artalil li k'atb'il mayej, a' li wank sa' rokeb'aal li Loq'laj Muheb'aal.

⁸ Toja' naq taarisi chixjunil li xeeb'ul li xk'amk'ot li ch'ina wakax, a' li xmayejamank chirix li maak;

⁹ taarisi ajwi' xkab'ichal li xkenq' ut li xeeb' lanlookeb' wi' ut li wank sa' xb'een li xtel. Tento ajwi' risinkil li xxeeb'ul li ch'och' rochb'eeneb' li kenq',

¹⁰ jo' na'isimank re li teelom wakax li nayeechi'imank cho'q mayej re k'amok ib' sa' usilal rik'in li Yos. Ut laj tij tixk'at chixjunil sa' xb'een li x'artalil li k'atb'il mayej.

¹¹ Ab'an li xtz'uumal li ch'ina wakax ut chixjunil li xtib'el, rochb'een li xjolom, eb' li ra', li xsa' ut li xk'ot,

¹² naraj naxye, chixjunil li ch'ina wakax, taarisi ut tixk'am sa' junaq na'ajej saab'esinb'il chi us, b'arwi' nak'eemank li cha, najtaq rik'ineb' li xmuheb'aal li tenamit, ut aran, sa' li na'ajej natz'eqmank wi' li cha, tixk'at sa' xb'een li si'.

¹³ “Wi chixjunileb' laj Israel te'xb'aanu li ink'a' us chi moko rajomeb' ta xch'ool ut maajun reheb' a'an tixk'e reetal naq li xe'xb'aanu a'an xq'etb'al li xchaq'rab' li Qaawa', ut chi jo'kan wankeb' xmaak,

¹⁴ naq taanawmanq li maak xe'xb'aanu, tento naq te'xyeechi'i sa' komonil junaq ch'ina wakax cho'q mayej chirix li maak. Te'xk'am chiru li Loq'laj Muheb'aal,

¹⁵ b'arwi' eb' li xcheekelal li komonil te'xk'e li ruq' sa' xb'een li xjolom li ch'ina wakax, li wank chiru li Qaawa', ut aran ajwi' te'xyok' li xkux.

¹⁶ Chirix chik a'an li xb'eenil aj tij tixk'am b'ayaq xkik'el li wakax sa' li Loq'laj Muheb'aal,

¹⁷ tixtz'a li ru'uj ruq' sa' li kik' ut wuqub' sut tixrachrachi chiru li Qaawa', sa' xjayal li xt'ilkemil li Santil Na'ajej.

¹⁸ Rik'in li kik' tixyul b'ayaq eb' li xxukub' li artal li wank chiru li Qaawa', sa' li Loq'laj Muheb'aal. Ut chixjunil li rela' li kik' tixhoy chi roq li x'artalil li k'atb'il mayej, a' li wank sa' rokeb'aal li Loq'laj Muheb'aal.

¹⁹ Taarisi chixjunil li xxeeb'ul li ch'ina wakax ut tixk'at sa' xb'een li artal,

²⁰ naraj naxye, taab'aanumanq rik'in li ch'ina wakax a'in jo' tz'aqal nab'aanumank re li ch'ina wakax namayejaak chirix li maak. Chi jo'kan laj tij tixk'e li mayej re xtojb'al rix li xmaakeb' li tenamir ut taakuymanq li xmaakeb'.

²¹ Chirix chik a'an taarisi chaq li ch'ina wakax chirix li na'ajej li wankeb' wi' li xmuheb'aaleb' li tenamit, ut tixk'at, jo' tz'aqal na'uxmank rik'in li xb'een ch'ina wakax. A'an a'in li mayej chirix xmaakeb' li komonil.

²² “Wi junaq laj jolominel taamaakob'q ut tixq'et xchaq'rab' li Qaawa' li xYos, a'an wank xmaak, us ta ink'a' rajom xch'ool naq xmaakob'k.

²³ Naq tixk'e reetal li maak xb'aanu, tento tixk'am cho'q xmayej junaq teelom chib'aat li maak'a'aq reek'.

²⁴ Toja' naq tixk'e li ruq' sa' xb'een xjolom li teelom chib'aat ut tixyok' li xkux chiru li Qaawa', sa' li na'ajej b'arwi' neke'kamsiik eb' li xul li neke'k'ate'k. Li mayej a'in, a'an mayej chirix li maak.

²⁵ Chirix chik a'an laj tij tixchap rik'in ru'uj ruq' b'ayaq li xkik'el li xul xmayejamank chirix li maak, tixyul chiruheb' li xxukub' li x'artalil li k'atb'il mayej, ut tixhoy li rela' li kik' chi roq li artal.

²⁶ Tixk'at chixjunil li xeeb' sa' xb'een li artal, jo' tz'aqal nab'aanumank re li xeeb'ul li mayej re k'amok ib' sa' usilal rik'in li Yos. Chi jo'kan laj tij tixk'e li mayej re xtojb'al rix li xmaak laj jolominel ut taakuymanq li xmaak.

²⁷ “Wi junaq poyanam re li tenamit taamaakob'q chi ink'a' rajom xch'ool, ut tixq'et junaq xchaq'rab' li Qaawa',

²⁸ naq tixk'e reetal li maak xb'aanu, tento tixk'am junaq ixqi chib'aat maak'a' reek' cho'q xmayej chirix li xmaak xb'aanu.

²⁹ Tixk'e li ruq' sa' xb'een xjolom li xul li naxyeechi'i chirix li maak, ut tixyok' li xkux sa' xna'aj li k'atb'il mayej.

³⁰ Toja' naq laj tij tixchap rik'in ru'uj ruq' b'ayaq li kik' ut tixyul chiru li xxukub' li x'artalil li k'atb'il mayej, ut chixjunil li rela' li kik' taahoye'q chi roq li artal.

³¹ Tento naq taarisi ajwi' chixjunil li xeeb', jo' tz'aqal na'isimank re li xul nayeechi'imank cho'q mayej re k'amok ib' sa' usilal rik'in li Yos, ut tixk'at sa' xb'een li artal jo' sununkil b'ook chiru li Qaawa'. Chi jo'kan laj tij tixk'e li mayej re xtojb'al rix li xmaak li poyanam a'an, ut taakuymanq li maak.

³² “Wi li poyanam a'an naxk'am chaq junaq karneer cho'q xmayej chirix li xmaak, tento tixk'am chaq ixqi karneer li maak'a' reek'.

³³ Tixk'e li ruq' sa' xb'een xjolom li karneer ut tixyok' li xkux cho'q mayej chirix li maak, sa' li na'ajej b'arwi' neke'kamsiik li xul nak'atmank.

³⁴ Toja' naq laj tij tixchap rik'in ru'uj ruq' kach'inaq xkik'el li xul xmayejamank chirix li maak ut tixyul chiru xxukub' li x'artalil li k'atb'il mayej, ut chixjunil li rela' li kik' taahoye'q chi roq li artal.

³⁵ Chirix chik a'an taarisi chixjunil li xeeb', jo' tz'aqal na'isimank re li karneer nayeechi'imank cho'q mayej re k'amok ib' sa' usilal, ut tixk'at li xeeb' sa' xb'een li artal, rochb'een chixjunileb' li k'atb'il mayej sa' xk'ab'a' li Qaawa'. Chi jo'kan laj tij tixk'e li mayej re xtojb'al rix li xmaak li poyanam a'an, ut taakuymanq li xmaak.