Levítico 20 - Q'eqchi Bible

Li tojb'amaak

¹ Li Qaawa' kiraatina laj Moisés ut kixye re:

² “Ye reheb' laj Israel: “Wi junaq aj Israel malaj aj ab'l tenamit li wanq Israel tixq'axtesi junaq ralal re li yos Molok, tento taakamsiiq chi pek xb'aaneb' li tenamit.

³ Laa'in tinjosq'o'q sa' xb'een li winq a'an ut twisi sa' xyanqeb' li rech tenamitul, xb'aan naq xmux linLoq'laj Na'ajej ut xtz'eqtaana linsantil k'ab'a' rik'in xq'axtesinkil li ralal re laj Molok.

⁴ Wi eb' li poyanam re li tenamit ink'a' te'raj xk'eeb'al reetal li maa'usilal x'uxmank ut ink'a' te'xteneb' kamk sa' xb'een li winq a'an,

⁵ laa'in tinjosq'o'q sa' xb'een a'an jo'wi' sa' xb'een li xjunkab'al, ut twisi sa' xyanqeb' li rech tenamitul rochb'eeneb' chixjunil li xe'xmux rib' chi xloq'oninkil laj Molok.

⁶ Ani taapatz'oq rik'ineb' li musiq'ej ut rik'ineb' laj q'e, ut tixmux rib' sa' xk'ab'a'eb' a'an, laa'in tintz'eqtaana ut twisi sa' xyanqeb' li rech tenamitul.

⁷ “Santob'resihomaq eerib' ut santaqex, xb'aan naq laa'in li Qaawa' leeYos.

⁸ Paab'omaq ut k'anjelahomaq ru linchaq'rab'. Laa'in li Qaawa' li nasantob'resink eere.

⁹ “Yalaq ani tixmajewa li xna' xyuwa', taateneb'aaq kamk sa' xb'een, xb'aan naq xmajewa li xna' xyuwa' ut a'an ajwi' wan wi' naq taakamsiiq.

¹⁰ “Wi junaq winq taamaakob'q rik'in rixaqil li ras riitz'in, te'kamsiiq li winq ut li ixq xb'aan naq xe'xmux li xsumlajikeb'.

¹¹ “Wi junaq winq taawanq rik'in rixaqil li xyuwa', tixmux xwankil li xyuwa'. Jo'kan naq te'kamsiiq li winq ut li ixq, ut a'aneb' ajwi' wankeb' wi' naq te'kamsiiq.

¹² “Wi junaq yuwa'b'ej taawanq rik'in li ralib', te'kamsiiq chi xkab'ichaleb' ut a'aneb' ajwi' wankeb' wi' naq te'kamsiiq, xb'aan naq a'an tz'eqb'eetal aj na'leb'.

¹³ “Wi junaq winq taawanq rik'in junaq winq chanchan tawi' naq taayoklaaq rik'in junaq ixq, te'kamsiiq chi xkab'ichaleb', ut a'aneb' wankeb' wi' naq te'kamsiiq, xb'aan naq xutaanal li xe'xb'aanu.

¹⁴ “Wi ani taak'amoq junaq ixq ut tixk'am ajwi' li xna' li ixq a'an cho'q rixaqil, tz'eqb'eetal aj na'leb' li tixb'aanu; jo'kan naq li winq ut li ixq tento te'k'atmanq chi yo'yo. Chi jo'kan maak'a'aq chik li tz'eqb'eetal aj na'leb' sa' eeyanq laa'ex.

¹⁵ “Wi junaq winq tixq'axtesi rib' chi xb'atz'unlenkil junaq xul, taakamsiiq. Tento ajwi' taakamsiiq li xul a'an.

¹⁶ “Wi junaq ixq tixq'axtesi rib' chi b'atz'unleek xb'aan junaq xul, te'kamsimanq chi xkab'ichaleb', jo' li ixq ut jo' ajwi' li xul. A'aneb' ajwi' wankeb' wi' naq te'kamsiiq.

¹⁷ “Wi junaq winq tixk'am cho'q rixaqil li ranab', xrab'in li xyuwa' malaj ut xko' li xna', ut yooqeb' chi xmuxb'al rib'eb', chi xkab'ichaleb' te'kamsiiq chiruheb' li rech tenamitul, xb'aan naq li xmuxb'al li anab'ej a'an jun tz'eqb'eetal aj na'leb': ani xb'aanunk re li maa'usilal a'an, taariiqani junelik li xmaak.

¹⁸ “Wi ani taayoklaaq rik'in junaq ixq sa' xq'ehil li xpuch'unik ut taawanq rik'in, naxk'e chi kutankil li na'elk wi' li xkik'el li ixq, ut a' ajwi' li ixq nak'ehok re chi kutankil. Jo'kan naq chi xkab'ichaleb' te'isiiq sa' xyanqeb' li rech tenamitul.

¹⁹ “Maamux li ixq riitz'in laana' chi moko li ranab' laayuwa', xb'aan naq aawech'alaleb' ut chekab'ichal teeriiqani leemaa'usilal.

²⁰ “Wi junaq winq taawanq rik'in rixaqil li rikan, tixmux xloq'al li rikan; chi xkab'ichaleb' te'riiqani li xmaakeb' ut te'kamq chi ink'a' te'xkanab' ralal xk'ajoleb'.

²¹ “Wi ani tixmaq' rixaqil li ras malaj ut rixaqil li riitz'in, tixmux xloq'al li ras malaj li riitz'in. Tz'eqb'eetal aj na'leb' a'in, ut chi xkab'ichaleb' te'kamq chi maak'a'eb' ralal xk'ajol.

²² “Paab'omaq chixjunil linchaq'rab' ut lintaqlahom, ut k'anjelahomaq ru chixjunil. Chi jo'kan ink'a' tex'isiiq sa' li na'ajej li texink'am wi' laa'in.

²³ Meeb'aanu jo' neke'xb'aanu eb' li poyanam li te'wisi cheru laa'ex. Eb' a'an xe'xb'aanu li maa'usilal, jo'kan naq ink'a' xinkuyeb' xmaak.

²⁴ Laa'in xinye li waatin naq laa'exaq aj eechal re li xtenamiteb'; laa'in ajwi' tink'ehoq chereechani li ch'och' a'an, li k'ajo' xq'emal. “Laa'in li Qaawa' leeYos, li kinsik'ok eeru sa' xyanqeb' li jar teep chi tenamit.

²⁵ Jo'kan b'i' tento naq laa'ex teenaweb' ru li xul li ink'a' naru xtzekankil ut li naru xtzekankileb', jo' eb' li xik'anel xul muxb'ileb' ut li chaab'ileb'. Meemux eerib' rik'ineb' li xul, eb' li xik'anel xul ut li neke'xjukuki rib' chiru ch'och', a'eb' li xink'ut laa'in jo' muxb'il xuleb'.

²⁶ Santaqex cho'q we laa'in, xb'aan naq laa'in, li Qaawa', santin ut xinsik' eeru sa' xyanqeb' li jar teep chi tenamit re naq laa'exaq intenamit.

²⁷ “Wi junaq winq malaj ixq taa'aatinaq rik'ineb' li musiq'ej malaj ut taaq'ehib'k, taakamsiiq chi pek, ut a'aneb' ajwi' wanqeb' wi' naq te'kamsiiq”.