Levítico 17 - Q'eqchi Bible

IV. LI CHAQ'RAB' CHIRIX LI SANTILAL (17-26) Li jun chi na'ajej te'loq'oninq wi' eb' laj Israel

¹ Li Qaawa' kiraatina laj Moisés ut kixye re:

² “Ye re laj Aharón ut eb' li ralal jo'wi' reheb' chixjunileb' laj Israel: A'an a'in li xchaq'rab' li Qaawa':

³ “Yalaq ani sa' xyanqeb' laj Israel tixkamsi junaq teelom wakax, junaq karneer malaj junaq chib'aat chisa' malaj ut chirix li na'ajej,

⁴ wi ink'a' tixk'am chaq sa' rokeb'aal li Loq'laj Muheb'aal re xmayejankil re li Qaawa' chiru li xLoq'laj Na'aj, li winq a'an wanq xmaak xb'aan naq xkamsink. Tento taa'isiiq sa' xyanqeb' li rech tenamitul, xb'aan naq xhoy xkik'el li xul.

⁵ Taab'aanumanq chi jo'ka'in re naq eb' laj Israel te'xyeechi'i re li Qaawa' eb' li xul te'xkamsi yal chi jo'kan, ut te'xk'am rik'in laj tij sa' rokeb'aal li Loq'laj Muheb'aal, re naq taayeechi'imanq sa' xk'ab'a'eb' a'an jo' mayej re k'amok ib' sa' usilal.

⁶ Laj tij tixrachrachi li kik' sa' xb'een x'artal li Qaawa', sa' rokeb'aal li Loq'laj Muheb'aal, ut tixk'at li xeeb' jo' sununkil b'ook chiru li Qaawa'.

⁷ Ut maajun wa chik te'xq'axtesi li xmayejeb' reheb' li maa'us a'an, li ke'xloq'oni chaq. A'an a'in jun chaq'rab' wanq xwankil cho'q reheb' chi junelik q'e kutan.

⁸ “Taaye ajwi' reheb' naq yalaq ani sa' xyanqeb' laj Israel malaj aj ab'l tenamit wanq sa' eeyanq, wi tixq'axtesi junaq xk'atb'il mayej malaj yalaq k'a' chi mayejil,

⁹ ut ink'a' tixk'am sa' rokeb'aal li Loq'laj Muheb'aal re xyeechi'inkil re li Qaawa', li winq a'an tento taa'isiiq sa' xyanqeb' li rech tenamitul.

“Meetzeka li kik'”

¹⁰ “Laa'in tinjosq'o'q rik'in chixjunileb' laj Israel malaj aj ab'l tenamit li wanqeb' sa' eeyanq wi te'tzekanq kik' a' yaal chanru. Laa'in te'wisi sa' xyanqeb' li rech tenamitul.

¹¹ Xb'aan naq chixjunil li wank xyu'am yo'yo sa' xk'ab'a' li kik' ut laa'in xink'e eere li xkik'el sa' xb'een li artal, re naq rik'in li kik' a'an texruuq laa'ex chi xkolb'al rix leeyu'am, xb'aan naq li kik' natojok li xkolb'al rix li yu'amej.

¹² “Jo'kan naq xinye reheb' laj Israel: Maajun eere laa'ex chi moko eb' laj ab'l tenamit wanqeb' sa' eeyanq tixtzeka li kik'.

¹³ Yalaq ani sa' xyanqeb' laj Israel malaj aj ab'l tenamit wanq sa' xyanqeb', wi tixchap chaq junaq xul malaj junaq xik'anel xul xkomoneb' li naru xtzekankil, xb'enwa tento tixhoy chaq li xkik'el ut tixk'e ch'och' sa' xb'een,

¹⁴ xb'aan naq chixjunil li wank xyu'am yo'yo sa' xk'ab'a' li kik'. Jo'kan naq xinye eere naq ink'a' teetzeka li kik', xb'aan naq a'an li xyu'ameb' chixjunileb' li yo'yookeb', ut yalaq ani taatzekanq re, tento taa'isiiq sa' xyanqeb' laj Israel.

¹⁵ “Yalaq ani sa' xyanqeb' laj Israel malaj aj ab'l tenamit taatzekanq re xtib'el kamenaqil xul malaj ut t'upinb'il xb'aan junaq josq' aj xul, tento tixpuch' li raq' ut taa'atinq. Ut taayeemanq naq tz'ajn ru toj reetal taa'ok li q'oqyink. Toj moqon chik taakanaaq chi ch'ajob'resinb'il.

¹⁶ Ab'anan wi ink'a' tixpuch' li raq' ut ink'a' taa'atinq, sa' xb'een taakanaaq li xmaa'usilal”.