Levítico 18 - Q'eqchi Bible

“Santaqex chejunxaqalil”

¹ Li Qaawa' kiraatina laj Moisés ut kixye re:

² “Ye reheb' laj Israel naq laa'in li Qaawa' leeYos.

³ “Meeb'aanu jo' k'aynaqeb' xb'aanunkil laj Ejiipt, b'arwi' kexwank chaq. “Meeb'aanu jo' na'uxmank sa' li tenamit Kanahán, b'arwi' texink'am, chi moko chexwanq jo' naxye li xchaq'rab'eb' a'an.

⁴ “Paab'omaq lintaqlahom; chek'anjela ru linchaq'rab', chexwanq jo' naxye a'an. Laa'in li Qaawa' leeYos.

⁵ “K'uulahomaq sa' leech'ool linchaq'rab' ut lintaqlahom. Ani taapaab'anq re, taayo'yooq. Laa'in li Qaawa'.

⁶ “Maajun winq naru taawanq rik'in junaq ixq rech'alal re xmuxb'al. Laa'in li Qaawa'.

⁷ “Maasach xwankilal laayuwa' rik'in xmuxb'al laana', xb'aan naq a'an laana' ut ink'a' naru xb'atz'unlenkil.

⁸ “Maamux xwankilal laayuwa' rik'in xb'atz'unlenkil li rixaqil.

⁹ “Matwank rik'in laawanab', xrab'in laayuwa' malaj ut xko' laana', us ta a'an yo'lajenaq sa' leerochoch, us ta ink'a'. Moko naru ta tatwanq rik'in.

¹⁰ “Maasach laaloq'al aajunes aawib' rik'in xmuxb'al laawi ixq, us ta a'an xrab'in laawalal malaj ut xko' laarab'in. Moko naru ta tatwanq rik'in.

¹¹ “Matwank rik'in xko' li rixaqil laayuwa'. A' laayuwa' xsiyank re ut a'an aawanab'.

¹² “Matwank rik'in ranab' laayuwa', xb'aan naq a'an rech kik'el laayuwa'.

¹³ “Matwank rik'in li ixq riitz'in laana', xb'aan naq a'an rech kik'el laana'.

¹⁴ “Maasach xwankilal laawikan rik'in xmuxb'al li rixaqil, xb'aan naq a'an aawikanna'.

¹⁵ “Matwank rik'in laawalib' xb'aan naq a'an rixaqil laawalal. Moko naru ta tatwanq rik'in a'an.

¹⁶ “Maamux xwankilal laawas aawiitz'in rik'in xmuxb'al li rixaqil.

¹⁷ “Matwank rik'in junaq ixq chi moko li xko' li ixq a'an. Maach'e' li ri ixq, us ta xrab'in li xyum us ta xko' li xko', re ta naq taamux. Nimla maak xb'aanunkil a'an, xb'aan naq eekik'el eerib'.

¹⁸ “Maak'am cho'q aawixaqil li riitz'in laawixaqil, chi moko tatwanq rik'in wi toj yo'yo laawixaqil, re naq ink'a' xik' te'ril rib'.

¹⁹ “Matwank rik'in junaq ixq naq yooq xpuch'unik.

²⁰ “Matyoklaak chi xk'atq li rixaqil laawas aawiitz'in, chi moko tatwanq rik'in li ixq a'an, re naq ink'a' taamux aawib'.

²¹ “Maajun laawalal aak'ajol taamayeja chiru li yos Molok. Maatz'eqtaana li xk'ab'a' laaYos chi kama' a'an. Laa'in li Qaawa'.

²² “Matyoklaak chi xk'atq junaq winq jo' tawi' naq xatyoklaak chi xk'atq junaq ixq. A'an jun yib' aj na'leb'.

²³ “Matwank rik'in junaq xul yal re xb'atz'unlenkil, re naq ink'a' taamux aawib'. Jo'kan ajwi' li ixq ink'a' naru taawanq rik'in junaq xul. A'an jun yib' aj na'leb'.

²⁴ “Meetz'ajni eerib' rik'in xb'aanunkil a k'a'aq re ru a'in. Sa' xk'ab'a' a'an xe'xtz'ajni rib' li tenamit li te'wisi laa'in cheru laa'ex.

²⁵ Jo'kan naq xkanaak chi muxb'il ru li xna'ajeb' a'an. Ab'an laa'in xink'eheb' chi xtojb'al rix li xmaa'usilaleb', ut li tenamit xrisiheb' li wankeb' sa' li na'ajej a'an.

²⁶ A'ut laa'ex aj Israel ut eb' laj ab'l tenamit li wankeb' sa' eeyanq, paab'omaq linchaq'rab' ut lintaqlahom ut meeb'aanu junaq li yib' aj b'aanuhom a'in,

²⁷ xb'aan naq chixjunil li yib'eetal aj b'aanuhom a'in ke'xb'aanu li poyanam li ke'wank sa' li tenamit xb'enwa cheru laa'ex. Ut muxb'il chik ru kikanaak li xna'ajeb'.

²⁸ Chi jo'kan ink'a' tex'isiiq sa' li tenamit xb'aan xmuxb'al ru, kama' naq ke'isiik li ke'wank xb'enwa cheru laa'ex.

²⁹ Ani taab'aanunq re yalaq k'aru chi yib' aj na'leb' xkomon a'in, taa'isimanq sa' xyanqeb' li rech tenamitul.

³⁰ Jo'kan b'i' paab'omaq linchaq'rab' ut mext'ane'k sa' li yib' aj b'aanuhom li xb'aanumank xb'enwa cheru laa'ex, chi moko chetz'ajni eerib' rik'in a'an. Laa'in li Qaawa' leeYos”.