Levítico 3 - Q'eqchi Bible

Li mayej re k'amok ib' sa' usilal rik'in li Yos

¹ “Wi ani tixchap chaq sa' xyanqeb' li xketomq junaq ixqi wakax malaj ut teelom wakax re xyeechi'inkil chiru li Qaawa' jun li mayej re k'amok ib' sa' usilal rik'in li Yos, li xul taayeechi'imanq tento naq maak'a'aq reek'.

² Ani taaq'axtesinq li mayej, tixk'e li ruq' sa' xb'een xjolom li xul tixyeechi'i, ut chirix a'an tixyok' li xkux sa' rokeb'aal li Loq'laj Muheb'aal. Ut eb' laj tij te'xrachrachi li xkik'el chi xsutam li artal.

³ “Ani taaq'axtesinq li xul re xyeechi'inkil junaq mayej re k'amok ib' sa' usilal rik'in li Yos, tento tixq'axtesi chiru li Qaawa', jo' k'atb'il mayej, li xxeeb'ul li k'amk'ot,

⁴ xkab'ichal li xkenq', li xeeb' lanlookeb' wi' ut li wank sa' xb'een li xtel ut li xcha'al jwal q'un re li xch'och', li taa'isimanq rochb'eeneb' li kenq'.

⁵ Eb' laj tij te'xk'at chixjunil a'in sa' xb'een li artal rochb'een li xul li taak'atmanq sa' xb'een li si' yo xxamlel, jo' k'atb'il mayej sununk xb'ook chiru li Qaawa',

⁶ “Wi ani tixyeechi'i re li Qaawa' junaq xkarneer, jo' mayej re k'amok ib' sa' usilal rik'in li Yos, tento tixyeechi'i junaq teelom malaj ixqi karneer li maak'a'aq reek'.

⁷ Wi tixyeechi'i junaq saaj karneer, naq tixq'axtesi chiru li Qaawa',

⁸ tixk'e li ruq' sa' xb'een li xjolom ut chirix a'an tixyok' li xkux chire li Loq'laj Muheb'aal. Toja' naq eb' laj tij te'xrachrachi li xkik'el li xul chi xsutam li artal.

⁹ “Ani tixyeechi'i li xul cho'q mayej re k'amok ib' sa' usilal rik'in li Yos, tento tixq'axtesi chiru li Qaawa', jo' k'atb'il mayej, li xeeb', chixjunil li xye, li xxeeb'ul li xk'amk'ot,

¹⁰ xkab'ichal li xkenq', li xeeb' lanlookeb' wi' ut li wank sa' xb'een li xtel ut li xcha'al jwal q'un re li xch'och', li taa'isimanq rochb'eeneb' li kenq'.

¹¹ Chirix chik a'an laj tij tixk'at chixjunil a'in sa' xb'een li artal, jo' tzekemq, k'atb'il mayej sa' xk'ab'a' li Qaawa'.

¹² “Wi a'an jun chib'aat li nayeechi'imank, naq taaq'axtesimanq chiru li Qaawa',

¹³ tixk'e li ruq' sa' xb'een li xjolom, ut chirix a'an tixyok' li xkux chire li Loq'laj Muheb'aal. Toja' naq eb' laj tij te'xrachrachi li xkik'el li xul chi xsutam li artal.

¹⁴ “Ani tixyeechi'i li xul, naru tixchap chaq ut tixq'axtesi, jo' k'atb'il mayej sa' xk'ab'a' li Qaawa', chixjunil li xxeeb'ul li k'amk'ot,

¹⁵ xkab'ichal li kenq', li xeeb' lanlookeb' wi' ut li wank sa' xb'een li xtel, ut li xcha'al jwal q'un re li xch'och', li taa'isimanq rochb'eeneb' li kenq'.

¹⁶ Chirix chik a'an laj tij tixk'at chixjunil a'in sa' xb'een li artal, jo' tzekemq, k'atb'il mayej li sununk xb'ook. Chixjunil li xeeb', rehaq li Qaawa'.

¹⁷ “A'an a'in jun chaq'rab' twanq chi junajwa cho'q reheb' li jar teep chi tenamit chaalel, yalaq b'ar wanqeb': ink'a' taatzekamanq li xeeb' chi moko li kik'”.