Levítico 19 - Q'eqchi Bible

Li chaq'rab' chirix li santilal ut li tiikilal

¹ Li Qaawa' kiraatina laj Moisés ut kixye re:

² “Ye re chixjunil li xkomonileb' laj Israel: “Santaqex, xb'aan naq laa'in, li Qaawa' leeYos, santin.

³ “Li junjunq chiroxloq'i li xna' xyuwa'. “Cheroxloq'i ajwi' linkutan sábado. Laa'in li Qaawa' leeYos.

⁴ “Mexxik rik'ineb' li jalanil yos chi moko teeyiib' eeyos rik'in ha'lesinb'il ch'iich'. Laa'in li Qaawa' leeYos.

⁵ “Naq teeq'axtesi re li Qaawa' leemayej re k'amok ib' sa' usilal, b'aanuhomaq jo' chanru tixk'ulub'an li Yos.

⁶ Li xul xq'axtesimank tento xtzekankil sa' ajwi' li kutan a'an, ut naru ajwi' xtzekankil sa' li kutan jun chik; ab'an li toj taa'ela'anq sa' rox li kutan tento taak'atmanq.

⁷ Tz'eqtaananb'ilaq li mayej wi taatzekamanq sa' rox li kutan ut li Yos ink'a' tixk'ul;

⁸ li ani taatzekanq re, taariiqani li xmaak ut taa'isiiq sa' xyanqeb' li rech tenamitul sa' xk'ab'a' xmuxb'al li q'axtesinb'il chiru li Qaawa'.

⁹ “Naq taawulaq xq'ehil li q'olok, matq'olok toj sa' xmaril li ch'och' chi moko taamolk'a li xkanaak.

¹⁰ Maamolk'a chixjunil ru li uub' chi moko taaxok li xt'ane'k sa' ch'och', kanab' b'an cho'q reheb' li neb'a' ut cho'q reheb' laj ab'l tenamit. Laa'in li Qaawa', leeYos laa'ex.

¹¹ “Mex'elq'ak. Mextik'ti'ik chi moko cheb'alaq'i eerib' cherib'il eerib'.

¹² “Meeye eejurament sa' ink'ab'a' chi yal tik'ti', xb'aan naq chi jo'kan taatz'eqtaana li xk'ab'a' laaYos. Laa'in li Qaawa'.

¹³ “Maarahob'tesi laawas aawiitz'in chi moko chamaq' li k'aru wank re. “Chatoj laj k'anjel chawu tz'aqal sa' xq'ehil, ut maakanab' toj re wulaj.

¹⁴ “Maahob' li mem. “Maak'e xtichk'ob'aal li mutz'. Chawoxloq'i laaYos. Laa'in li Qaawa'.

¹⁵ “Tiikaq ru laach'ool, naq tatraqoq aatin: ma yal aatoq'ob'a ru li neb'a' chi moko taaxiwa ru li wank xwankil. Sa' xyaalal b'an tatraqoq aatin sa' xb'eeneb' chixjunileb'.

¹⁶ “Matyoob'ank aatin chirix xjolomeb' laawech'alal. “Mat-okenk chi xkamsinkil laawas aawiitz'in. Laa'in li Qaawa'.

¹⁷ “Maak'uula sa' aach'ool xxik'b'al rilb'al laawas aawiitz'in. “Chaq'us sa' xyaalal laawas re naq ink'a' tattz'aqonq sa' li xmaak.

¹⁸ “Mat-eeqajunk raaxiik' chi moko chak'e sa' aach'ool li rahilal xb'aanuhomeb' laawech tenamitul. Chara laawas aawiitz'in, jo' naq nakara aawib' laa'at. Laa'in li Qaawa'.

¹⁹ “K'anjelahomaq ru linchaq'rab'. “Maak'e chi b'atz'unk laaketomq rik'in k'iila paay chi ketomq. “Maawaw wiib' paay chi iyaj sa' laach'och'. “Maatiqib' aawib' rik'in aq'ej wiib' paay ru xt'ikrul.

²⁰ “Wi ani taawanq rik'in junaq moos ixq li ok re chi sumlaak rik'in jalan chik winq, ab'an toj maji' naxoke'k chi moko ak wank chi ach'ab'anb'il, li winq a'an tento tixtoj rix li xmaak, ab'anan ink'a' taateneb'aaq kamk sa' xb'eeneb', xb'aan naq moko ach'ab'anb'il ta li ixq.

²¹ Li winq tixq'axtesi chiru li Qaawa' junaq karneer cho'q xmayej re xtojb'al rix li maak, ut tixk'am toj sa' rokeb'aal li Loq'laj Muheb'aal.

²² Rik'in li karneer a'in jo' mayej sa' xk'ab'a' li maak, laj tij tixtz'aama chiru li Qaawa' li xkuyb'al xmaak li winq a'an, ut relik chi yaal naq taakuymanq taasachmanq li maak.

²³ “Naq ak xex'ok sa' li tenamit ut teeraw li che' na'uuchink, ink'a' naru teetzeka li ru chiru oxib' chihab'.

²⁴ Ut sa' xka li chihab' chixjunil ru li che' taaq'axtesimanq re li Qaawa' sa' junaq mayejak;

²⁵ ut sa' ro' li chihab' naru chik teetzeka ru li che' a'an. Chi jo'kan li che' q'axal chik taa'uuchinq. Laa'in li Qaawa' leeYos.

²⁶ “Meetzeka li k'a'aq re ru wank xkik'el. “Meeb'aanu li q'ehib'k chi moko cheyal xch'olob'ankil rix li k'aru chaalel cheru.

²⁷ “Meeb'es leerismal chi sursu chi moko cheset ru'uj leemach.

²⁸ “Meelet'exi leetib'el sa' xk'ab'a' junaq kamenaq chi moko chek'e junaq eetalil chiru leetib'el. Laa'in li Qaawa'.

²⁹ “Maasach xloq'al laarab'in rik'in xminb'al ru chi yumb'eetak, re naq ink'a' taanumtaaq li maa'usilal sa' xb'een li na'ajej ut ink'a' te'xq'axtesi rib' li poyanam chi xb'aanunkil li maa'usilal.

³⁰ “Cheroxloq'iiq li kutan sábado ut chek'e xloq'al linLoq'laj Na'aj. Laa'in li Qaawa'.

³¹ “Meerula'aniheb' li neke'aatinak rik'ineb' li musiq'ej chi moko eb' laj q'e. Meetz'ajni eerib' yal sa' xk'ab'a' patz'ok rik'ineb'. Laa'in li Qaawa' leeYos.

³² “Chatxaqliiq re xk'eeb'al xloq'al eb' li cheekel poyanam. Chaxiwa ru laaYos. Laa'in li Qaawa'.

³³ “Meerahob'tesi laj ab'l tenamit li wank sa' eeyanq, sa' leetenamit.

³⁴ Laj ab'l tenamit li wank sa' eeyanq, cherilaq jo' junaq leerech tenamitul. Cheraheb' jo' naq nekera eerib' laa'ex, xb'aan naq laa'ex ajwi' kex'ab'lo'k chaq aran Ejiipt.

³⁵ “Mexb'alaq'ik sa' li b'isok chi k'aam, chi peex ut rik'in metz'ew.

³⁶ Tento naq tex'oksinq b'isleb' li tz'aqal nab'isok. Laa'in li Qaawa' leeYos li kin'isink chaq eere Ejiipt.

³⁷ “Jo'kan b'i' paab'omaq chixjunil linchaq'rab' ut lintaqlahom ut k'anjelahomaq ru. Laa'in li Qaawa'”.